- पैलो इतिहास 21 - Bundeli Holy Bible

दाऊद द्वारा जनगणना कराबो

¹ शैतान ने इस्राएल के बिरूद्ध उठकें, दाऊद हों उकसाओ कि इस्राएलियन की गिनती करे।

² तब दाऊद ने योआब और परजा के हाकमों सें कई, “तुम जाकें बेशेर्बा सें दान लौ इस्राएलियन की गिनती करके मोए बताओ, कि मैं जानों कि बे कितेक आंय।”

³ योआब ने कई, “यहोवा परमेसुर की परजा कितनी ही काय नें होए, ऊ उनहों सौ गुनो बढ़ा दैहै, परन्‍त हे मोरे पिरभु! हे राजा! का बे सबरे राजा के अधीन नईंयां? मोरो पिरभु ऐसी बात काय चाहत आय? ऊ इस्राएल पै दोस लगबे कौ कारन काय बने?”

⁴ तौभी राजा कौ हुकम योआब पै भारी पड़ो। तब योआब बिदा होकें पूरे इस्राएल में घूमकें यरूशलेम हों लौट आओ।

⁵ तब योआब ने दाऊद हों परजा की गिनती कौ जोड़ बताओ कि इस्राएल के सबरे तलवार चलाबेवारे मान्‍स ग्‍यारह लाख और यहूदा के चार लाख सत्तर हजार कड़े।

⁶ परन्‍त इनमें योआब ने लेवियों और बिन्‍यामीनियों हों नईं गिनो, कायसे ऊ राजा के हुकम सें घृणा करत हतो।

⁷ जा बात यहोवा परमेसुर हों बुरी लगी, ई लाने ऊने इस्राएल हों मारो।

⁸ दाऊद ने यहोवा परमेसुर सें कई “जोैन काम मैंने करो, ऊ महापाप आय, परन्‍त अब अपने दास कौ अधरम दूर कर; मोए सें तौ बड़ी मूरखता भई आय।”

⁹ तब यहोवा परमेसुर ने दाऊद के दर्शी गाद सें कई,

¹⁰ “जाकें दाऊद सें कै यहोवा परमेसुर एैसो कैत आय कि मैं तोहों तीन बिपदा दिखात आंव, उनमें सें एक हों चुन ले कि मैं ऊहों तोपै डालों।”

¹¹ तब गाद ने दाऊद के लिगां जाकें ऊसें कई, “यहोवा परमेसुर एैसो कैत आय कि जीहों तें चाए ऊहों चुन ले:

¹² या तौ तीन साल कौ अकाल पड़े; या तीन मईना लौ तोरे बैरी तोहों नास करत रएं, और तोरे बैरियन की तलवार तोपै चलत रए; या तीन दिना लौ यहोवा परमेसुर की तलवार चले, मतलब मरी देस में फैले और यहोवा परमेसुर कौ दूत इस्राएल के देस में चारऊं कोद बिनास करत रए। अब सोच ले कि मैं अपने पठैबेवारे हों का कओं।”

¹³ दाऊद ने गाद सें कई, “मैं बड़ी परेसानी में फंसो आओं; मैं यहोवा परमेसुर के हाथ में पड़ों, कायसे ऊकी दया बिलात बड़ी आय; परन्‍त मान्‍स के हाथ में मोहों नें पड़ने पड़े।”

¹⁴ तब यहोवा परमेसुर ने इस्राएल में मरी फैलाई, और इस्राएल में सत्तर हजार मान्स मर गए।

¹⁵ फिन यहोवा परमेसुर ने यरूशलेम हों नास करबे हों एक दूत पठैओ, और ऊ नास करबे पै हतो कि यहोवा परमेसुर दुख दैबे सें दुखी भओ, और नास करबेवारे दूत सें कई, “बस कर; अब अपनों हाथ खेंच ले।” ऊ बेरा यहोवा परमेसुर कौ दूत यबूसी ओर्नान के खलियान के लिगां ठांड़ो हतो।

