- योना 4 - Bundeli Holy Bible

योना कौ खुन्‍स और यहोवा परमेसुर की दया

¹ जा बात योना हों भौतई बुरई लगी और ऊकौ खुन्‍स भड़क गओ।

² फिन ऊने यहोवा परमेसुर सें जा कहकें बिन्‍तवाई करी, “हे यहोवा परमेसुर जब मैं अपने देस में हतो, तब का मैं जाई बात नें कैत हतो? ऐई कारन तोरो हुकम सुनतईं तर्शीश हों भग जाबे के लाने फुरती करी; कायसे मैं जानत हतो कि तें दया करबेवारो और दयालु यहोवा परमेसुर आय और अबेर सें खुन्‍स करबेवारो, दया कौ सागर आय और दुख देबे सें खुस नईं होत, दुख दैबे की बेरा में अपनो हिया बदलबेवारो आय।

³ ई लाने अब हे यहोवा परमेसुर, मोरो प्रान लै ले; कायसे मोरे लाने जिन्‍दा रैबे सें अच्‍छो तौ मरबो साजो आय।”

⁴ यहोवा परमेसुर ने कई, “तोरो जौ खुन्‍स भड़को आय, का ऊ सई आय?”

⁵ ईसें योना नगर सें कड़कें, ऊके पूरब दिसा कोद बैठ गओ; और उतै एक टपरिया बनाकें, ऊके छांयरे में बैठकें तकन लगो कि नगर कौ का हुईयै।

⁶ तब यहोवा परमेसुर ने एक अरंड़ी कौ पेड़ उगाकें एैसो बड़ो करो कि योना की मूंड़ पै छांयरी होबै, जीसें ऊको दुख दूर हो सके। योना ऊ अरंड़ी के पेड़ सें भौतई खुस भओ।

⁷ भुन्सारे जब उजालो होन लगो, तब यहोवा परमेसुर ने एक कीड़े हों पठैव, जीने अरंड़ी के पेड़ हों एैसो काटो कि ऊ सूख गओ।

⁸ जब सूरज कड़ो, तब यहोवा परमेसुर ने पुरवईया बहाकें लू चलाई और घामों योना की मूड़ पै एैसो लगो कि ऊ बेहोस होन लगो; और ऊने एैसो कहकें मौत मांगी, “मोरे लाने जिन्‍दा रैबे सें तो मौत साजी आय।”

⁹ यहोवा परमेसुर ने योना सें कई, “तोरो खुन्‍स, जो अरंड़ी के पेड़ के कारन भड़को आय, का ऊ सई आय?” ऊने कई, “हओ, मोरो जौ खुन्‍स भड़को आय ऊ ठीकई आय, बल्‍कि खुन्‍स के मारे तौ मरबो साजो होतो।”

¹⁰ तब यहोवा परमेसुर ने कई, “जौन अरंड़ी के पेड़ के लाने तेंने कछु मेंनत नें करी, नें ऊहों बढ़ाओ, जौन एकई रात में भओ हतो और एकई रात में नास सोई हो गओ; ऊपै तेंने तरस खाई आय।

¹¹ फिन जौ बड़ो नगर नीनवे, जीमें एक लाख बीस हजार सें जादा मान्‍सन आंय जो अपने दायने और बांए हाथ कौ भेद लौ नईं पैचानत और बिलात पसु सोई ऊमें रैत आंय, तौ का मैं ऊपै तरस नें खाओं?”