- प्रेरितन के काम 25 - Bundeli Holy Bible

¹ फेस्तुस ऊ परगना में पोंचबे के तीन दिना पाछें कैसरिया से यरूशलेम हां गओ।

² तब मुखिया पुरोहितों और यहूदियन के खास जन ने, पौलुस पे दोस लगा के ऊसे बिनती करी।

³ और जा छूट मांगी, कि बो पौलुस हां यरूशलेम पठै दे, कायसे बे ऊहां गैल में मरवाबे की ताक में हते।

⁴ तब फेस्तुस ने कई, पौलुस कैसरिया की हिरासत में आय, और मैं सोई झट्टई जाबे वालो आंव।

⁵ फिन ऊ ने कई, तुम में से जौन खास जनें आंय बे मोरे संग्गै निंगे, और अगर ई मान्स ने कोऊ बुरव काज करो आय, तो उते ऊ पे दोस लगाबें।

⁶ बो उन के बीच आठ या दस दिन रह के कैसरिया हां चलो गओ, दूसरे दिना ऊ ने न्याव आसन पे बैठ के हुकम दओ की पौलुस हां लाओ जाबै।

⁷ ऊके उते पोंचबे पे यरूशलेम से आए भए यहूदी ऊके चारऊं कोद ठांड़े हो गए, और ऊ पे ऐसे बड़े दोस लगान लगे, जिन कौ उन के ऐंगर कोऊ सबूत नईं हतो।

⁸ पर पौलुस ने अपने बचाव में कई, मैंने न यहूदियन की रीत, न मन्दर और न कैसर के बिरुद्ध कोऊ पाप करो आय।

⁹ तब फेस्तुस ने यहूदियन हां खुस करबे की मनसा से पौलुस से कई, का तें चाहत आय, कि मैं इन दोस कौ न्याव यरूशलेम में करों।

¹⁰ पर पौलुस ने कई; मैं कैसर के न्याव आसन के आंगू ठांड़ो आंव, मोरो न्याव इतईं होओ चईये: जैसो की तें भी भली भांत जानत आय, मैंने यहूदियन कौ कछु नईं बिगाड़ो आय।

¹¹ अगर मैं दोसी आंव और मैंने मृत्यु दण्ड पाबे के लाने कछु करो आय; तो मैं मरबे से मना नईं करत, पर अगर उन के द्वारा लगाए गए दोषन में से एकऊ सांची नईं ठहरे, तो कोऊ भी मोय इन के हाथन नईं सौंप सकत: मैं कैसर से अपील करत आंव।

¹² तब फेस्तुस ने अपनी पंचायत से सलाह कर के कई, तेंने कैसर से अपील करी आय, तें कैसर के आंगू ठांड़ो हुईये।

¹³ जब बिलात दिना बीत गए तो राजा अग्रिप्पा और बिरनीके ने कैसरिया आके फेस्तुस से भेंट करी।

¹⁴ जब कि उन हां उते बिलात दिना बिताने हते, तो फेस्तुस ने पौलुस कौ मुकदमा राजा के आंगू पेस करके कई; इते एक मान्स आय, जीहां फेलिक्स हिरासत में छोड़ गओ आय।

¹⁵ जब मैं यरूशलेम में हतो, तो मुखिया महापुरोहित और यहूदियन के सियानन ने ऊके बिरुद्ध दोस लगाए; और बिनती करी, की ऊहां दण्ड दओ जाबै।

¹⁶ तब मैंने उन से कई, की रोमियों में जा रीत नईंयां, की कोऊ दोसी हां, जब लौ दोस लगाबेवालन के आंगू ठांड़े होकें अपने बचाव में बोलबे कौ मौका नईं मिले, ऊहां दण्ड के लाने सौंपो जाबे।

¹⁷ ई लाने जब बे इते जमा भए, तो मैंने बिना देरी करे, दूसरे दिना न्याव आसन पे बैठके, ऊ मान्स हां लाबे कौ हुकम दओ।

¹⁸ जब दोस लगाबे वाले ठांड़े भए, तो उन ने ऊ पे कोऊ ऐसो बड़े दोस नईं लगाव, जैसी मोरी सोच हती।

¹⁹ पर उन कौ सोच फरक हतो, ऊके संग्गै केवल अपने धरम की कछु बातन और यीशु नाओं के एक मान्स के बारे में हती, जौन मर गओ हतो, पर पौलुस ऊके जीयत होबे कौ दावा करत हतो।

²⁰ मोरी समझ में नईं आओ, की इन बातन की छान-बीन कैसे करी जाबै? ई लाने मैंने ऊसे पूछी, की का तें यरूशलेम जाबे हां तईयार आय, की उते इन बातन के बारे में तोरो न्याव होबै?

²¹ पर जब पौलुस ने अपील करी, की महाराजाधिराज द्वारा ही मोरो न्याव करो जाबै; तो मैंने हुकम दओ, की जब लौ मैं ऊहां कैसर के ऐंगर नईं पठै दों, बो इतईं हिरासत में रए।

²² तब अग्रिप्पा ने फेस्तुस से कई, मैं सोई मान्स की सुनबो चाहत आंव: ऊ ने कई, तें कल सुन लै है।

²³ ई लाने दूसरे दिना, जब अग्रिप्पा और बिरनीके बिलात धूमधाम से सेनापतियन और नगर के नामी जनें के संग्गै पंचायतघर में घुसे, तब फेस्तुस के हुकम से पौलुस हां लाओ गओ।

²⁴ फेस्तुस ने कई, हे महाराजा अग्रिप्पा, और हमाए संग्गै हाजिर भले मान्सो, ई मान्स हां हेरो, जीके बारे में सबरे यहूदी समाज ने यरूशलेम में और इते भी चीख चीख के मोसे बिनती करी आय, की ईको अब जीयत रहबो सही नईंयां।

²⁵ पर मैंने जान लओ, कि ईने मृत्यु दण्ड के लाक कछु नईं करो हतो; और ई लाने की ईने खुद महाराजाधिराज से अपील करी आय, तो मैंने ईहां पठैय देबे कौ फैसला करो।

²⁶ फिन भी मोरे ऐंगर ईके बारे में अपने महाराज हां लिखबे के लाने कोई सही बात नईंयां, ई लाने मैं ऊहां तुम सब के आंगू खास के हे राजा अग्रिप्पा तोरे आंगू लाओ आंव, की जांच खतम होबे पे मोय कछु लिखबे हां मिल जाबै।

²⁷ कायसे मोय जौ बेकार जान पड़त आय, की कोई कैदी हां ऊ की दोसपाती तईयार करे बिना पठैय दों।