- उत्पत्ति 16 - Bundeli Holy Bible

हाजिरा और ऊकौ मोंड़ा इश्‍माएल

¹ अब्राम की बईयर सारै की कोऊ संतान नें हती। ऊकी हाजिरा नाओं एक मिस्री बंधुआ दासी हती।

² सारै ने अब्राम सें कई, “हेर, यहोवा परमेसुर ने तौ मोरी कोख बन्‍द कर रखी आय, ई लाने मैं तोसें बिनती करत आंव कि तें मोरी बंधुआ के लिगां जा; हो सकत आय कि मोरो घर ऊके द्वारा बस जाए।” सारै की जा बात अब्राम ने मान लई।

³ ई लाने जब अब्राम हों कनान देस में रैत भए दस साल हो चुके तब ऊकी घरवारी सारै ने अपनी मिस्री बंधुआ हाजिरा हों लैकें अपने घरवारे अब्राम हों दओ, कि बा ऊकी घरवारी होए।

⁴ अब्राम हाजिरा के लिगां गओ, और बा गरभवती भई। जब ऊने जानो कि बा गरभवती आय, तब बा अपनी मालकन हों अपनी नजर में तुच्‍छ समझन लगी।

⁵ तब सारै ने अब्राम सें कई, “जो मोए पै उपद्रो भओ ऊ तोरेई मूंड़ पै होए। मैंने तौ अपनी बंधुआ हों तोरी घरवारी बना दओ; परन्‍त जब ऊने जानो कि बा गरभवती आय, तब बा मोहों तुच्‍छ समझन लगी; ई लाने यहोवा परमेसुर मोरे और तोरे मजारें न्‍याय करे।”

⁶ अब्राम ने सारै सें कई, “हेर, तोरी बंधुआ तोरे बस में आय; जैसो तोहों भलो लगे बैसई ऊके संगै कर।” तब सारै ऊहों दुख दैन लगी और हाजिरा ऊके सामूं सें भग गई।

⁷ तब यहोवा परमेसुर के दूत ने ऊहों जंगल में शूर की गैल पै पानूं के एक झिन्‍ना के लिगां पाओ;

⁸ और ऊसें कई, “हे सारै की बंधुआ हाजिरा, तें कितै सें आत और कितै जात आय?” हाजिरा ने कई, “मैं अपनी मालकन सारै के सामूं सें भग आई आंव।”

⁹ यहोवा परमेसुर के दूत ने ऊसें कई, “अपनी मालकन के लिगां बापस जा और ऊके बस में रै।

¹⁰ मैं तोरे बंस हों बेजा बढ़ाहों, इतै लौ कि मुतके होबे के कारन उनकी गिनती नें हो पाहै।

¹¹ हेर, तें गरभवती आय, और मोंड़ा पैदा करहै; तें ऊकौ नाओं इश्‍माएल रखियो, कायसे यहोवा परमेसुर ने तोरे दुख कौ हाल सुन लओ आय।

¹² और ऊ मान्‍स जंगली गधा के जैसो हुईये, मतलब ऊहों कोऊ भी मान्सन अपने बस में नें कर पाहें; ऊकौ हाथ सब के बिरुद्ध उठहै और सब के हाथ ऊके बिरुद्ध उठहें; और ऊ अपने सबरे भाई-बन्‍धुअन सें लड़त भओ बसो रैहै।”

¹³ तब हाजिरा ने यहोवा परमेसुर कौ नाओं जीने ऊसें बातें करी हतीं, अत्ता-एल-रोई (तें मोहों देखबेवारो यहोवा परमेसुर आय) रखकें कई, “का मैं ऊहों हेरबे के बाद भी जियत रई?”

¹⁴ ई कारन ऊ कुआं कौ नाओं बेर-लहै-रोई कुआं पड़ो; ऊ तौ कादेश और बेरेद के मजारें आय।

¹⁵ हाजिरा हों अब्राम सें एक मोंड़ा पैदा भओ; और अब्राम ने अपने मोंड़ा कौ नाओं इश्‍माएल रखो, जीहों हाजिरा ने जनम दओ हतो।

¹⁶ जब हाजिरा ने अब्राम के द्वारा इश्‍माएल हों जनम दओ ऊ बेरा अब्राम छियासी साल कौ हतो।