- उत्पत्ति 33 - Bundeli Holy Bible

याकूब और एसाव कौ मिलन

¹ याकूब ने आंखें उठाकें जौ हेरो कि एसाव चार सौ मान्‍सन हों संगै लएं भए चलो आत आय। तब ऊने बच्‍चों हों अलग-अलग बांटकें लिआ, राहेल और दोई दासियों हों सौंप दओ।

² ऊने सब सें आंगू मोंड़ों समेंत दासियों हों, उनके पाछें बच्‍चों समेंत लिआ हों और सबके पाछें राहेल और यूसुफ हों रखो,

³ और खुद उन सबके आंगू बढ़ो और सात बेर जमीन पै गिरकें दंडवत करो, और अपने भईया लौ पोंचो।

⁴ तब एसाव ने ऊसें मिलबे के लाने गदबद लगाई, और ऊहों हिया सें लगाकें, गले सें लिपटकें चूमो; फिन बे दोई रौन लगे।

⁵ तब ऊने आंखें उठाकें बईयरों और बच्‍चों हों तको; और पूंछी, “जे जौन तोरे संगै आंय बे को आंय?” ऊने कई, “जे तोरे दास के बच्चा आंय, जिनहों यहोवा परमेसुर ने किरपा करके मोए हों दओ आय।”

⁶ तब बच्‍चों समेंत दासियों ने लिगां आकें दंडवत करो;

⁷ फिन बच्‍चों समेंत लिआ लिगां आई और उनोंरन ने भी दंडवत करो; अन्‍त में यूसुफ और राहेल ने भी लिगां आकें दंडवत करो।

⁸ तब ऊने पूंछो, “तोरो जौ बड़ो दल जो मोहों मिलो, ऊकौ का काम आय?” ऊने कई, “जौ कि मोरे पिरभु की किरपादृस्‍टि मोए पै होए।”

⁹ एसाव ने कई, “हे मोरे भईया, मोरे लिगां तौ मुतकौ आय; जो कछु तोरो आय ऊ तोरोई रए।”

¹⁰ याकूब ने कई, “नईं-नईं, जदि तोरी किरपा मोए पै होए, तौ मोरी भेंट स्‍वीकार कर; कायसे मैंने तोरो मों हेरकें, मानो यहोवा परमेसुर कौ दरसन पाओ आय, और तें मोए सें खुस भओ आय।

¹¹ ई लाने जा भेंट जो तोहों पठैय गई आय, स्‍वीकार कर; कायसे यहोवा परमेसुर ने मोए पै किरपा करी आय, और मोरे लिगां मुतकौ आय।” जब ऊने ऊसें बेजा बिनती करी, तब ऊने भेंट हों स्‍वीकार करो।

¹² फिन एसाव ने कई, “आओ, हम बढ़ चलें; और मैं तोरे आंगू-आंगू चलहों।”

¹³ याकूब ने कई, “हे मोरे पिरभु, तें जानतई आय कि मोरे संगै छोटे-छोटे बच्चे, और दूध दैबेवारी गाड़र-छिरियां और गईयां आंय; जदि एैसे पसु एक दिना भी और हांक दए जाएं, तौ सबके सब मर जैहें।

¹⁴ ई लाने मोरे पिरभु अपने दास के आंगू बढ़ जाए, और मैं इन पसुओं की चाल के अनसार जो मोरे आंगू आंय, और बच्‍चों की चाल के अनसार हरंय-हरंय निंगकें सेईर में अपने पिरभु के लिगां पोंचहों।”

¹⁵ एसाव ने कई, “तौ अपने संगियन में सें मैं कछु हों तोरे संगै छोड़ जाओं।” ऊने कई, “जौ काए? इतनईं खीब आय कि मोरे पिरभु की किरपादृस्‍टि मोए पै बनी रए।”

¹⁶ तब एसाव ने ओई दिना सेईर जाबे हों अपनी गैल लई।

¹⁷ परन्‍त याकूब उतै सें कड़कें सुक्‍कोत हों गओ, और उतै अपने लाने एक घर, और पसुओं के लाने झोपड़े बनाए। ऐई कारन ऊ जागां कौ नाओं सुक्‍कोत पड़ो।

¹⁸ याकूब जो पद्दन-अराम सें आओ हतो, ऊने कनान देस के शकेम नगर के लिगां कुसल सें पोंचकें नगर के सामूं डेरे ठांड़े करे।

¹⁹ जमीन के जी हींसा पै ऊने अपनो तम्‍बू ठांड़ो करो, ऊहों ऊने शकेम के बाप हमोर के मोंड़ों के हाथ सें एक सौ चांदी के सिक्कों में खरीद लओ।

²⁰ उतै ऊने एक बेदी बनाकें ऊकौ नाओं एल-एलोहे-इस्राएल रखो।