- उत्पत्ति 23 - Bundeli Holy Bible

सारा की मौत और मिट्टी दैबे कौ बर्णन

¹ सारा एक सौ सत्ताईस साल की उमर लौ पोंची; और जब सारा की इतेक उमर भई,

² तब बा किर्यत-अर्बा में मर गई। जो कनान देस में आय, और हेब्रोन भी कहात आय। ई लाने अब्राहम सारा के लाने रोबे पीटबे हों तम्बू में गओ।

³ तब अब्राहम सारा के लिगां सें उठकें गओ और हित्तियों सें कई,

⁴ “मैं तुमाए मजारें पाहुन और परदेसी आंव; मोहों अपने मजारें कब्रिस्‍तान के लाने एैसी जमीन मोल दै देओ जो मोरी निज की हो जाए, कि मैं अपने मुरदे हों गाड़कें अपनी आंख की ओट में करों।”

⁵ हित्तियों ने अब्राहम सें कई,

⁶ “हे हमाए पिरभु, हमाई सुन; तें तौ हमाए मजारें बड़ो परधान आय। हमाई कबरों में सें जीहों तें चाए ऊमें अपने मुरदा गाड़; हम में सें कोऊ तोहों अपनी कबर के लैबे सें नें रोकहै, कि तें अपने मुरदे हों ऊमें नें गाड़ पाए।”

⁷ तब अब्राहम उठकें ठांड़ो भओ और हित्तियों के सामूं, जो ऊ देस के रैबेवारे हते, दंडवत करके कैन लगो,

⁸ “जदि तुमाई जा इच्‍छा होए कि मैं अपने मुरदा हों गाड़कें अपनी आंख की ओट में करों, तौ मोरी बिन्‍तवाई आय कि सोहर के मोंड़ा एप्रोन सें मोरे लाने बिनती करो,

⁹ कि ऊ अपनी मकपेलावारी गुफा, जो ऊकी जमीन की हद्द पै आय, ऊकौ पूरो दाम लैकें मोहों मोल दै दे, कि बा तुमाए मजारें कब्रिस्‍तान के लाने मोरी निजी जमीन हो जाए।”

¹⁰ एप्रोन तौ हित्तियों के मजारें उतै बैठो भओ हतो, ई लाने जितेक हित्ती ऊके नगर के फाटक सें होकें भीतर जात हते, उन सबई के सामूं ऊने अब्राहम हों जवाब दओ,

¹¹ “हे मोरे पिरभु, एैसो नईंया, मोरी सुन; बा जमीन मैं तोहों देत आंव, और ऊमें जो गुफा आय, बा भी मैं तोहों देत आंव; अपने जात भईयों के सामूं मैं ऊहों तोए हों दए देत आंव; सो अपने मुरदा हों कबर में रख।”

¹² तब अब्राहम ने ऊ देस के रैबेवारों के सामूं दंडवत करो,

¹³ और उनके सुनत भए एप्रोन सें कई, “जदि तें एैसो चाए, तौ मोरी सुन: बा जमीन की जो कीमत होए, बा मैं दैबो चाहत आंव; ऊहों मोए सें लै ले, तब मैं अपने मुरदा हों उतै गाड़हों।”

¹⁴ एप्रोन ने अब्राहम हों जौ जवाब दओ,

¹⁵ “हे मोरे पिरभु, मोरी बात सुन; बा जमीन की कीमत तौ चार सौ शेकेल (लगभग साढ़े चार किलो) चांदी आय; परन्‍त तोरे और मोरे मजारें जौ का आय? अपने मुरदा हों कबर में रख।”

¹⁶ अब्राहम ने एप्रोन की मानकें ऊहों उतेक चांदी तौल दई, जितेक ऊने हित्तियों के सुनत भए कई हती, मतलब चार सौ एैसे शेकेल जो ब्‍योपारियों में ऊ बेरां चलत हते।

¹⁷ ई तरहां एप्रोन की जमीन, जो पूरवी मम्रे के सामूं मकपेला में हती, बा गुफा समेंत और ऊपै लगे पेड़ों समेंत भी जो ऊमें और ऊकी चौहद्दी पै हते,

¹⁸ जितेक हित्ती ऊके नगर के फाटक सें होकें भीतर जात हते, उन सबई के सामूं अब्राहम के अधकार में पक्‍के तरीका सें आ गई।

¹⁹ ईके बाद अब्राहम ने अपनी बईयर सारा हों ऊ मकपेलावारी जमीन की गुफा में, जो पूरवी मम्रे के मतलब हेब्रोन के सामूं कनान देस में आय, माटी दई।

²⁰ ई तरहां बा जमीन गुफा समेंत जो ऊमें हती, हित्तियों की कोद सें कब्रिस्‍तान के लाने अब्राहम के अधकार में पक्‍के तरीका सें आ गई।