- यूहन्‍ना 7 - Bundeli Holy Bible

¹ इन बातन के पाछें यीशु गलील में फिरत रओ, बो यहूदिया में नईं जाओ चाहत हतो, कायसे यहूदी ऊहां मार डालबे की खोज में हते।

² यहूदियन कौ परब यानि मण्डपों को परब ऐंगर हतो।

³ ई लाने ऊके भाईयों ने ऊसे कई, इते से निंग के यहूदिया में चलो जा, कि तोरे चेले भी उन कामन हां हेर सकें जिन हां तें करत आय।

⁴ कायसे ऐसो कोऊ नईं हुईये, जौन नामी होबो चाहे, और लुक केकाम करे, अगर तें इन कामन हां करत आय, तो अपने हां संसार पे दरसा।

⁵ कायसे ऊके भईया भी ऊ पे भरोसा नईं करत हते।

⁶ ई लाने यीशु ने उन से कई, मोरी बेरा अबै लौ नईं आई; पर तुमाए लाने सबई बेरा सई आय।

⁷ जगत तुम से बैर नईं कर सकत, परन्त मोसे करत आय, कायसे मैं ई बात की सीख देत आंव, कि उन के काज बुरय आंय।

⁸ तुम खुद परब में जाओ, मैं ई परब में अबै नईं जात; कायसे मोरी बेरा अबै लौ पूरी नईं भई।

⁹ उन से जे बातें कहबे के पाछें, बो गलील में रुक गओ।

¹⁰ पर जब ऊके भईया परब में चले गए, तब बो भी गओ सब के सामूं नईं, मानो लुक के गओ।

¹¹ ई लाने यहूदी ऊ परब में ऊहां ढूंड़त रए और कह रए हते बो किते आय?

¹² और भीड़ ऊके बारे में कुड़कुड़ान लगी, कछु लोग कह रए हते; बो भलो मान्स आय, दूसरे कह रए हते; नईं, बो लोगन हां भरमात आय।

¹³ फिन भी यहूदियन के डर से कोई ऊके बारे में खुलके नईं बोल रओ हतो।

¹⁴ और जब परब के आधे दिना बीत गए; तो यीशु मन्दर में गओ और प्रवचन करन लगो।

¹⁵ तब यहूदी अचरज में होकें कैन लगे, जौ मान्स बिना पढ़े कैसे ज्ञानी बन गओ?

¹⁶ तब यीशु ने उन से कई, जौ सन्देस मोरो नईं, परन्त ऊ को आय जीने मोय पठैव।

¹⁷ जदि कोऊ मान्स ऊ की मनसा पूरी करबे हां तईयार आय, तो बो ई सीख सें जान जै है, कि जे परमेसुर की कोद से आय, या मैं अपनी कोद से कैत आंव।

¹⁸ जौन अपनी कोद से कहत आय, बो अपनी ही बड़ाई चाहत आय; पर जौन अपने पठैबेवाले की बड़ाई चाहत आय, ओई सांचो आय, और ऊ में कोई पाप नईंयां।

¹⁹ का मूसा ने तुम हां नैम नईं दईं? फिन भी तुम में से कोई रीतियन कौ पालन नईं करत। तुम काय मोय मार डालबो चाहत आव?

²⁰ भीड़ ने कई; तोय में दुष्ट आत्मा आय; को तोय मार डालबो चाहत आय?

²¹ यीशु ने उन से कई, मैंने एक काम करो और तुम सब अचरज करत आव।

²² ऐई काजें मूसा ने तुम हां खतना की आज्ञा दई आय (जा नईं कि बा मूसा की ओर से आय परन्त बाप-दादों से चली आ रई आय) और तुम सब्त के दिना मान्स को खतना करत आव।

²³ ई लाने सब्त के दिना मान्स कौ खतना करो जात आय, कि मूसा की रीत कौ उलंघन न होबै, ई लाने मैंने सब्त के दिना एक मान्स हां साजो कर दओ, तुम मोपै काय खुनसियात हौ?

²⁴ मों देखो न्याव न करियो, परन्त धर्म से न्याव करो।

²⁵ तब यरूशलेम के कछु लोग कैन लगे; का जौ ओई मान्स नईं, जीहां बे मार डालबे की कोसिस कर रय आंय।

²⁶ पर तको, बो तो खुले आम बातें कर रओ आय और बे ऊसे कछु नईं कह रय आंय; कहूं हाकिमन हां भी तो नईं मालूम हो गओ आय; कि जौई मसीह आय?

