- उत्पत्ति 34 - Bundeli Holy Bible

दीना हों भ्रस्‍ट करो जाबो

¹ एक दिना लिआ की मोंड़ी दीना, जो याकूब सें पैदा भई हती, ऊ देस की मोंड़ियों सें मिलबे के लाने कड़ी।

² तब ऊ देस के परधान हित्‍वी हमोर के मोंड़ा शकेम ने ऊहों तको, और ऊहों लै जाकें ऊके संगै कुकर्म करके ऊहों भ्रस्‍ट कर दओ।

³ तब ऊकौ मन याकूब की मोंड़ी दीना सें लग गओ, और ऊने ऊ मोंड़ी सें प्रेम भरी बातें करीं, और ऊहों चाहन लगो।

⁴ तब शकेम ने अपने बाप हमोर सें कई, “मोहों ई मोंड़ी हों मोरी बईयर होबे के लाने दिला दे।”

⁵ याकूब ने सुनो कि शकेम ने मोरी मोंड़ी दीना हों असुद्ध कर डालो आय; परन्‍त ऊके मोंड़ा ऊ बेरा पसुओं के संगै मैंदना में हते, ई लाने ऊ उनके आबे लौ चुप रओ।

⁶ तब शकेम कौ बाप हमोर कड़कें याकूब सें बातचीत करबे के लाने ऊके लिगां गओ।

⁷ याकूब के मोंड़ा जौ सुनतई मैंदना सें बिलात दुखी और गुस्‍सा होकें आए; कायसे शकेम ने याकूब की मोंड़ी के संगै कुकर्म करके इस्राएल के घराने सें घिनौनो काम करो हतो, जीकौ करबो बेजा खराब हतो।

⁸ हमोर ने उन सब सें कई, “मोरे मोंड़ा शकेम कौ मन तुमाई मोंड़ी सें बहुत लगो आय, ई लाने ऊकी बईयर होबे के लाने ऊहों दै देओ।

⁹ हम आपस में ब्‍याव करत रएं। अपनी मोंड़ियां हमें दए करो और हमाई मोंड़ियां अपने लाने लए करो।

¹⁰ हमाए संगै बसे रओ; और जौ देस तुमाए सामूं पड़ो आय; ईमें रहकें लेन-देन करो, और इतै की जमीन हों अपने लाने ले लेओ।”

¹¹ शकेम ने भी दीना के बाप और भईयों सें कई, “जदि मोए पै तुमोंरन की किरपादृस्‍टि होए, तौ जो कछु तुम मोए सें कओ, ऊ मैं दैहों।

¹² तुम मोए सें कितनी भी कीमत या भेंट काए नें मांगो, तब भी मैं तुमाए कए अनसार दैहों; परन्‍त बा मोंड़ी हों बईयर होबे के लाने मोहों देओ।”

¹³ तब जौ सोचकें कि शकेम ने हमाई बहन दीना हों असुद्ध करो आय, याकूब के मोंड़ों ने शकेम और ऊके बाप हमोर हों छल के संगै जौ जवाब दओ,

¹⁴ “हम एैसो काम नईं कर सकत कि कौनऊं मान्‍स जीकौ खतना नईं भओ होए अपनी बहन दें, कायसे ईसें हमाई नाओंधराई हुईये;

¹⁵ ई बात पै तौ हम तुमोंरन से सहमत हो जैहें कि हमाए जैसे तुमोंरों में सें हर एक मान्‍स कौ खतना करो जाए;

¹⁶ तब हम अपनी मोंड़ियां तुम हों ब्‍याह दैहें, और तुमाई मोंड़ियां ब्‍याह लैहें, और तुमाए संगै बसे सोई रैहें, और हम दोई एकई जाति के हो जैहें;

¹⁷ परन्‍त जदि तुम हमाई बात नें मानकें अपनो खतना नें कराहौ, तौ हम अपनी मोंड़ी हों लैकें इतै सें चले जैहें।”

¹⁸ उनकी ई बात पै हमोर और ऊकौ मोंड़ा शकेम खुस भए।

¹⁹ ऊ जवान जो याकूब की मोंड़ी हों बेजा चाहत हतो, ई काम हों करबे में ऊने देर नें करी। ऊ अपने बाप के सबरे घराने में बहुतई प्रसिद्ध हतो।

²⁰ ई लाने हमोर और ऊकौ मोंड़ा शकेम अपने नगर के फाटक के लिगां जाकें नगर के रैबेवारों हों समझान लगे,

²¹ “बे मान्‍सन हमाए संगै मिलकें रैबो चाहत आंय; सो उनहों ई देस में रहकें लेन-देन करन देओ; हेरो; जौ देस भी उनके लाने बहुत आय; फिन हमोंरें उनकी मोंड़ियों हों ब्‍याह लें, और अपनी मोंड़ियां उनहों दओ करें।

²² बे मान्‍सन केवल ई बात पै हमाए संगै रैबे और एकई जाति के मान्‍स हो जाबे हों खुस आंय कि उनके जैसे हमाए सबरे मान्‍सन कौ भी खतना करो जाए।

²³ का उनकी गाड़र-छिरियां, और गईया-बैला बल्‍कि उनके सबरे पसु और धन-सम्‍पत्ति हमाई नें हो जैहै? इतनई करें कि हमोंरें उनकी बात मान लें, तौ बे हमाए संगै रैहें।”

²⁴ ई लाने जितेक ऊ नगर के फाटक सें कड़त हते, उन सभई ने हमोर की और ऊके मोंड़ा शकेम की बात मान लई; और जितेक ऊ नगर के फाटक सें कड़त हते, हरेक मान्‍स कौ खतना करो गओ।

²⁵ तीसरे दिना, जब बे औरें पीड़ा में डले हते, तब एैसो भओ कि शिमोन और लेवी नाओं याकूब के दो मोंड़ों ने, जो दीना के भईया हते, अपनी-अपनी तलवार लैकें ऊ नगर में अचानक पिड़कें सबरे मान्‍सन हों मार दओ।

²⁶ हमोर और ऊके मोंड़ा शकेम हों उनोंरन ने तलवार सें मार डालो, और दीना हों शकेम के घर सें काड़ लै गए।

²⁷ याकूब के मोंड़ों ने मार डालबे के पछारें नगर हों ई लाने लूट लओ कि ऊमें उनकी बहन असुद्ध करी गई हती।

²⁸ उनोंरन ने गाड़र-छिरियां, गईया-बैला, गदहे और नगर और मैंदना में जितेक धन हतो लूट लओ।

²⁹ ऊ सब हों, और उनके मोंड़ा-मोंड़ियों, और बईयरों हों भी जबरईं लै गए, बल्‍कि घर-घर में भी जो कछु हतो ऊहों भी उनोंरन ने लूट लओ।

³⁰ तब याकूब ने शिमोन और लेवी सें कई, “तुमने जो ई देस के रैबेवारे कनानियों और परिज्‍जियों के मन में मोरे लाने घिरना पैदा कराई आय, ईसें तुमने मोहों मुसीबत में डालो आय, कायसे मोरे संगै तौ तनकई मान्‍सन आंय; ई लाने अब बे सबरे इकट्ठे होकें मोए पै चढ़ाई करहें, और मोहों मार डालहें, तौ मैं अपने घराने समेंत नास हो जैहों।”

³¹ उनोंरन ने कई, “का ऊ हमाई बहन के संगै बेस्‍या जैसो ब्‍योहार करे?”