- उत्पत्ति 50 - Bundeli Holy Bible

¹ तब यूसुफ अपने बाप सें लिपटकें रोओ और ऊहों चूमो।

² यूसुफ ने उन बैद्यों हों, जो ऊके सेवक हते, हुकम दओ कि ऊके बाप की लास पै खुसबूदार लेप करो जाए। तब बैद्यों ने इस्राएल की लास पै खुसबूदार लेप कर दओ।

³ ईमें चालीस दिना लगे, कायसे जिनकी लास में खुसबूदार लेप करो जात आय; उनहों पूरे इतनई दिना लगत आंय और मिस्री मान्‍सन ऊके लाने सत्तर दिना लौ बिलाप करत रए।

⁴ जब ऊके बिलाप के दिना बीत गए, तब यूसुफ राजा फिरौन के घराने के मान्‍सन सें कैन लगो, “जदि तुमाई किरपादृस्‍टि मोए पै होए तौ मोरी जा बिनती फिरौन हों सुनाओ,

⁵ मोरे बाप ने जौ कहकें, ‘हेर, मैं तो मरबे पै आंव’, मोहों जा कौल दई, ‘जो कबर मैंने अपने लाने कनान देस में खुदवाई आय ओई में तें मोहों माटी दईयो।’ ई लाने अब मोहों उतै जाकें अपने बाप हों माटी दैबे कौ हुकम दे, जीके बाद में लौट आहों।”

⁶ तब फिरौन ने कई, “जाकें अपने बाप की खिलाई भई कौल के अनसार ऊहों माटी दे।”

⁷ ई लाने यूसुफ अपने बाप हों माटी दैबे के लाने चलो, और फिरौन के सबरे करमचारी मतलब ऊके भवन के पुरनिये और मिस्र देस के सबरे पुरनिये भी ऊके संगै चले,

⁸ और यूसुफ के घर के सबरे मान्‍सन और ऊके भईया और ऊके बाप के घर के सबरे मान्‍सन भी संगै गए; परन्‍त बे अपने बाल-बच्‍चों, गाड़र-छिरियों, गईया-बैलों हों गीशोन देस में छोड़ गए।

⁹ ऊके संगै रथ और सवार गए, ईसें भीड़ मुतकी हो गई।

¹⁰ जब बे आताद के खलहान लौ, जो यरदन नदिया के पार आय, पोंचे, तब उतै बेजा बिलाप करो और यूसुफ ने अपने बाप के लाने सात दिना कौ बिलाप कराओ।

¹¹ आताद के खलहान में के बिलाप हों हेरकें ऊ देस के रैबेवारे कनानियों ने कई, “जौ तौ मिस्रियों कौ कोऊ भारी बिलाप आय।” ऐई कारन ऊ जागां कौ नाओं आबेल-मिस्रेम पड़ो, और ऊ यरदन के पार आय।

¹² इस्राएल के मोंड़ों ने ठीक ओई काम करो, जीकौ ऊने उनहों हुकम दओ हतो।

¹³ मतलब उनोंरन ने ऊहों कनान देस लै जाकें मकपेला की ऊ जमीनवारी गुफा में, जो मम्रे के सामूं आय, माटी दई; जीहों अब्राहम ने हित्ती एप्रोन के हाथ सें ई लाने खरीद लई हती कि बा कब्रिस्‍तान के लाने ऊकी निजी जमीन होए।

यूसुफ कौ अपने भईयों हों आस्‍वासन देबो

¹⁴ अपने बाप हों माटी दैकें यूसुफ अपने भईयों और उन सब के समेंत, जो ऊके बाप हों माटी दैबे के लाने ऊके संगै गए हते, मिस्र लौट आओ।

¹⁵ जब यूसुफ के भईयों ने हेरो कि हमाओ बाप मर गओ आय, तब कैन लगे, “एैसो तौ नईं कि यूसुफ अब हमाए पाछें पड़े, और जितेक बुराई हमने ऊसें करी हती सब कौ पूरो बदला हम सें ले।”

¹⁶ ई लाने उनोंरन ने यूसुफ के लिगां जौ कहला पठैव, “तोरे बाप ने मरबे के पैलां हमें जौ हुकम दओ हतो,

¹⁷ ‘तुमोंरें यूसुफ सें ई तरहां कईयो, कि हम बिनती करत आंय कि तें अपने भईयों के अपराध और पाप हों छमा कर; हमने तोरे संगै बुरओ करो हतो, परन्‍त अब अपने बाप के यहोवा परमेसुर के दासों कौ अपराध छमा कर’।” उनकी जे बातें सुनकें यूसुफ रो पड़ो।

¹⁸ ऊके भईया खुद भी जाकें ऊके सामूं गिर पड़े, और कई, “हेर, हम तोरे दास आंय।”

¹⁹ यूसुफ ने उनसें कई, “नें डरो, का मैं यहोवा परमेसुर की जागां पै आंव?

²⁰ जबकि तुमोंरों ने मोरे लाने बुराई कौ बिचार करो हतो; परन्‍त यहोवा परमेसुर ने ओई बात में भलाई कौ बिचार करो, जीसें ऊ एैसो करे, जैसो आज के दिना परगट आय, कि मुतके मान्‍सन के प्रान बचे आंय।

²¹ ई लाने अब नें डरो; मैं तुमाओ और तुमाए बाल-बच्‍चों हों पालत-पोसत रैहों।” ई तरहां ऊने उनहों समझा बुझाकें सान्‍ति दई।

यूसुफ की मौत

²² यूसुफ अपने बाप के घराने समेंत मिस्र में रओ, और यूसुफ एक सौ दस साल लौ जियत रओ।

²³ यूसुफ एप्रैम के परपोतों हों हेर पाओ; और मनश्‍शे के पोते, जो माकीर के मोंड़ा हते, बे पैदा भए और यूसुफ ने उनहों गोद में लओ।

²⁴ यूसुफ ने अपने भईयों सें कई, “मैं तौ मरबे पै आंव; परन्‍त यहोवा परमेसुर पक्‍कौ तुमाई सुध लैहै, और तुमहों ई देस सें काड़कें ऊ देस में पोंचा दैहै, जीके दैबे की ऊने अब्राहम, इसहाक और याकूब सें कौल खाई हती।”

²⁵ फिन यूसुफ ने इस्राएलियन सें जौ कहकें कि यहोवा परमेसुर पक्‍कौ तुमाई सुध लैहै, उनहों ई बारे में कौल खिलाई, “हम तोरे हाड़ों हों इतै सें ऊ देस में लै जैहें।”

²⁶ ई तरहां यूसुफ एक सौ दस साल कौ होकें मर गओ; और ऊकी लास में खुसबूवारे लेप करे गए, और ऊकी लास हों मिस्र में एक बक्‍सा में रखो गओ।