¹⁶ दाऊद ने आंखें उठाकें तको कि यहोवा परमेसुर कौ दूत हाथ में खीचीं भई और यरूशलेम के ऊपर बढ़ाई भई एक तलवार लएं आकास के मजारें ठांड़ो आय, तब दाऊद और पुरनिये टाट पैरें भए मों के बल गिरे।

¹⁷ तब दाऊद ने यहोवा परमेसुर सें कई “जीने परजा की गिनती लैबे कौ हुकम दओ हतो, ऊ का मैं नईंयां? हओ, जीने पाप करो और बिलात बुराई करी आय, ऊ तौ मैंई आओं। परन्‍त इन गाड़र-छिरियों ने का करो आय? ई लाने हे मोरे यहोवा परमेसुर! तोरो हाथ मोरे बाप के घराने के बिरुद्ध होबै, परन्‍त तोरी परजा के बिरुद्ध नें होबै, कि बे मारे जाएं।”

¹⁸ तब यहोवा परमेसुर के दूत ने गाद हों दाऊद सें ऐसो कैबे कौ हुकम दओ कि दाऊद चढ़कें यबूसी ओर्नान के खलियान में यहोवा परमेसुर की एक बेदी बनाए।

¹⁹ गाद के ई बचन के अनसार जौन ऊने यहोवा परमेसुर के नाओं सें कओ हतो, दाऊद चढ़ गओ।

²⁰ तब ओर्नान ने पाछें मुड़कें दूत हों तको, और ऊके चारऊं मोंड़ा जौन ऊके संगै हते बे छिप गए; ओर्नान ऊ बेरा गेंहूं दांव रओ हतो।

²¹ जब दाऊद ओर्नान के लिगां आओ, तब ओर्नान ने दाऊद हों तको और खलियान के बायरें जाकें धरती पै झुककें दाऊद हों दण्‍डवत करो।

²² तब दाऊद ने ओर्नान सें कओ, “ई खलियान की जागां मोहों दै दे, कि मैं ईपै यहोवा परमेसुर की एक बेदी बनाओं, ऊकौ पूरो दाम लैकें ऊहों मोए दे कि जा बिपदा परजा पै सें कड़ जाए।”

²³ ओर्नान ने दाऊद सें कओ, “ईहों लै ले और मोरे राजा हों जो कछु भाए ऊ ओई करे; सुन, मैं तोहों होमबलि के लाने बैल और ईंधन के लाने दांवने के हथयार और अन्‍नबलि के लाने गेंहूं, जौ सब मैं देत आंव।”

²⁴ राजा दाऊद ने ओर्नान सें कई, “नईं, मैं ईकौ पूरो दाम दैकें ईहों मोल लैहों; जो तोरो आय, ऊहों मैं यहोवा परमेसुर के लाने नें लैहों, और नें सेंतमेंत की होमबलि चढ़ाहों।”

²⁵ तब दाऊद ने ऊ जागां के लाने ओर्नान हों छै सोै शेकेल (लगभग सात किलोग्राम) सोना तौल कें दओ।

²⁶ तब दाऊद ने उतै यहोवा परमेसुर की एक बेदी बनाई और होमबलि और मेलबलि चढ़ाकें यहोवा परमेसुर से बिन्‍तवाई करी, और ऊने होमबलि की बेदी पै सरग सें आगी गिराकें ऊकी सुन लई।

²⁷ तब यहोवा परमेसुर ने दूत हों हुकम दओ, और ऊने अपनी तलवार फिन म्‍यान में धर लई।

²⁸ जौ हेरकें कि यहोवा परमेसुर ने यबूसी ओर्नान के खलियान में मोरी बिन्‍तवाई सुन लई, दाऊद ने ओई बेरा उतै बलिदान करो।

²⁹ यहोवा परमेसुर के रैबे की जागां मूसा ने जंगल में बनाई हती, और होमबलि की बेदी, जे दोई ऊ बेरा गिबोन की ऊंची जागां पै हते।

³⁰ परन्‍त दाऊद यहोवा परमेसुर के लिगां गिबोन में ऊके सामूं नें जा पाओ, कायसे ऊ यहोवा परमेसुर के दूत की तलवार सें डर गओ हतो।