- यूहन्‍ना 18 - Bundeli Holy Bible

¹ जब यीशु जे बातें कह चुको, तो बो अपने चेलन के संग्गै किद्रोन नाले के ऊ पार गओ, जिते एक बगीचा हतो, जीमें बो और ऊके चेले गए।

² यहूदा भी जौन ऊहां पकड़वाबे पे हतो ऊ जांगह जानत हतो, कायसे यीशु बिलात बेर अपने चेलन के संग्गै उते जात हतो।

³ तब यहूदा पलटन हां और महापुरोहितन और फरीसियन की कोद से सिपाहियन हां लेके, उते लालटेन, मशालें और हथियारों समेंत आओ।

⁴ तब यीशु उन सब बातन हां जौन ऊ पे होबेवाली हतीं, जानके आंगू बढ़ो, और उन से कई, तुम की हां ढूंढ़त आव?

⁵ उन ने कई, यीशु नासरी हां: यीशु ने उन से कई, मैं आंव: और यहूदा भी जौन ऊहां पकड़वाबे पे हतो, ऊ न के संग्गै ठांड़ो हतो।

⁶ जब ऊ ने उन से जा कई, मैं आंव, तो बे पाछें हटे और धरती पे गिर पड़े।

⁷ तब ऊ ने फिन पूंछी, तुम कीहां ढूंढ़त आव? उन ने कई, यीशु नासरी हां।

⁸ यीशु ने उन से कई, मैं तुम से बता दओ कि मैं ही आंव, जदि तुम मोय ढूंढ़त आव तो इन हां जान दो।

⁹ जौ ई लाने भओ, कि बो बचन पूरो होबै, जौन ऊ ने कई हती कि जिन हां तेंने मोय दओ, उन में से मैंने एक हां भी नईं खोओ।

¹⁰ शमौन पतरस ने जौन तलवार लएं हतो, ऊहां निकाल के महापुरोहित के चाकर पे चलाई और ऊ को दायनो कान काट डालो, ऊ चाकर कौ नाओं मलखुस हतो।

¹¹ यीशु ने पतरस से कई, तलवार हां म्यान में धर, जौन प्यालो बाप ने मोय दओ आय का मैं ऊहां नईं पियों?

¹² तब रोमी सेना के दल और सेनापति और यहूदियन के सिपाहियन ने यीशु हां पकड़ के बांध लओ।

¹³ और पेंला ऊहां हन्ना के ऐंगर ले गए, कायसे बो ऊ बरस के महापुरोहित काइफा कौ ससुर हतो।

¹⁴ जौ काइफा ही हतो, जीने यहूदियन हां सलाह दई हती कि हम लोगन के लाने एक मान्सन हां मरबो साजो आय।

¹⁵ शमौन पतरस और एक और चेला यीशु के पाछें हो लए, जौ चेला महापुरोहित कौ चिनार को हतो और यीशु के संग्गै महापुरोहित के आंगन में गओ।

¹⁶ परन्त पतरस बायरै द्वार पे ही ठांड़ो रहो, तब बो दूसरो चेला जौन महापुरोहित कौ चिनार को हतो, बाहर कड़ो, और द्वारपालिन से कहके, पतरस हां भीतर ले आओ।

¹⁷ तब चाकरनी जौन द्वारपालिन हती, पतरस से कई, का तें सोई ई मान्स के चेलन में से आय? ऊ ने कई, मैं नईं आंव।

¹⁸ उतईं पे चाकर और सिपाही कोयला की सिगड़ी बारके ठांड़े ताप रए हते, कायसे जाड़ो हतो और पतरस भी उन के संग्गै ठांड़ो ताप रओ हतो।

¹⁹ तब महापुरोहित ने यीशु से ऊके चेलन और ऊ की सीख के बारे में पूंछी?

²⁰ यीशु ने ऊसे कई, मैंने संसार में खुल के बातें करीं आंय; मैंने सदा प्रार्थनाघरन और मन्दर में जिते सब यहूदी जमा होत हते सीख दई आय, और मैंने लुक के कछु भी नईं कई।

²¹ तें मोय से काय पूंछत आय? सुनबेवालन से पूंछ ले, कि मैंने उन से का कई? हेर, जे जानत आंय; कि मैंने का का कई?

