- उत्पत्ति 44 - Bundeli Holy Bible

चांदी कौ कटोरा

¹ तब ऊने अपने घर के अधकारी हों हुकम दओ, “इन मान्‍सन के बोरों में जितेक भोजनबस्‍त भर सकें उतेक भर देओ, और एक-एक जन के रुपईया हों बोरों के मों पै रख देओ;

² और मोरो चांदी कौ कटोरा लौरे मोंड़ा बिन्‍यामीन के बोरे के मों पै ऊके अन्‍न के रुपईया के संगै रख देओ।” यूसुफ के ई हुकम अनसार ऊने करो।

³ भुन्‍सारे होतई बे मान्‍स अपने गधों समेंत बिदा करे गए।

⁴ बे नगर सें कड़ेई हते और दूर नें जा पाए हते कि यूसुफ ने अपने घर के अधकारी सें कई, “उन मान्‍सन कौ पीछा कर, और उनहों पाकें उनसें कईयो, ‘तुमने भलाई के बदले बुरओ काए करो आय?

⁵ का जा बा बस्‍त नईंया जीमें मोरो मालक पियत आय, और जीसें ऊ सकुन सोई बिचारत आय? तुमने जो करो आय, ऊ बुरओ करो’।”

⁶ तब ऊने उनहों जा पकड़ो, और एैसई बातें उनसें कईं।

⁷ उनोंरन ने ऊसें कई, “हे हमाए पिरभु, तें एैसी बातें काए कैत आय? एैसो काम करबो तोरे दासों सें दूर रए।

⁸ हेर, जो रुपईया हमाए बोरों के मों पै कड़ो हतो, जब हमने ऊहों कनान देस सें ल्‍याकें तोहों लौटा दओ, तब भला, तोरे मालक के घर में सें हम कोऊ चांदी या सोने की बस्‍त कैसे चुरा सकत आंय?

⁹ तोरे दासों में सें जो कोऊ के लिगां ऊ कड़े, ऊ मार डालो जाए, और हम भी अपने ऊ पिरभु के बंधुआ हो जाएं।”

¹⁰ ऊने कई, “तुमाओ कैबो सई आय, जीके लिगां ऊ कड़े ऊ मोरो बंधुआ हुईये, और तुमोंरें निरदोस ठैरहौ।”

¹¹ ईपै बे जल्‍दी सें अपने-अपने बोरे हों उतारकें जमीन पै रखकें उनहों खोलन लगे।

¹² तब ऊ ढूंढ़न लगो, और बड़े बोरा सें लैकें छोटे बोरा लौ खोज डालो; और कटोरा बिन्‍यामीन के बोरा में मिलो।

¹³ तब उनोंरन ने अपने उन्‍ना फाड़े, और अपने-अपने गधा लादकें नगर हों लौट गए।

¹⁴ जब यहूदा और ऊके भईया यूसुफ के घरै पोंचे, और यूसुफ उतईं हतो, तब बे ऊके सामूं जमीन पै गिरे।

¹⁵ यूसुफ ने उनसें कई, “तुमोंरन ने जौ कैसो काम करो आय? का तुम नें जानत हते, कि मोरे जैसो मान्‍स शकुन बिचार सकत आय?”

¹⁶ यहूदा ने कई, “हमोंरें अपने पिरभु सें का कएं? हम का कहकें अपने हों निरदोस ठैराएं? यहोवा परमेसुर ने तोरे बंधुओं के अधरम हों पकड़ लओ आय; हम, और जीकें लिगां कटोरा कड़ो ऊ भी, हम सब के सब अपने पिरभु के बंधुआ आंय।”

¹⁷ ऊने कई, “एैसो करबो मोए सें दूर रए, जौन के लिगां कटोरा कड़ो आय ओई मोरो बंधुआ हुईये; और तुमोंरें अपने बाप के लिगां सान्ति सें चले जाओ।”

बिन्‍यामीन के लाने यहूदा कौ निवेदन

¹⁸ तब यहूदा, यूसुफ के लिगां जाकें कैन लगो, “हे मोरे पिरभु, तोरे दास हों पिरभु सें एक बात कैबे कौ हुकम होए, और तोरो गुस्‍सा तोरे दास पै नें भड़के; कायसे तें तौ राजा फिरौन के बरोबर आय।

¹⁹ मोरे पिरभु ने अपने सेवकों सें पूंछो हतो, ‘का तुमाओ बाप या भईया आय?’

