- उत्पत्ति 32 - Bundeli Holy Bible

एसाव सें मिलबे की तईयारी

¹ याकूब ने भी अपनी गैल लई और यहोवा परमेसुर के दूत ऊहों दिखे।

² उनहों हेरतई याकूब ने कई, “जा तौ यहोवा परमेसुर की छावनी आय।” ई लाने ऊने ऊ जागां कौ नाओं महनैम रखो।

³ तब याकूब ने सेईर देस में, मतलब एदोम देस में, अपने भईया एसाव के लिगां अपने आगूं दूत पठै दए,

⁴ और ऊने उनहों जौ हुकम दओ, “मोरे पिरभु एसाव सें एैसो कहियो: ‘तोरो दास याकूब तोए सें एैसो कैत आय कि मैं लाबान के इतै अबै लौ परदेसी होकें रओ;

⁵ और मोरे लिगां गईया-बैला, गदहे, गाड़र-छिरियां, दास-दासियां आंय: और मैंने अपने पिरभु के लिगां ई लाने सन्‍देसो पठैव आय कि तोरी किरपा की नजर मोए पै होए’।”

⁶ बे दूत याकूब के लिगां लौटकें कैन लगे, “हम तोरे भईया एसाव के लिगां गए हते, और ऊ भी तोए सें मिलबे हों चार सौ मान्‍सन हों संगै लएं भए चलो आत आय।”

⁷ तब याकूब बेजा डर गओ, और मुसीबत में पड़ो; और जौ सोचकें अपने संगियन के, और गाड़र-छिरियों, और गईया-बैला, और ऊंट की भी अलग अलग दो टोली कर लईं,

⁸ कि जदि एसाव आकें पैली टोली हों मारन लगे, तौ दूसरी टोली गदबद दैकें बच जैहै।

⁹ फिन याकूब ने कई, “हे यहोवा परमेसुर, हे मोरे दादा अब्राहम के परमेसुर, हे मोरे बाप इसहाक के परमेसुर, तेंने तौ मोए सें कओ हतो कि अपने देस और कुटम्बियों में लौट जा, और मैं तोरो भलो करहों।

¹⁰ तेंने जो-जो काम अपनी दया और सच्‍चाई सें अपने दास के संगै करे आंय, कि मैं जो अपनी लठिया हों लैकें ई यरदन नदिया के पार उतर आओ, और अब मोरी दो टोली हो गई आंय; तोरे एैसे-एैसे कामों में सें मैं एक के भी जोग तौ नईं आंव।

¹¹ मोरी बिनती सुनकें मोहों मोरे भईया एसाव के हाथ सें बचा; मैं तौ ऊसें डरत आंव, कहूं एैसो नें होए कि ऊ आकें मोहों और मताई समेंत बच्‍चों हों भी मार डाले।

¹² तेंने तौ कओ हतो, ‘मैं पक्‍कौ तोरो भलो करहों, और तोरे बंस हों समंदर की रेत के किनकों के जैसो मुतको करहों, जो मुतके हो जाबे सें गिने नईं जा सकत’।”

¹³ सो ऊने रात उतईं बिताई; और जो कछु ऊके लिगां हतो ऊमें सें अपने भईया एसाव हों भेंट के लाने छांट-छांटकें काड़ो;

¹⁴ मतलब दो सौ छिरियां, बीस बुकरा, दो सौ गाड़रें और बीस मेंढ़ा,

¹⁵ और बच्‍चों समेंत दूध दैबेवारी तीस ऊंटनियां, चालीस गईयां, दस बैला, बीस गदईयां और दस गधा।

¹⁶ इनहों ऊने झुंड-झुंड करके, अपने दासों हों सौंपकें उनसें कई, “मोरे आंगू कड़ जाओ; और झुंड़ों के मजारें-मजारें में फासला रखो।”

¹⁷ फिन ऊने पैले झुंड के रखनवारे हों जौ हुकम दओ, “जब मोरो भईया एसाव तोहों मिले, और पूंछन लगे, ‘तें कौन कौ दास आय, और कितै जात आय, और जे जौन तोरे आंगू-आंगू आंय, बे कौन के आंय?’

¹⁸ तब कईयो, ‘जे तोरे दास याकूब के आंय। हे मोरे पिरभु एसाव, जे भेंट के लाने तोरे लिगां पठैय गए आंय, और ऊ खुदई हमाए पाछें-पाछें आ रओ आय’।”

¹⁹ ऊने दूसरे और तीसरे रखनवारों हों भी, बल्‍कि उन सबई हों जो झुंड़ों के पाछें-पाछें हते एैसई हुकम दओ कि जब एसाव तुमहों मिले तब ऐई तरहां सें कईयो।

²⁰ जौ भी कईयो, “तोरो दास याकूब हमाए पाछें-पाछें आ रओ आय।” कायसे ऊने जौ सोचो कि जा भेंट जो मोरे आंगू-आंगू जात आय, ईके द्वारा मैं ऊके गुस्‍सा हों ठंड़ो करके तब ऊकौ दरसन करहों; हो सकत आय ऊ मोए सें खुस हो जाए।

²¹ ई लाने ऊ भेंट याकूब सें पैलां पार उतर गई, और ऊ खुद बा रात हों छावनी में रओ।

याकूब कौ मल्‍लयुद्ध

²² ओई रात ऊ उठो और अपनी दोई बईयरों, और दोई दासियों और ग्‍यारह मोंड़ों हों संगै लैकें घाट सें यब्‍बोक नदिया के पार उतर गओ।

²³ ऊने उनहों ऊ नदिया के पार उतार दओ, बल्‍कि अपनो सब कछु पार उतार दओ।

²⁴ याकूब खुद अकेलो रै गओ; तब कोऊ मान्‍स आकें भुन्‍सारे होबे लौ ऊसें कुस्‍ती लड़त रओ।

²⁵ जब ऊनें हेरो कि मैं याकूब पै हावी नईं हो पाहों, तब ऊकी जांघ की नस हों ऐंच दओ, ईसें याकूब की जांघ की नस कुस्‍ती लड़तई लड़त चढ़ गई।

²⁶ तब ऊने कई, “मोहों जान दे, कायसे भुन्‍सारो होबेवारो आय,” याकूब ने कई, “जब लौ तें मोहों आसीरवाद नें दैहै, तब लौ मैं तोहों जाबे नें दैहों।”

²⁷ ऊने याकूब सें पूंछो, “तोरो नाओं का आय?” ऊने कई, “याकूब।”

²⁸ ऊने कई, “तोरो नाओं अब सें याकूब नईं, परन्‍त इस्राएल हुईये, कायसे तें यहोवा परमेसुर सें और मान्‍सन सें भी लड़कें प्रबल भओ आय।”

²⁹ याकूब ने कई, “मैं बिनती करत आंव, मोहों अपनो नाओं बता।” ऊने कई, “तें मोरो नाओं काए पूंछत आय?” तब ऊने ऊहों उतईं आसीरवाद दओ।

³⁰ तब याकूब ने जौ कहकें ऊ जागां कौ नाओं पनीएल रखो; “यहोवा परमेसुर हों आमूं-सामूं हेरबे पै भी मोरो प्रान बच गओ आय।”

³¹ पनीएल के लिगां सें निंगत-निंगत सूरज कड़ गओ, और ऊ जांघ सें लंगड़ात हतो।

³² इस्राएली जो पसुओं की जांघ हों जोड़बेवारी जंघानस हों आज के दिना लौ नईं खात, ईकौ कारन जौई आय कि ऊ मान्‍स ने याकूब की जांघ के जोड़ में जंघानस हों छुओ हतो।