- उत्पत्ति 6 - Bundeli Holy Bible

मान्‍स जाति की दुस्‍टता

¹ फिन जब मान्‍स धरती के ऊपर मुतके बढ़न लगे, और उनकी मोंड़ियां पैदा भईं,

² तब ईसुर के मोंड़ों ने मान्‍सन की मोंड़ियों हों हेरो, कि बे सुन्‍दर आंय, और उनोंरन ने जीसें जीहों चाहो ब्‍याव कर लओ।

³ तब यहोवा परमेसुर ने कई, “मोरी आत्‍मा मान्‍स के संगै हमेसा लौ नें रैहै, कायसे मान्‍स भी सरीरई आय; ऊकी उमर एक सौ बीस साल की हुईये।”

⁴ उन दिनन में पृथ्‍वी पै दानव रैत हते; और ईके बाद ईसुर के मोंड़ा मान्‍स की मोंड़ियों के लिगां गए तब उनके द्वारा जो मोंड़ा पैदा भए बे सूरवीर होत हते, जिनकी कीरती प्राचीनकाल सें जानी जात आय।

⁵ यहोवा परमेसुर ने हेरो कि मान्‍सन की बुराई पृथ्‍वी पै बढ़ गई आय, और उनके मन के बिचार में जो कछु पैदा होत आय ऊ लगातार बुरोई होत आय।

⁶ यहोवा परमेसुर पृथ्‍वी पै मान्‍स हों बनाकें पछताओ, और मन में बेजा दुखी भओ।

⁷ तब यहोवा परमेसुर ने कई, “मैं मान्‍स हों जीहों मैंने रचो आय पृथ्‍वी के ऊपर सें मिटा दैहों; का मान्‍स, का पसु, का रेंगबेवारे जन्‍तु, का आकास के पक्‍छी, सबई हों मिटा दैहों, कायसे मैं उनहों बनाकें पछतात आंव।”

⁸ परन्‍त यहोवा परमेसुर की किरपादृस्‍टि नूह पै बनी रई।

नूह

⁹ नूह की बंसावली कौ बिवरण जौ आय। नूह धरमी मान्‍स और अपनी बेरा के मान्‍सन में खरो हतो; और नूह यहोवा परमेसुर ही के संगै-संगै चलत रओ।

¹⁰ नूह सें शेम, हाम और येपेत नाओं तीन मोंड़ा पैदा भए।

¹¹ ऊ बेरा पृथ्‍वी यहोवा परमेसुर की नजर में बिगड़ गई हती और झगड़ा फसाद सें भर गई हती।

¹² यहोवा परमेसुर ने पृथ्‍वी पै नजर करी तौ का हेरो कि बा बिगड़ी भई आय; कायसे सबरे प्राणियों ने पृथ्‍वी पै अपनो अपनो चालचलन बिगाड़ लओ हतो।

¹³ तब यहोवा परमेसुर ने नूह सें कई, “सबरे प्राणियों के अन्‍त करबे कौ सवाल मोरे सामूं आ गओ आय; कायसे उनके कारन पृथ्‍वी झगड़ा फसाद सें भर गई आय, ई लाने मैं उनहों पृथ्‍वी समेंत नास कर डालहों।

¹⁴ ई लाने तें गोपेर पेड़ के कठवा सें एक जहाज बना ले, ऊमें कुठरियां बनाईयो और भीतर बायरें ऊपै राल लगाईयो।

¹⁵ ई तरीका सें तें ऊहों बनाईयो: जहाज की लम्‍बाई तीन सौ हाथ (लगभग एक सौ चालीस मीटर), चौड़ाई पचास हाथ (लगभग तेईस मीटर) और ऊंचाई तीस हाथ (लगभग तेरह मीटर) की होबै।

¹⁶ जहाज में एक जंगला बनाईयो, और ऊके एक हाथ (लगभग आधा मीटर) ऊपर सें ऊकी छत बनाईयो, और जहाज के एक हींसा में दरवाजा रखियो; और जहाज में पैलो, दूसरो, तीसरो खंड बनाईयो।

¹⁷ सुन मैं खुद पृथ्‍वी पै जल-प्रलय करके सबरे प्राणियों हों, जिनमें जीवन की सांस आय, आकास के तरें सें नास करबे पै आंव; और सबरे जो पृथ्‍वी पै आंय मर जैहें।

¹⁸ परन्‍त तोरे संगै बाचा बांधत आंव; ई लाने तें अपने मोंड़ों, घरवारी और बहुओं समेंत जहाज में चलो जईयो।

¹⁹ सबरे जियत प्राणियों में सें, तें एक-एक जात के दो-दो, मतलब एक नर और एक मादा जहाज में लै जाकें, अपने संगै जियत रखियो।

²⁰ एक-एक जाति के पक्‍छी, और एक-एक जाति के पसु, और एक-एक जाति के धरती पै रेंगबेवारे, सब में सें दो दो तोरे लिगां आहें, कि तें उनहों जियत रखे।

²¹ भांत-भांत के खाबे कौ सामान जो खाओ जात आय, उनहों तें लैकें अपने लिगां इकट्ठो करकें रखियो; जो तोरे और उनके खाबे के लाने हुईये।”

²² यहोवा परमेसुर के ई हुकम के अनसार नूह ने करो।