- उत्पत्ति 13 - Bundeli Holy Bible

अब्राम और लूत कौ अलग होबो

¹ तब अब्राम अपनी घरवारी और अपनी पूरी सम्‍पत्ति लैकें, लूत हों भी संगै लएं भए, मिस्र हों छोड़कें कनान के दक्‍खिन देस में आओ।

² अब्राम गाड़र-छिरियां, गईया-बैला, सोना-चांदी कौ बड़ो धनी हतो।

³ फिन ऊ दक्‍खिन देस सें चलकें बेतेल के लिगां ओई जागां हों पोंचो, जितै ऊने तम्‍बू पैलां ठांड़ो करो हतो, जो बेतेल और ऐ नगर के मजारें आय।

⁴ जा जागां ऊ बेदी की आय, जीहों ऊने पैलां बनाई हती; और उतै अब्राम ने फिन यहोवा परमेसुर सें बिन्‍तवाई करी।

⁵ लूत के लिगां भी, जो अब्राम के संगै निंगत हतो, गाड़र-छिरियां, गईया-बैला और तम्‍बू हते।

⁶ ई लाने ऊ देस में उन दोई के लाने इतनी जागां नें हती कि बे एक संगै रएं; कायसे उनके लिगां बेजा धन हतो ई लाने बे संगै नें रै पाए।

⁷ अब्राम और लूत की गाड़र-छिरियां, गईया-बैला के चराबेवारों में झगड़ा भओ। ऊ बेरा कनानी और परिज्‍जी जनें ऊ देस में रैत हते।

⁸ तब अब्राम लूत सें कैन लगो, “मोरे और तोरे मजारें, मोरे और तोरे चरवाहों के मजारें झगड़ा नें होबे पाए; कायसे हमोंरें भाई-बंधु आंय।

⁹ का पूरो देस तोरे सामूं नईंया? ई लाने मोए सें न्‍यारो हो जा; जदि तें बांईं कोद जाए तौ मैं दायनी कोद जैहों; और जदि तें दायनी कोद जाए, तौ मैं बांईं कोद जैहों।”

¹⁰ तब लूत ने नजर उठाकें, यरदन नदिया के लिगांवारी पूरी तराई हों हेरो कि बा सबरी सिंची भई आय। जब लौ यहोवा परमेसुर ने सदोम और अमोरा हों नास नें करो हतो, तब लौ सोअर की गैल लौ बा तराई यहोवा परमेसुर की बगिया, और मिस्र देस के जैसी उपजाऊ हती।

¹¹ ई लाने लूत अपने लाने यरदन की पूरी तराई हों चुनकें पूरब कोद चलो, और बे एक-दूसरे सें न्‍यारे भए।

¹² अब्राम कनान देस में रओ, परन्‍त लूत ऊ तराई के नगरों में रैन लगो; और अपनो तम्‍बू सदोम के लिगां ठांड़ो करो।

¹³ सदोम के मान्‍सन यहोवा परमेसुर की नजर में बेजा दुस्‍ट और पापी हते।

अब्राम कौ हेब्रोन हों जाबो

¹⁴ जब लूत अब्राम सें न्‍यारो हो गओ तब ऊके बाद यहोवा परमेसुर ने अब्राम सें कई, “आंख उठाकें जौन जागां पै तें आय उतै सें उत्तर-दक्‍खिन, पूरब-पच्‍छिम, चारऊं कोद नजर कर।

¹⁵ कायसे जितेक जमीन तोहों दिखाई देत आय, ऊ सबरी हों मैं तोहों और तोरे बंस हों जुग-जुग के लाने दैहों।

¹⁶ मैं तोरे बंस हों पृथ्‍वी की धूरा के किनकों जैसो मुतकौ करहों; इतै लौ कि जो कोऊ पृथ्‍वी की धूरा के किनकों हों गिन पाहै ओई तोरे बंस हों भी गिन पाहै।

¹⁷ उठ, ई देस की लम्‍बाई और चौड़ाई में चल-फिर; कायसे मैं ऊहों तोरेई हों दैहों।

¹⁸ ईके बाद अब्राम अपनो तम्‍बू उखाड़कें, मम्रे नाओं जागां में तारपीन के पेड़ों के मजारें जो हेब्रोन में हते, जाकें रैन लगो; और उतै भी यहोवा परमेसुर की एक बेदी बनाई।”