- एस्तेर 7 - Bundeli Holy Bible

हामान हों मौत की सजा

¹ सो राजा और हामान दूसरे दिना एस्‍तेर रानी के भोज में आ गए।

² राजा ने दाखमधुु पियत पियत एस्‍तेर सें फिन पूंछो, “हे एस्‍तेर रानी! तोरी का बिन्‍तवाई आय? बा पूरी करी जैहै। और तें का मांगत आय? मांग, और आधो राज लौ तोय दओ जैहै।”

³ एस्‍तेर रानी ने जबाब दओ, “हे राजा जदि तें मोय सें खुस आय, और राजा हों स्‍वीकार होबै, तौ मोरी बिन्‍तवाई सें मोय, और मोरे मांगबे सें मोरे लोगन हों प्रानदान मिलै।

⁴ कायसे मैं और मोरी जात के लोग बेच डाले गए आंय, और हम सब मरबे और नास करे जाबेवारे आंय। जदि हम अकेले दास-दासी हो जाबे के लाने बेच डाले जाते, तौ मैं चुप रैती; चाए ऊ दसा में ऊ बिरोदी, राजा के नुकसान की बरोबरी नें कर सकतो।”

⁵ तब राजा क्षयर्ष ने एस्‍तेर रानी सें पूंछो, “ऊ को आय? और कितै आय, जीने ऐसो करबे कौ बिचार करो आय?”

⁶ एस्‍तेर ने जबाब दओ, “ऊ बिरोधी और दुसमन जौई हामान आय!” तब हामान राजा-रानी के सामूं डरा गओ।

⁷ राजा भारी खिसिया गओ, और दाखमधु पीबे से उठकें, राजभवन की बगिया में कड़ गओ; और हामान जौ हेरकें कि राजा ने मोरी हानी बिचार लई हुईयै, एस्‍तेर रानी सें प्रान की भीख मांगबे हों ठैरो रओ।

⁸ जब राजा राजभवन की बगिया सें दाखमधु पीबे की जागां में लौट आओ तब का हेरो कि हामान ओई चौकी पै जीपै एस्‍तेर बैठी आय झुक रओ आय; तब राजा ने कई, “का जौ घरई में मोरे सामूं रानी सें जबरई करबो चाहत आय?” राजा के मों सें जे बचन कडे़ई हते, कि सेवकों ने हामान कौ मों ढांक दओ।

⁹ तब राजा के सामूं हाजिर रैबेवारे खोजों में सें हर्वोना नाओं एक ने राजा सें कई, “हामान के इतै पचास हाथ ऊंचो फांसी कौ एक खम्‍भा ठांड़ो आय, जौन ऊने मोर्दकै के लाने बनवाओ आय, जीने राजा की इच्छा करी हती।” राजा ने कई, “ईहों ओई पै लटका देओ।”

¹⁰ तब हामान ओई खम्‍भा पै जीहों ऊने मोर्दकै के लाने तईयार करवाओ हतो, लटका दओ गओ। ईपै राजा कौ गुस्‍सा ठंड़ो पड़ गओ।