- उत्पत्ति 12 - Bundeli Holy Bible

यहोवा परमेसुर की कोद से अब्राम हों बुलाओ जाबो

¹ यहोवा परमेसुर ने अब्राम सें कई, “अपनो देस, अपने कुटुम्‍बियों और अपने बाप के घर हों छोड़कें ऊ देस में चलो जा, जो मैं तोहों दिखाहों।

² मैं तोए सें एक बड़ी जाति बनाहों, तोहों आसीस दैहों, तोरो नाओं महान करहों और तें आसीस कौ मूल हुईये।

³ जो तोहों आसीरवाद दें उनहों मैं आसीस दैहों; और जो तोहों कोसे, ऊहों मैं स्राप दैहों; और पृथ्‍वी पै रहबेवारी सबरी जाति तोरे सें आसीस पाहें।”

⁴ यहोवा परमेसुर के ई बचन के अनसार अब्राम चलो, और लूत भी ऊके संगै चलो; हारान नगर सें कड़त बेरा अब्राम पचहत्तर साल कौ हतो।

⁵ ई तरहां अब्राम अपनी घरवारी सारै, अपने भतीजे लूत हों और जो धन उनोंरन ने इकट्ठो करो हतो, और जो मान्सन उनोंरन ने हारान में पाए हते, सब हों लैकें कनान देस में जाबे हों कड़ो; और बे कनान देस में आ गए।

⁶ ऊ देस के मजारें जात भए अब्राम शकेम में, जितै मोरे नाओं जागां में तारपीन कौ पेड़ आय, पोंचो। ऊ बेरा ऊ देस में कनानी जनें रैत हते।

⁷ तब यहोवा परमेसुर ने अब्राम हों दरसन दैकें कई, “जौ देस मैं तोरे बंस हों दैहों।” और ऊने ऊतै यहोवा परमेसुर के लाने, जीने ऊहों दरसन दओ हतो, एक बेदी बनाई।

⁸ फिन उतै सें आगूं बढ़कें ऊ बेतेल के पूरब कुदाऊं पहड़वावारी जागां में आओ, और अपनो तम्‍बू ऊ जागां में ठांड़ो करो जीके पच्‍छिम की कोद तौ बेतेल और पूरब की कोद ऐ नगर आय। उतै भी ऊने यहोवा परमेसुर के लाने एक बेदी बनाई और यहोवा परमेसुर सें बिन्‍तवाई करी।

⁹ अब्राम आगूं बढ़कें दक्‍खिन देस की कोद कड़ गओ।

मिस्र देस में अब्राम

¹⁰ ऊ देस में अकाल पड़ो: ई लाने अब्राम मिस्र देस हों चलो गओ कि ऊ उतै परदेसी होकें रए, कायसे देस में भयंकर अकाल पड़ो हतो।

¹¹ फिन एैसो भओ कि मिस्र के लिगां आकें; ऊने अपनी घरवारी सारै सें कई, “सुन, मोए पता आय कि तें एक सुन्‍दर बईयर आय;

¹² और जब मिस्री तोहों देखहें तब कैहें, ‘जा ऊकी घरवारी आय,’ ई लाने बे मोए हों तौ मार डालहें, परन्‍त तोए हों जीयत रख लैहें।

¹³ सो जौ कईयो, ‘मैं ऊकी बहन आंव,’ जीसें तोरे कारन मोरो भलो होए, और मोरे प्रान तोरे कारन सें बचें।”

¹⁴ फिन एैसो भओ कि जब अब्राम मिस्र में आओ, तब मिस्रियों ने ऊकी घरवारी हों हेरो कि जा बेजा सुन्‍दर आय।

¹⁵ राजा फिरौन के हाकमों ने ऊहों हेरकें फिरौन सें ऊकी तारीफ करी; ई लाने बा बईयर फिरौन के घर में पोंचाई गई।

¹⁶ ईलाने फिरौन ने ऊके कारन अब्राम कौ भला करो; और ऊहों गाड़र-छिरियां, गईया-बैला, दास-दासियां, गदहा-गदईयां और ऊंट मिले।

¹⁷ परन्‍त यहोवा परमेसुर ने फिरौन और ऊके घराने पै, अब्राम की घरवारी सारै के कारन बड़ी-बड़ी बिपदा डालीं।

¹⁸ तब फिरौन ने अब्राम हों टेरकें कई, “तेंने मोरे संगै जौ का करो? तेंने मोहों काए नईं बताओ कि बा तोरी घरवारी आय?

¹⁹ तेंने काए कई कि बा तोरी बहन आय? मैंने ऊहों अपनी घरवारी बनाबे के लाने लओ; परन्‍त अब अपनी घरवारी हों लैकें इतै सें चलो जा।”

²⁰ फिरौन ने अपने जनों हों ऊके बारे में हुकम दओ और उनोंरन ने ऊहों और ऊकी घरवारी हों, सबरी संपत्ति समेंत जो ऊकी हती, बिदा कर दओ।