²⁰ हमने अपने पिरभु सें कई, ‘हओ, हमाओ बूढ़ो बाप आय, और ऊके बुढ़ापे कौ एक छोटो सो मोंड़ा भी आय, परन्‍त ऊकौ भईया मर गओ आय, ई लाने ऊ अब अपनी मताई कौ अकेलोई रै गओ आय, और ऊकौ बाप ऊसें प्रेम करत आय।’

²¹ तब तेंने अपने दासों सें कई हती, ‘ऊहों मोरे लिगां ल्‍याओ, जीसें मैं ऊहों हेरों।’

²² तब हमने अपने पिरभु सें कई हती, ‘ऊ मोंड़ा अपने बाप हों नईं छोड़ सकत; नईं तौ ऊकौ बाप मर जैहै।’

²³ तेंने अपने दासों सें कई, ‘जदि तुमाओ लौरो भईया तुमाए संगै नें आए, तौ तुम मोरे सामूं फिन नें आ पाहौ।’

²⁴ ई लाने जब हम अपने बाप तोरे दास के लिगां गए, तब हमने ऊसें अपने पिरभु की बातें कईं।

²⁵ तब हमाए बाप ने कई, ‘फिन जाकें हमाए लाने तनक सी भोजनबस्‍त खरीद ल्‍याओ।’

²⁶ हमने कई, ‘हम नईं जा सकत, हओ, जदि हमाओ लौरो भईया हमाए संगै रए, तब हम जैहें; कायसे जदि हमाओ लौरो भईया हमाए संगै नें रए, तौ हम ऊ मान्‍स के सामूं नें जा पाहें।’

²⁷ तब तोरे दास मोरे बाप ने हमसें कई, ‘तुम तौ जानत आव कि मोरी बईयर सें दो मोंड़ा पैदा भए।

²⁸ उनमें सें एक तौ मोंड़ा मोहों छोड़ई गओ, और मैंने पक्‍कौ कर लओ कि ऊ फाड़ डालो गओ हुईये; और तब सें मैं ऊकौ मों नईं हेर पाओ।

²⁹ सो जदि तुम बिन्‍यामीन हों भी मोरी आंखों के सामूं सें लै जाओ, और कोऊ बिपदा ईपै पड़े, तौ तुमाए कारन मैं ई बुढ़ापे की दसा में दुख के संगै अधोलोक में चलो जैहों।’

³⁰ ई लाने जब मैं अपने बाप तोरे दास के लिगां पोंचहों और जौ मोंड़ा संगै नें रए, ऊकौ प्रान जौन ऐई पै अटको रैत आय,

³¹ ई कारन, जौ हेरकें कि मोंड़ा हमाए संगै नईंया, ऊ तुरतईं मर जैहै। तब तोरे दासों के कारन तोरो दास हमाओ बाप, जो बुढ़ापे की दसा में आय, सोक के संगै अधोलोक में चलो जैहै।

³² फिन तोरो दास अपने बाप के इतै जौ कहकें ई मोंड़ा कौ जमानतदार भओ आय, ‘जदि मैं ईहों तोरे लिगां नें पोंचा देओं, तौ मैं हमेसा के लाने तोरो अपराधी ठैरहों।’

³³ ई लाने अब तोरो दास ई मोंड़ा की जागां अपने पिरभु कौ बंधुआ होकें रैबे कौ हुकम पाए, और जौ मोंड़ा अपने भईयों के संगै जाबे दओ जाए।

³⁴ कायसे मोंड़ा के बगैर संगै रए मैं कैसे अपने बाप के लिगां जा पाहों; एैसो नें होए कि मोरे बाप पै जो दुख पड़है ऊ मोहों हेरने पड़ै।”