- एस्तेर 4 - Bundeli Holy Bible

मोर्दकै कौ एस्‍तेर सें मदद मांगबो

¹ जब मोर्दकै ने जान लओ कि का का करो गओ आय तब मोर्दकै अपने उन्‍ना फाड़ कें, टाट पैरें, राख डालकें, नगर के मजारें जाकें ऊंचे और दुखभरे सब्‍द सें चिल्‍यान लगो;

² और ऊ राजभवन के फाटक के सामूं पोंचो, परन्‍त टाट पैरें भए राजभवन के फाटक के भीतर तौ पिड़बे की कोनऊं हों आज्ञा नें हती।

³ एक एक प्रान्‍त में, जितै जितै राजा कौ हुकम और नियम पोंचो, उतै उतै यहूदी बड़ो बिलाप करबे और उपास करबे और रोबे पीटबे लगे; बल्‍कि बिलात जनें टाट पैरें और राख डालें भए पड़े रए।

⁴ एस्‍तेर रानी की सखियन और खोजों ने जाकें ऊहों मोर्दकै के बारे में बता दओ, तब रानी दुख सें भर गई; और मोर्दकै के लिगां उन्‍ना भेजकें जौ कहलाओ कि टाट उतारकें इनहों पहन ले, परन्‍त ऊने उनें नईं लओ।

⁵ तब एस्‍तेर ने राजा के खोजों में सें हताक हों जीहों राजा ने ऊके लिगां रैबे हों ठैराओ हतो, बुलवाकें हुकम दओ कि मोर्दकै के लिगां जाकें पता काड़ ले कि का बात आय, और ईकौ का कारन आय।

⁶ तब हताक नगर के ऊ चौक में, जौन राजभवन के फाटक के सामूंं हतो, मोर्दकै के लिगां कड़ गओ।

⁷ मोर्दकै ने ऊहों सब कछु बता दओ कि मोरे ऊपर का का बीतो आय, और हामान ने यहूदियन हों नास करबे की अनुमति पाबे के लाने राजभण्‍डार में कितेक चांदी भर देबे कौ बचन दओ आय, जौ सोई ठीक ठाक बता दओ।

⁸ फिन यहूदियन कौ बिनास करबे कौ जौन हुकम शूशन में दओ गओ हतो, ऊकी एक नकल सोई ऊने हताक के हाथ में, एस्‍तेर हों दिखाबे के लाने दई, और उए सब हाल बताबे, और जौ हुकम देबे हों कई, कि भीतर राजा के लिगां जाकें अपने मान्‍सन के लाने गिड़गिड़ा के बिनती करै।

⁹ तब हताक ने एस्‍तेर के लिगां जाकें मोर्दकै की बातें कै सुनाईं।

¹⁰ तब एस्‍तेर ने हताक हों मोर्दकै सें जा कैबे की आज्ञा दई,

¹¹ “राजा के सब कर्मचारियन, बल्‍कि राजा के प्रान्‍तन के सब मान्‍सन हों सोई मालूम आय, कि का मान्‍स का बईयर, कौनऊं काय नें होबै, जौ हुकम बिना पाए भीतरी आंगन में राजा के लिगां जैहै ऊहों मार डालबे कौ हुकम आय; अकेले जीकी कोद राजा सोने कौ राजदण्‍ड बढ़ाए ओई बचत आय। परन्‍त मैं अब तीस दिना सें राजा के लिगां नईं बुलाई गई आंव।”

¹² एस्‍तेर की जे बातें मोर्दकै हों सुनाई गईं।

¹³ तब मोर्दकै ने एस्‍तेर के लिगां जौ कहला पठैव, “तें हिया में जौ बिचार नें कर, कि मैंई राजभवन में रैबे के कारन और सब यहूदियन में सें बची रैहों।

¹⁴ कायसे जो तें ई बेरा चिमानी रई, तौ और कौनऊं उपाय सें यहूदियन कौ छुटकारा और तरनतारन हो जैहै, परन्‍त तें अपने और अपने बाप के घराने समेंत नास हुईयै। का जाने तोहों एैसई कठन बेरा के लाने राजपद मिल गओ होए?”

¹⁵ तब एस्‍तेर ने मोर्दकै के लिगां जौ कहला पठैव,

¹⁶ “तें जाकें शूशन के सब यहूदियन हों इकट्ठो कर, और तुमोंरें मिलकें मोरे लाने उपास करौ, तीन दिन रात नें तौ कछु खाओ, और नें कछु पीओ। मैं सोई अपनी सखियन समेंत ऐई तरहां उपास करहों; और एैसई दसा में मैं नियम के बिरूद्ध राजा के लिगां भीतर जैहों; और जदि नास हो गई तौ हो गई।”

¹⁷ तब मोर्दकै चलो गओ और एस्‍तेर की आज्ञा के अनसार ऊने करो।