- पैलो इतिहास 13 - Bundeli Holy Bible

बाचा की पेटी कौ किर्यत्‍यारीम सें लाओ जाबो

¹ दाऊद ने सहस्रपतियों, शतपतियों और सबरे परधानों सें सलाह लई।

² तब दाऊद ने इस्राएल की सबरी मण्‍डली सें कई, “जदि जौ तोहों अच्‍छो लगै और हमाए यहोवा परमेसुर की इच्‍छा होबै, तौ इस्राएल के सबरी जागांओं में जौन हमाए भईया आंय और उनके संगै जौन याजक और लेवीय अपने अपने चराईवारे नगरों में रैत आंय, उनके लिगां भी जौ कहला पठैव कि हमाए लिगां इकट्ठे हो जाओ,

³ और हम अपने यहोवा परमेसुर के संदूक हों अपने इतै लै आएं; कायसे शाऊल के दिनन में हम ऊके लिगां नें जात हते।”

⁴ तब सबरी मण्‍डली ने कओ कि बे एैसईं करहें, कायसे जा बात उन सबई की नजर में अच्छी लगी।

⁵ सो दाऊद ने मिस्र देस के शीहोर सें हमात की घाटी लौ के सबरे इस्राएलियन हों ई लाने इकट्ठो करो कि यहोवा परमेसुर के संदूक हों किर्यत्‍यारीम सें ल्‍याए।

⁶ तब दाऊद सब इस्राएलियन हों संगै लैकें बाला हों गओ, जौन किर्यत्‍यारीम भी कहात हतो और यहूदा के हींसा में हतो कि यहोवा परमेसुर कौ संदूक उतै सें ल्‍याए; ऊ तौ करूबों पै बिराजबेवारो आय और संदूक कौ नाओं भी यहोवा परमेसुर के नाओं सें लओ जात आय।

⁷ तब उनोंरन ने यहोवा परमेसुर के संदूक हों एक नई गाड़ी पै चढ़ाकें, अबीनादाब के घर सें काड़ो और उज्‍जा और अह्यो ऊ गाड़ी हों हांकन लगे।

⁸ दाऊद और सबरे इस्राएली यहोवा परमेसुर के सामूं तन मन सें गीत गात और बीणा, सारंगी, डफ, झांझ और तुरहियां बजात हते।

⁹ जब बे कीदोन के खलिहान लौ आए, तब उज्‍जा ने अपनो हाथ संदूक हों पकड़बे के लाने बढ़ाओ, कायसे बैलों ने ठोकर खाई हती।

¹⁰ तब यहोवा परमेसुर कौ खुन्‍स उज्‍जा पै भड़क उठो; और ऊने ऊहों मारो कायसे ऊने संदूक पै हाथ लगाओ हतो; ऊ उतईं यहोवा परमेसुर के सामूं मर गओ।

¹¹ तब दाऊद नाराज भओ, ई लाने कि यहोवा परमेसुर उज्‍जा पै टूट पड़ो हतो; और ऊने ऊ जागां कौ नाओं पेरेसुज्‍जा धरो, जौ नाओं आज लौ बनो आए।

¹² ऊ दिना दाऊद यहोवा परमेसुर सें डरकें कैन लगो, “मैं यहोवा परमेसुर की संदूक हों अपने इतै कैसे लै आओं?”

¹³ तब दाऊद संदूक हों अपने इतै दाऊदपुर में नें लाओ, परन्‍त ओबेदेदोम नाओं गती के घरै लै गओ;

¹⁴ और यहोवा परमेसुर की संदूक ओबेदेदोम के इतै ऊके घराने के लिगां तीन मईना लौ रओ, और यहोवा परमेसुर ने ओबेदेदोम के घराने पै और जौन कछु ऊकौ हतो ऊपै भी आसीस दई।