- योना 2 - Bundeli Holy Bible

योना की बिन्‍तवाई

¹ तब योना ने बड़ी मछरिया के पेट में सें अपने यहोवा परमेसुर सें बिनती करके कई,

² “मैं बिपदा में पड़ो हतो और उतईं सें मैंने यहोवा परमेसुर हों टेरो, और ऊने मोरी सुन लई आय; अधलोक के पेट के भीतरे सें मैं चिल्‍लया पड़ो, और ऊने मोरी सुन लई।

³ तेंने मोय गैरे समंदर की थाह लौ डाल दओ और मैं समन्दर के हिया में पड़ो हतो; तोरी सबरी लहरें, जिनहों तेंने हुकम दओ हतो, मोरे ऊपरै सें बह गईं।

⁴ फिन मैंने कई, ‘मैं तोरे सामूं सें काड़ दओ गओ आंव; फिन भी तोरे पवित्तर भवन कुदाऊं फिन सें हेर हों!’

⁵ मैं पानू सें इतै लौ घिरो हतो कि मोरे प्रान कड़बेवारे हते; गैरो समंदर मोरे चारऊं कोद हतो, और मोरी मूड़ में समुद्री सैवाल सो लिपटो हतो।

⁶ मैं पहाड़न की जड़ लौ पोंच गओ हतो; मैं हमेसा के लाने धरती में बन्‍द हो गओ हतो; फिन भी हे मोरे यहोवा परमेसुर, तेंने मोरे प्रानन हों खदरा में सें उठा लओ आय।

⁷ जब मैं गैरहोस होन लगो, तब मैंने यहोवा परमेसुर हों याद करो; और मोरी बिन्‍ती तोरे लिगां बल्‍कि तोरे पवित्तर भवन में पोंच गई।

⁸ जौन औरें बेकार की मूरतन पै हिया लगात आंय, बे अपने दया करबेवारे परमेसुर हों छोड़ देत आंय।

⁹ परन्‍त मैं ऊंचे सब्‍द सें धन्‍यवाद करके तोहों बलिदान चढ़ैहों; जो मानता मैंने मानी, ऊहों पूरी करहों। कायसे यहोवा परमेसुरई बचाबेवारो आय!”

¹⁰ तब यहोवा परमेसुर ने बड़ी मछरिया हों हुकम दओ और ऊने योना हों सूखी धरती पै उगल दओ।