- उत्पत्ति 15 - Bundeli Holy Bible

अब्राम के संगै यहोवा परमेसुर कौ बाचा बांधबो

¹ इन बातों के बाद यहोवा परमेसुर कौ जौ सन्देस सपने में अब्राम के लिगां पोंचो: “हे अब्राम, नें डर; तोरी ढाल मैं आंव और तोरो प्रतिफल बेजा बड़ो हुईए।”

² अब्राम ने कई, “हे यहोवा परमेसुर, मैं तौ निरबंस आंव, और मोरे घर कौ बारिस जौ दमिश्‍की एलीएजेर हुईये, सो तें मोहों का दैहै?

³ मोहों तौ तेंने बंस नईं दओ, और का हेरत आंव कि मोरे घर में पैदा भओ एक मान्‍स मोरो बारिस हुईये”।

⁴ तब यहोवा परमेसुर कौ जौ बचन ऊके लिगां पोंचो, “जौ तोरो बारिस नें हुईये, तोरो जो खुद कौ मोंड़ा हुईये, ओई तोरो बारिस हुईये।”

⁵ यहोवा परमेसुर ने ऊहों बायरें लै जाकें कई, “आकास कुदाऊं नजर करके तारागण हों गिन, का तें उनहों गिन सकत आय? तोरो बंस एैसोई हुईये।”

⁶ ऊने यहोवा परमेसुर पै भरोसा करो; और यहोवा परमेसुर नें ई बात हों ऊके लेखे में धरम गिनो।

⁷ यहोवा परमेसुर ने ऊसें कई, “मैं ओई यहोवा परमेसुर आंव जो तोहों कसदियों के ऊर नगर सें बायरें ल्‍याओ, कि तोहों ई देस कौ अधकार देओं।”

⁸ अब्राम ने कई, “हे यहोवा परमेसुर, मैं कैसे जानों कि मैं ईकौ अधकारी हुईयों?”

⁹ यहोवा परमेसुर ने ऊसें कई, “मोरे लाने तीन साल की एक कलोर, तीन साल की एक छिरिया, तीन साल कौ एक मेंढ़ा, एक फड़की और कबूतर कौ एक बच्‍चा ले।”

¹⁰ इन सब हों लैकें ऊने मजारें सें दो हींसा में चीर दओ और दोई हींसों हों आमूं-सामूं रखो; परन्‍त चिरईयों हों ऊने नें चीरो।

¹¹ जब मांसाहारी चिरईयां लोथों पै झपटीं, तब अब्राम ने उनहों उड़ा दओ।

¹² जब सूरज डूबन लगो, तब अब्राम हों भारी नींद आई; और हेरो, बेजा डर और घनै अंधयारे ने ऊहों ढंक लओ।

¹³ तब यहोवा परमेसुर ने अब्राम सें कई, “जौ पक्‍को जान कि तोरो बंस पराए देस में परदेसी होकें रैहै, और ऊ देस के मान्‍सन के गुलाम हो जैहें; और बे उनहों चार सौ साल लौ दुख दैहें।

¹⁴ फिन जी देस के बे गुलाम हुईयें उनहों मैं दण्‍ड दैहों: और ऊके बाद बे बड़ो धन उतै सें लैकें कड़ आहें।

¹⁵ तें तौ अपने पुरखों में अच्‍छे सें मिल जैहै; तोहों पूरे बुढ़ापे में माटी दई जैहै।

¹⁶ परन्‍त बे चौथी पीढ़ी में इतै फिन आहें: कायसे अब लौ एमोरियों कौ अधरम पूरो नईं भओ आय।”

¹⁷ एैसो भओ कि जब सूरज डूब गओ और घनौ अंधयारा छा गओ, तब एक अंगीठी जीमें सें धुआं उठत हतो और एक जलत भओ पलीता दिखाई दओ जो उन हीसों के मजारें सें होकें कड़ गओ।

¹⁸ ओई दिना यहोवा परमेसुर ने अब्राम के संगै जा बाचा बांधी, “मिस्र के नदी सें लैकें फरात नाओं बड़ी नदिया लौ जितनौ देस आय, ऊ मैंने तोरे बंस हों दै दओ आय,

¹⁹ मतलब केनियों, कनिज्‍जियों, कदमोनियों,

²⁰ हित्तियों, परिज्‍जियों, रपाइयों,

²¹ एमोरियों, कनानियों, गिर्गाशियों और यबूसियों कौ देस।”