²⁷ ईहां तो हम जानत आंय, कि जौ मान्स किते कौ आय, परन्त जब मसीह आ है, तो कोई भी न जान है, कि बो किते कौ आय।

²⁸ तब यीशु ने मन्दर में सीख देत भय जोर देके कई, तुम मोय जानत आव और जौ भी जानत हों, कि मैं किते कौआंव: मैं अपने से नईं आओ परन्त जीने मोय पठैव बो सांचो आय, जीहां तुम नईं चीनत।

²⁹ मैं ऊहां चीनत आंव; कायसे मैं ऊ की कोद से आंव और ओई ने मोय पठैव आय।

³⁰ ई लाने बे ऊहां पकड़बे की कोसिस करन लगे, फिन भी कोऊ ने ऊ पे हाथ नईं डालो, कायसे ऊ की बेरा अबै लौ नईं आई हती।

³¹ और भीड़ में से बिलात जनन ने ऊ पै भरोसा करो, और कैन लगे जब मसीह आ है, तो का बो ई मान्स से भी ज्यादा चिन्ह दिखा है?

³² फरीसियन ने भीड़ हां ऊके बारे में कानाफूसी करत देखो; और महापुरोहित और फरीसियन ने ऊहां पकड़ाबे के लाने सिपाहियन हां पठैव।

³³ ई लाने यीशु ने कई मैं तनक बेरा लौ और तुमाए संग्गै आंव; तब मैं ऊके ऐंगर चलो जै हों जीने मोय पठैव आय।

³⁴ तुम मोय ढूंढ़ हौ, पर नईं पाहौ और जिते कौ मैं आंव, उते तुम नईं जा सकत।

³⁵ यहूदियन ने आपस में कई, जौ किते जाहै, कि हम ऊहां न पाहैं? का बो उन के ऐंगर जाहै, जो यूनानियन में तितर-बितर होकें रहत आंय, और का यूनानियन हां भी सीख दै है?

³⁶ जा कैसी बात आय जौन ऊ ने कई, तुम मोय ढूंढ़ हौ और न पाहौ, और जिते कौ मैं आंव, उते तुम नईं आ सकत?

³⁷ फिन परब के अखिरी दिना, जौन खास दिना हतो, यीशु ठांड़ो भओ और जोर से कहन लगो, अगर कोऊ प्यासो होय तो मोरे ऐंगर आके पी ले।

³⁸ जौन मोय पे भरोसा कर है, जैसो पवित्र शास्त्र में कहो गओ आय, ऊके हृदय में से जीवन के पानू की नदियां बह जै है।

³⁹ ऊ ने पवित्र आत्मा के बारे में कई, जीहां ऊ पे भरोसा करबेवाले पाबे पे हते; कायसे पवित्र आत्मा अबै लौ नईं उतरो हतो, कायसे यीशु अबै लौ महिमा में नईं पहुंचो हतो।

⁴⁰ तब भीड़ में से कछु ने जब इन बोलन हां सुनो तो कई, जौ सही में बो अगमवकता आय।

⁴¹ औरन ने कई; जौई मसीह आय, फिन कछु दूसरे लोग कहन लगे; काय? का मसीह गलील से आ है?

⁴² का पवित्र शास्त्र में जौ नईं लिखो आय, कि मसीह दाऊद के गोत्र से और बैतलहम गांव से आ है, जिते दाऊद रहत हतो?

⁴³ ईसें लोगों में फूट पड़ गई।

⁴⁴ उन में से कछु ऊहां पकड़बो चाहत हते, पर कोऊ ने ऊ पे हाथ नईं डालो।

⁴⁵ तब सिपाही महापुरोहितन और फरीसियन के ऐंगर आए, और उन ने सिपाहियन से कई, तुम ऊहां काय नईं लाए?

⁴⁶ सिपाहियन ने उन से कई, आज लौ कोऊ ने ऐसी बातें कभऊं नईं कईं, जैसो बो कहत आय।

⁴⁷ तब फरीसियन ने उन से कई, कहूं तुम भी तो ऊ की बातन में नईं आ गए?

⁴⁸ का हाकिमन या फरीसियन में से कोऊ ने ऊ पै भरोसा करो आय?

⁴⁹ पर जे भीड़ जौन रीतियन हां नईं जानत, श्रापित आय।

⁵⁰ नीकुदेमुस ने, (जौन पेंला ऊके ऐंगर आओ हतो, और उन में से एक हतो) उन से कई।

⁵¹ का हमाई रीतियां कोऊ मान्स हां जब लौ पेंला ऊ की नईं सुन ले और जा नईं जान ले, कि बो का करत आय; दोषी ठहरात आय?

⁵² उन ने ऊसे कई; कहूं तें भी तो गलील कौ नईंयां? हेर, गलील से कोऊ अगमवकता प्रगट नईं होबे कौ।

⁵³ तब सब अपने अपने घरै चले गए।