²² जब ऊ ने जा कई, तो ऐंगर ठांड़े सिपाहियन में से एक ने जा कहत भय, ऊहां ठूंसा मारो, तें महापुरोहित से ऐंसो बोलत आय?

²³ यीशु ने ऊसे कई, जदि मैंने गलत कई, तो ऊहां साबित कर; अगर सही कई आय, तो तें मोय काय मारत आय?

²⁴ तब हन्ना ने ऊहां काइफा महापुरोहित के ऐंगर बंधो भओ पठै दओ।

²⁵ शमौन पतरस ठांड़ो भओ ताप रओ हतो। तब उन ने ऊसे कई; का तें सोई ऊके चेलन में से आय? ऊ ने मेंट के कई, मैं नईं आंव।

²⁶ महापुरोहितन के चाकरन में से एक ने जौन ऊ मान्स कौ नातेदार हतो, जीको कान पतरस ने काट डालो हतो, कई, मैंने तोहां बगीचा में ऊके संग्गै तको हतो?

²⁷ तब पतरस फिन मेंट गओ और तुरतईं मुरगा ने बांग दई।

²⁸ और बे यीशु हां काइफा के ऐंगर से राजमहल में लै गए और भुनसारे की बेरा हती, परन्त बे खुद राजमहल में नईं पिड़े, कहूं अशुद्ध न हो जाबें ताकि फसह खा सकें।

²⁹ तब पीलातुस बायरें कड़ के उन के ऐंगर आओ और कई, तुम ई मान्स पे का दोष लगात आव?

³⁰ उन ने ऊसे कई, जदि जौ मान्स कुकर्मी न होतो तो हम ऊहां तोरे इते नईं लियाते।

³¹ पीलातुस ने उन से कई, तुम खुद ईहां ले जाके अपनी रीतियन के अन्सार ईको न्याव करो: यहूदियन ने ऊसे कई, हम कोऊहां मृत्युदन्ड नईं दे सकत आंय।

³² जौ ई लाने भओ, कि यीशु की बा बात पूरी होबै, जौन ऊ ने जौ इसारो करत भय कही हती, कि ऊ की मृत्यु कैसी हुईये।

³³ तब पीलातुस फिन राजमहल में भीतर गओ और यीशु हां टेरवाओ, और ऊसे कई, का तें यहूदियन को राजा आय?

³⁴ यीशु ने ऊसे कई, का तें जा बात अपनी कोद से कह रओ आय या औरन ने मोरे बारे में तोय बताओ?

³⁵ पीलातुस ने यीशु से कई, का मैं यहूदी आंव? तोरी ही जात और महापुरोहितन ने तोय मोरे हाथन में सौंपो आय, तेंने का करो आय?

³⁶ यीशु ने पीलातुस से कई, मोरो राज्य ई संसार कौ नईंयां, जदि मोरो राज्य ई जगत को होतो, तो मोरे राज्य के हाकिम लड़ाई करते, और मैं यहूदियन के हाथ नईं सौंपो जातो: परन्त मोरो राज्य ई जगत कौ नईंयां।

³⁷ पीलातुस ने यीशु से कई, तो का तें राजा आय? यीशु न ऊसे कई, तें सही कहत आय कि मैं राजा आंव; मैंने ई लाने जन्म लओ, और ई लाने जगत में आओ कि सत्य की गवाही देओं, जो कौनऊं सत्य कौ आय, मोरी बानी सुनत आय।

³⁸ पीलातुस ने ऊसे कई, सत्य का आय? और जब बो जौ कह चुको, तो बो फिन यहूदियन के ऐंगर बायरें गओ और उन से कई, मैं ऊ में कोऊ दोष नईं देखत।

³⁹ पर तुमाई रीत आय कि फसह के दिना मैं तुमाए लाने एक जन हां छोड़ देओं, का तुम चाहत आव कि मैं तुमाए लाने यहूदियन के राजा हां छोड़ देओं?

⁴⁰ तब उन ने फिन चिल्या के कई, ई मान्स हां नईं परन्त हमाए लाने बरअब्बा हां छोड़ दे; और बरअब्बा एक डाकू हतो।