- उत्पत्ति 26 - Bundeli Holy Bible

इसहाक कौ गरार में निवास

¹ ऊ देस में अकाल पड़ो, जौ ऊ पैलां अकाल सें अलग हतो जो अब्राहम के दिनन में पड़ो हतो। ई लाने इसहाक गरार हों पलिश्‍तियों के राजा अबीमेलेक के लिगां गओ।

² उतै यहोवा परमेसुर ने ऊहों दरसन दैकें कई, “मिस्र में नें जा; जो देस मैं तोहों बताओं ओई में रै।

³ तें ऐई देस में परदेसी होकें रै, और मैं तोरे संगै रैहों, और तोहों आसीस दैहों; और जे सब देस मैं तोए हों और तोरे बंस हों दैहों; और जो कौल मैंने तोरे बाप अब्राहम सें खाई हती, ऊहों मैं पूरी करहों।

⁴ मैं तोरे बंस हों आकास के तारागण के जैसो करहों; और मैं तोरे बंस हों जे सब देस दैहों, और पृथ्‍वी की पूरी जातियन तोरे बंस के कारन अपने हों धन्‍य मानहें।

⁵ कायसे अब्राहम ने मोरी मानी, और जो मैंने ऊहों सौंपो हतो ऊहों और मोरे हुकमों, बिधियों और ब्‍यावस्था कौ पालन करो।”

⁶ ई लाने इसहाक गरार में रै गओ।

⁷ जब ऊ जागां के मान्‍सन ने ऊकी बईयर के बारे में पूंछो, तब ऊने जौ सोचकें कि जदि मैं ऊहों अपनी बईयर कहों तौ इतै के मान्‍स रिबका के कारन जो बहुतई सुन्‍दर आय मोए हों मार डालहें, ऊने जवाब दओ, “बा तौ मोरी बहन आय।”

⁸ जब ऊहों उतै रैत भए मुतके दिना हो गए, तब एक दिना पलिश्‍तियों के राजा अबीमेलेक ने जंगला में सें झांककें का हेरो कि इसहाक अपनी बईयर रिबका के संगै प्रेम कर रओ आय।

⁹ तब अबीमेलेक ने इसहाक हों टिरवाकें कई, “बा तौ पक्‍कौ तोरी बईयर आय; फिन तेंने काए ऊहों अपनी बहन कओ?” इसहाक ने जवाब दओ, “मैंने सोचो हतो कि एैसो नें होए कि ऊके कारन मैं मर जाओं।”

¹⁰ अबीमेलेक ने कई, “तेंने हम सें जौ का करो? एैसे तौ परजा में सें कोऊ तोरी बईयर के संगै आसानी सें कुकर्म कर सकत, और तें हमें पाप में फसात।”

¹¹ ई लाने अबीमेलेक ने अपनी पूरी परजा हों हुकम दओ, “जो कोऊ ऊ मान्‍स हों या ऊ बईयर हों छूहै, ऊ पक्‍कौ मार डालो जैहै।”

¹² फिन इसहाक ने ऊ देस में धरती जोती-बोई, और ओई साल में सौ गुना फल पाओ; कायसे यहोवा परमेसुर ने ऊहों आसीस दई,

¹³ और ऊ बढ़ो और ऊकी बढ़ती होत गई, इतै लौ कि ऊ बेजा पईसावारो मान्‍स हो गओ।

¹⁴ जब ऊके गाड़र-छिरियां, गईया-बैला और मुतके दास-दासियां भए; तब पलिश्‍ती ऊसें जलन लगे।

¹⁵ ई लाने जितेक कुओं हों ऊके बाप अब्राहम के दासों ने अब्राहम के जियत भए खोदे हते, उनहों पलिश्‍तियों ने माटी सें मूंद दओ।

¹⁶ तब अबीमेलेक ने इसहाक सें कई, “हमाए लिगां सें चलो जा; कायसे तें हमसें बहुतई ताकतवारो हो गओ आय।”

¹⁷ सो इसहाक उतै सें चलो गओ, और गरार की घाटी में अपनो तम्‍बू ठांड़ो करके उतै रैन लगो।

