- एस्तेर 6 - Bundeli Holy Bible

राजा द्वारा मोर्दकै कौ सम्‍मान

¹ ऊ रात राजा हों नींद नें आई, ई लाने ऊके हुकम सें इतिहास की पोथी लाई गई, और पढ़कें राजा हों सुनाई गई।

² ऊमें जौ लिखो भओ मिलो, कि जब राजा क्षयर्ष के हाकम जो रक्छक सोई हते, उन में सें बिगताना और तेरेश नाओं दो खोजो ने ऊपै हाथ चलाबे की जुगत करी हती उए मोर्दकै ने बताओ हतो।

³ तब राजा ने पूंछो, “ईके बदले मोर्दकै कौ का मान और बड़ाई करी गई?” राजा के जौन सेवक ऊकी सेवा टहल करत हते, उनोंरन ने ऊहों जबाब दओ, “ऊके लाने कछु भी नईं करो गओ।”

⁴ राजा ने पूंछो, “आंगन में को आय?” ओई बेरा हामान राजा के भवन सें बायरें आंगन में ई मनसा सें आओ हतो कि जौन खम्‍भा ऊने मोर्दकै के लाने तईयार कराओ हतो, ऊपै ऊहों लटका देबे की चरचा राजा सें करे।

⁵ तब राजा के सेवकों ने ऊसें कओ, “आंगन में तौ हामान ठांड़ो आय।” राजा ने कई, “ऊहों भीतर ल्याओ।”

⁶ जब हामान भीतर आओ, तब राजा ने ऊसें पूंछो, “जौन मान्‍स कौ मान राजा करबो चाहत होबै तौ ऊके लाने का करबो ठीक हुईयै?” हामान ने जा सोचकें, कि मोय सें अधक राजा कौन कौ मान करबो चाहत हुईयै,

⁷ राजा हों जवाब दओ, “जौन मान्‍स कौ मान राजा करबो चाए,

⁸ ऊके लाने राजसी उन्‍ना लाओ जाए, जो राजा पैनत आय, और एक घुड़वा सोई, जीपै राजा सवारी करत आय, और ऊकी मुंड़ी पै जौन राजसी मुकट धरो जात आय, ऊ सोई लाओ जाए।

⁹ फिन ऊ उन्‍ना, और बो घुड़वा राजा के कोऊ बड़े हाकम हों सौंपे जाएं, और जीकौ मान राजा करबो चाहत होबै, ऊहों बो उन्‍ना पैराव जाए, और ऊ घुड़वा पै सवार करकें नगर के चौक में ऊहों घुमाओ जाए; और ऊके आंगू आंगू जा मुनादी करी जाए, ‘जीकौ मान राजा करबो चाहत आय, ऊके संगै एैसई करो जैहै’।”

¹⁰ राजा ने हामान सें कई, “उलात करके अपने कहबे के अनसार ऊ उन्‍ना और ऊ घुड़वा हों लेकें, ऊ यहूदी मोर्दकै सें जौन राजभवन के फाटक में बैठो करत आय, ऊंसई कर। जैसो तेंनें कओ आय ऊमें कछु भी कमी नें होबे पाए।”

¹¹ तब हामान ने ऊ उन्‍ना, और ऊ घुड़वा हों लेकें, मोर्दके हों पैराए, और ऊहों घुड़वा पै चढ़ाकें, नगर के चौगड्डा में ई तरहां पुकारत भओ घुमाओ, “जीकौ मान राजा करबो चाहत आय ऊके संगै एैसई करो जैहै।”

¹² तब मोर्दकै तौ राजभवन के फाटक में लौट गओ परन्‍त हामान सोक करत भओ और मुंड़ी ढांपे भए उलात अपने घर हों गओ।

¹³ हामान ने अपनी बईयर जेरेश और अपने सब दोस्‍तन सें सब कछु जो ऊपै बीतो हतो बखान करो। तब ऊके बुद्धिमान दोस्‍तन और ऊकी बईयर जेरेश ने ऊसें कई, “मोर्दकै जीहों तें नीचो दिखाबो चाहत आय, जदि ऊ यहूदियन के बंस कौ आय, तौ तें ऊसें जीत नें पाहै कायसें तोरो पतन सुरू हो गओ आय और तें पूरी तरहां से निंदरोई जैहै।”

¹⁴ बे ऊसें बातें करई रए हते कि राजा के खोजे आकें हामान हों एस्‍तेर के दए गए भोज में उलायती सें बुला ले गए।