- पैलो इतिहास 20 - Bundeli Holy Bible

रब्‍बा पै दाऊद कौ अधिकार

¹ फिन नए साल के सुरू में जब राजा लोग युद्ध करबे हों कड़त हते, तब योआब ने बड़ी सेना लै जाकें अम्‍मोनियों कौ देस उजाड़ दओ और आकें रब्‍बा हों घेर लओ; परन्‍त दाऊद यरूशलेम में रै गओ; और योआब ने रब्‍बा हों जीतकें ढा दओ।

² तब दाऊद ने उनके राजा कौ मुकट ऊकी मूंड़ पै सें उतारकें का तको कि उनकौ तौल किक्‍कर भर सोने (लगभग 34 किलोग्राम) कौ आय, और ऊमें मणि भी जड़े हते; और ऊ दाऊद की मूंड़ पै धरो गओ। फिन ऊहों नगर सें मुतकौ लौ सामान लूट में मिलो।

³ ऊने ऊमें रहबेवारन हों काड़कें आरों और लोहा के हेंगों और कुलड़ियों सें जबरन काम करवाओ; और अम्‍मोनियों के सबरे नगरों के संगै भी दाऊद ने बैसई करो। तब दाऊद सबरे मान्‍सन समेंत यरूशलेम हों लौट गओ।

पलिश्‍ती दानवों सें युद्ध

⁴ ईके बाद गेजेर में पलिश्‍तियों के संगै युद्ध भओ; ऊ बेरा हूशाई सिब्‍बकै ने सिप्‍पै हों, जौन रापा की संतान हतो, मार डालो; और बे दब गए।

⁵ पलिश्‍तियों के संगै फिन युद्ध भओ; ऊमें याईर के मोंड़ा एल्‍हानान ने गती गोल्‍यत के भईया लहमी हों मार डालो, जीके बरछे की छड़ जुलाहे की धरनी जैसी हती।

⁶ फिन गत में सोई युद्ध भओ, और उतै एक बड़े डील डौल कौ मान्‍स हतो, जौन रापा की संतान हतो, और ऊके एक-एक हाथ-गोड़ों में छै छै उंगरियां मतलब सब मिलाकें चौबीस उंगरियां हतीं।

⁷ जब ऊने इस्राएलियन हों ललकारो, तब दाऊद के भईया शिमा के मोंड़ा योनातान ने ऊहों मारो।

⁸ जेई गत में रापा सें पैदा भए हते, और बे दाऊद और ऊके सेवकों के हाथों मार डाले गए।