¹⁸ तब जो कुआं ऊके बाप अब्राहम के दिनन में खोदे गए हते, और अब्राहम के मरबे के बाद पलिश्‍तियों ने मूंद दए हते, उनहों इसहाक ने फिन उघड़वाओ; और उनके बेई नाओं रखे, जो ऊके बाप ने रखे हते।

¹⁹ फिन इसहाक के दासों हों घाटी में खोदत-खोदत बहते पानूं कौ सोता मिलो।

²⁰ तब गरार के चरवाहों ने इसहाक के चरवाहों सें झगड़ा करो और कई, “जौ पानूं हमाओ आय।” ई लाने ऊने ओई कुआं कौ नाओं एसेक रखो; कायसे बे ऊसें झगड़े हते।

²¹ फिन उनोंरन ने दूसरो कुआं खोदो, और उनोंरन ने ऊके लाने भी झगड़ा करो; ई लाने ऊने ऊकौ नाओं सित्‍ना रखो।

²² तब ऊने उतै सें कड़कें एक और कुआं खुदवाओ; और ऊके लाने उनोंरन ने झगड़ा नें करो; ई लाने ऊने ऊकौ नाओं जौ कहकें रहोबोत रखो, “अब तौ यहोवा परमेसुर ने हमाए लाने मुतकी जागां दई आय, और हम ई देस में फलहें-फूलहें।”

²³ उतै सें ऊ बेशेर्बा हों गओ।

²⁴ ओई दिना यहोवा परमेसुर ने रात में ऊहों दरसन दैकें कई, “मैं तोरे बाप अब्राहम कौ यहोवा परमेसुर आंव; नें डर, कायसे मैं तोरे संगै आंव, और अपने दास अब्राहम के कारन तोहों आसीस दैहों, और तोरो बंस बढ़ाहों।”

²⁵ तब ऊने उतै एक बेदी बनाई, और यहोवा परमेसुर सें बिन्‍तवाई करी, और अपनो तम्‍बू उतईं ठांड़ो करो; और उतै इसहाक के दासों ने एक कुआं खोदो।

इसहाक और अबीमेलेक के मजारें सन्‍धि

²⁶ तब अबीमेलेक अपने मंत्री अहुज्‍जत और अपने सेनापति पीकोल हों संगै लैकें, गरार सें ऊके लिगां गओ।

²⁷ इसहाक ने उनसें कई, “तुमने मोए सें बैर करके अपने मजारें सें काड़ दओ हतो, अब मोरे लिगां कायहों आए आव?”

²⁸ उनोंरन ने कई, “हमने तौ अपने सामूं हेरो आय कि यहोवा परमेसुर तोरे संगै रैत आय; ई लाने हमने सोचो कि तें तौ यहोवा परमेसुर कुदाऊं सें धन्‍य आय, सो हमाए और तोरे मजारें कौल खाई जाए, और हम तोए सें ई बारे में बाचा बंधाएं,

²⁹ कि जैसे हमने तोहों नईं छुओ, बल्‍कि तोरे संगै हमेसा भलाई करी आय, और तोए हों सान्ति सें बिदा करो, ऊके अनसार तें भी हम सें कोऊ बुराई नें करहै।”

³⁰ तब ऊने उनहों जेवनार दई और उनोंरन ने खाओ-पिओ।

³¹ भुन्‍सारे उन सबई ने जल्‍दी उठकें आपस में कौल खाई; तब इसहाक ने उनहों बिदा करो, और बे राजी खुसी सें ऊके लिगां सें चले गए।

³² ओई दिना इसहाक के दासों ने आकें अपने ऊ खोदे गए कुआं कौ वृत्तांत सुनाकें कई, “हमें पानूं कौ एक सोता मिलो आय।”

³³ तब ऊने ऊकौ नाओं शिबा रखो; ऐई कारन ऊ नगर कौ नाओं आज लौ बेशेर्बा पड़ो आय।

एसाव की बिदेसी बईयरें

³⁴ जब एसाव चालीस साल कौ भओ, तब ऊने हित्ती बेरी की मोंड़ी यहूदीत, और हित्ती एलोन की मोंड़ी बासमत सें ब्‍याव कर लओ;

³⁵ और इन बईयरों के कारन इसहाक और रिबका दुखी भए।