- पैलो इतिहास 17 - Bundeli Holy Bible

दाऊद हों नातान आगमवक्‍ता कौ संदेसो

¹ जब दाऊद अपने भवन में रैन लगो, तौ दाऊद ने नातान आगमवक्‍ता सें कओ, “हेर, मैं तौ देवदार के बने भए घर में रैत आंव, परन्‍त यहोवा परमेसुर की बाचा कौ संदूक तम्‍बू में रैत आय।”

² नातान ने दाऊद सें कई, “जौन कछु तोरे हिया में होए ऊहों कर, कायसे यहोवा परमेसुर तोरे संगै आय।”

³ ओई रात यहोवा परमेसुर कौ बचन नातान के लिगां पोंचो, “जाकें मोरे दास दाऊद सें कै,

⁴ यहोवा परमेसुर एैसो कैत आय:” “मोरे रैबे के लाने तें घर नें बनवा पाहै।”

⁵ कायसे जी दिना सें मैं इस्राएलियन हों मिस्र सें ल्‍याओ, आज के दिना लौ मैं कभऊं घर में नईं रओ; परन्‍त एक तम्‍बू सें दूसरे तम्‍बू हों और एक निवास सें दूसरे निवास हों आओ जाबो करत आंव।

⁶ जितै जितै मैंने सब इस्राएलियन के मजारें आबो-जाबो करो, का मैंने इस्राएल के न्‍याय करबेवारन में सें जिनहों मैंने अपनी परजा की चरवाही करबे हों ठैराओ हतो, कौनऊं सें कभऊं ऐसी बात कई कि, “तुमोंरों ने मोरे लाने देवदार कौ घर काए नईं बनवाओ?”

⁷ सो अब तें मोरे दास दाऊद सें एैसो कै कि, सेनाओं कौ यहोवा परमेसुर एैसो कैत आय कि मैंने तौ तोहों भेड़शाला सें और गाड़र-छिरियों के पाछें-पाछें फिरबे सें ई मनसा सें बुला लओ, कि तें मोरी परजा इस्राएल कौ परधान हो जाए;

⁸ और जितै कऊं तें आओ और गओ, उतै मैं तोरे संगै रओ, और तोरे सबरे बैरियन हों तोरे सामूं सें नास करो आय। अब मैं तोरे नाओं हों पृथ्‍वी के बड़े-बड़े मान्‍सन के नाओं जैसो बड़ो कर दैहों।

⁹ मैं अपनी परजा इस्राएल के लाने एक जागां ठैराहों, और ऊहों स्‍थर करहों कि ऊ अपनी जागां में बसी रए और कभऊं नें डिगै, और दुस्‍ट ऊहों नास नें कर पाहें, जैसे कि पैलां करत हते।

¹⁰ बल्‍कि ऊ बेरा भी जब मैं अपनी परजा इस्राएल के ऊपर न्‍यायी ठैरात हतो; सो मैं तोरे सबरे बैरियन हों दबा दैहों। फिन मैं तोहों जौ भी बतात आंव, कि यहोवा परमेसुर तोरो घर बनाए रखहै।

¹¹ जब तोरी उमर पूरी हो जैहै और तोहों अपने स्‍यानों के संगै जाने पड़है, तब मैं तोरे बाद तोरे बंस हों जौन तोरे मोंड़ों में सें हुईयै, ठांड़ो करके ऊके राज हों स्‍थर करहों।

¹² मोरे लाने एक घर ओई बनाहै, और मैं ऊकी राजगद्दी हों हमेसा स्‍थर रखहों।

¹³ मैं ऊकौ बाप ठैरहों और ऊ मोरो मोंड़ा ठैरहै, जैसे मैंने अपनी करुना शाऊल पै सें जौन तोए सें पैलां हतो हटाई हती, बैसे मैं ऊपै सें नें हटाहों,

¹⁴ बल्‍कि मैं ऊहों अपने घर और अपने राज में हमेसा स्‍थर रखहों और ऊकी राजगद्दी हमेसा लौ अटल रैहै।

¹⁵ इन सबरी बातों और ई दरसन के अनसार नातान ने दाऊद हों समझा दओ।

दाऊद की धन्‍नवाद की बिन्‍तवाई

¹⁶ तब दाऊद राजा भीतर जाकें यहोवा परमेसुर के सामूं बैठो, और कैन लगो, “हे यहोवा परमेसुर! मैं का आओं? और मोरो घराना का आय कि तेंनें मोहों इतै लौ पोंचाओ आय?

¹⁷ हे यहोवा परमेसुर! जा तोरी नज़र में हल्‍की बात भई, कायसे तेंनें अपने दास के घराने के बारे में भविस्‍य के बिलात दिनों लौ की चरचा करी आय, और हे यहोवा परमेसुर! तेंनें मोहों ऊंचे पद कौ मान्‍स जैसो जानो आय।

¹⁸ जौन मईमा तोरे दास पै दिखाई गई आय, ऊके बारे में दाऊद तोए सें और का कै सकत आय? तें तौ अपने दास हों चींनत आय।

¹⁹ हे यहोवा परमेसुर! तेंनें अपने दास के लाने और अपने हिया के अनसार जौ बड़ो काम करो आय कि तोरो दास ऊहों जान लैबे।

²⁰ हे यहोवा परमेसुर! जौन कछु हमने अपने कानों सें सुनो आय, ऊके अनसार तोरे बरोबर कौनऊं नईंयां, और नें तोहों छोड़ और कौनऊं ईसुर आय।

²¹ फिन तोरी परजा इस्राएल के भी बरोबर को आय? बा तौ पृथ्‍वी भर में एकई जात आय, ऊहों यहोवा परमेसुर ने जाकें अपनी निज परजा करबे हों छुड़ाओ, ई लाने कि तें बड़े और डरावने काम करके अपनो नाओं करे, और अपनी परजा के सामूं सें जौन तेंनें मिस्र सें छुड़ा लई हती, जात-जात के मान्‍सन हों काड़ दे।

²² कायसे तेंनें अपनी परजा इस्राएल हों अपनी हमेसा की परजा होबे के लाने ठैराओ, और हे यहोवा परमेसुर! तें खुद ऊकौ पिरभु ठैरो आय।

²³ ई लाने, अब हे यहोवा परमेसुर, तेंनें जौन बचन अपने दास के और ऊके घराने के बारे में दओ आय, ऊ हमेसा बनो रए, और अपने बचन के अनसारई कर।

²⁴ और तोरो नाओं हमेसा अटल रए, और जौ कहकें तोरी बड़ाई हमेसा करी जाए, कि सेनाओं कौ यहोवा परमेसुर इस्राएल कौ पिरभु आय, बल्‍कि ऊ इस्राएल के लाने यहोवा परमेसुर आय, और तोरे दास दाऊद कौ घराना तोरे सामूं स्थर रए।

²⁵ कायसे हे मोरे यहोवा परमेसुर, तेंनें जौ कहकें अपने दास पै परगट करो आय कि मैं तोरो घर बनाए रखहों, ई कारन तोरे दास हों तोरे सामूं बिन्‍तवाई करबे की हिम्मत भई आय।

²⁶ अब हे यहोवा परमेसुर तेंई ईसुर आय, और तेंनें अपने दास हों जा भलाई करबे कौ बचन दओ आय;

²⁷ और अब तेंनें खुस होकें, अपने दास के घराने पै एैसी आसीस दई आय, कि ऊ तोरे सामूं हमेसा बनो रए, कायसे हे यहोवा परमेसुर, तें आसीस दै चुको आय, ई लाने ऊ हमेसा आसीसित बनो रए।”