- पैलो इतिहास 11 - Bundeli Holy Bible

पूरे इस्राएल पै दाऊद कौ राजा होबौ

¹ तब सबरे इस्राएली दाऊद के लिगां हेब्रोन में जुड़कें कैन लगे, “सुन, हमोंरें और तें एकई हड्डी और मांस आंय।

² बीते दिनन में जब शाऊल राजा हतो, तब भी तेंई युद्ध में इस्राएलियन की अगुवाई करत हतो, और तोरे यहोवा परमेसुर ने तोए सें कई, ‘मोरी परजा इस्राएल कौ चरवाहा और मोरी परजा इस्राएल कौ परधान तेईं हुईयै’।”

³ ई लाने सबरे इस्राएली पुरनिये हेब्रोन में राजा के लिगां आए, और दाऊद ने उनके संगै हेब्रोन में यहोवा परमेसुर के सामूं बाचा बांधी; और उनोंरन ने यहोवा परमेसुर के बचन के अनसार, जौन ऊने शमूएल सें कओ हतो, इस्राएल कौ राजा होबे के लाने दाऊद कौ अभिसेक करो।

⁴ तब सबरे इस्राएलियो समेंत दाऊद यरूशलेम गओ, जौन यबूस भी कहात आए, और उतै यबूसी नाओं ऊ देस के निवासी रैत हते।

⁵ तब यबूस के रहबेवारन ने दाऊद सें कओ, “तें इतै आबे नें पाहै।” तब भी दाऊद ने सिय्‍योन नाओं गढ़ हों लै लओ, ओई दाऊदपुर भी कहात आय।

⁶ दाऊद ने कई, “जौन कौनऊं यबूसियों पे सबसे पैलां हमला करहै, ऊ परधान सेनापति हुईयै,” तब सरूयाह कौ मोंड़ा योआब सबसे पैलां चढ़ गओ, और सेनापति बन गओ।

⁷ तब दाऊद ऊ गढ़ में रैन लगो, ई लाने ऊकौ नाओं दाऊदपुर पड़ो।

⁸ ऊने नगर के चारऊं कोद, मतलब मिल्‍लो सें लैकें चारऊं कोद सहरपनाह बनवाई, और योआब के बाकी नगर के खण्‍डहरों हों फिन बसाओ।

⁹ दाऊद की प्रतिस्‍ठा बिलात बढ़त गई और सेनाओं कौ यहोवा परमेसुर ऊके संगै हतो।

दाऊद के सूरवीर

¹⁰ यहोवा परमेसुर ने इस्राएल के बारे में जौन बचन कओ हतो, ऊके अनसार दाऊद के जिन सूरवीरों ने सबरे इस्राएलियन समेंत ऊके राज में ऊके पक्ष में होकें, ऊहों राजा बनाबे हों जोर दओ, उनमें सें खास मान्‍स जे आंय।

¹¹ दाऊद के सूरवीरों के नाओं की सूची जा आय, मतलब एक हक्‍मोनी कौ मोंड़ा याशोबाम जौन तीसों में खास हतो, ऊने तीन सौ मान्‍सन पेै भाला चलाकें, उनहों एकई बेरां में मार डालो।

¹² ऊके बाद अहोही दीदो कौ मोंड़ा एलीआज़र जौन तीनईं महान् सूरवीरों में सें एक हतो।

¹³ ऊ पसदम्‍मीम में जितै जवा कौ खेत हतो, दाऊद के संगै रओ जब पलिश्‍ती उतै युद्ध करबे हों जुड़े हते, और मान्‍स पलिश्‍तियों के सामूं सें भग गए हते।

¹⁴ तब उनोंरन ने ऊ खेत के मजारें में ठांड़े होकें ऊकी रक्षा करी, और पलिश्‍तियों हों मारो, और यहोवा परमेसुर ने उनहों बड़ी विजय दैकें बचाओ।

¹⁵ तीसों खास मान्‍सन में सें तीन दाऊद के लिगां चट्टान हों, मतलब अदुल्‍लाम नाओं गुफा में गए, और पलिश्‍तियों की छावनी रपाईम नाओं तराई में पड़ी भई हती।

¹⁶ ऊ बेरा दाऊद गढ़ में हतो, और ऊ बेरा पलिश्‍तियों की एक चौकी बैतलहम में हती।

¹⁷ तब दाऊद ने बड़ी अभलासा सें कओ, “को मोहों बैतलहम के फाटक के लिगां के कुआं कौ पानू पिलाहै।”

¹⁸ तब बे तीनईं जनें पलिश्‍तियों की छावनी पै टूट पड़े और बैतलहम के फाटक के कुआं सें पानू भरकें दाऊद के लिगां लै आए; परन्‍त दाऊद ने पीबे सें मना करो और यहोवा परमेसुर के सामूं अर्घ करके उण्‍डेलो;

¹⁹ और ऊने कई, “मोरो यहोवा परमेसुर मोए सें एैसो करबो दूर रखै। का मैं इन मान्‍सन कौ खून पीओं जिनोंरन ने अपने प्राणों पै खेलो आय? जे तौ अपने प्रानों पै खेलकें ऊहों ल्‍याए आंय।” ई लाने ऊने ऊ पानू पीबें सें मना करो। इन तीनईं बीरों ने जेई काम करे।

²⁰ अबीशै जौन योआब कौ भईया हतो, ऊ तीसों में परधान हतो। ऊने अपनो भाला चलाकें तीन सौ हों मार डालो और तीनईं के जैसो नामी हो गओ।

²¹ दूसरी श्रेणी के तीनईं में ऊ बिलात नामी हतो, और उनकौ परधान हो गओ, परन्‍त खास तीनईं के पद हों नें पोंचो।

²² यहोयादा कौ मोंड़ा बनायाह हतो, जौन कबजेल के एक बीर कौ मोंड़ा हतो, जीने बड़े बड़े काम करे हते, ऊने दो मोआबियों हों मार डालो, और जाड़े के दिना में एक गड़हे में उतरकें एक नाहर हों मार डालो।

²³ फिन ऊने एक बड़ी डील डौलवारे मतलब पांच हाथ लम्‍बे मिस्री मान्‍स हों मार डालो, ऊ मिस्री हाथ में जुलाहों की धरनी जैसो एक भाला लएं भए हतो, परन्‍त बनायाह एक लठिया लएं भए ऊके लिगां गओ, और मिस्री के हाथ सें भाला छुड़ाकें ओई के भाले सें ऊहों मार डालो।

²⁴ ऐसे ऐसे काम करके यहोयादा कौ मोंड़ा बनायाह उन तीनईं सूरवीरों में नामी हो गओ।

²⁵ ऊ तौ तीसों सें बिलात नामी हतो, परन्‍त खास तीनईं के पद हों नें पोंचो। ऊहों दाऊद ने अपने अंगरक्षकों कौ परधान ठैरा दओ।

²⁶ फिन दलों के सूरमा जे हते, मतलब योआब कौ भईया असाहेल, बैतलहमी दोदो कौ मोंड़ा एल्‍हानान,

²⁷ हरोरी शम्‍मोत, पलोनी हेलेस,

²⁸ तकोई इक्केश कौ मोंड़ा ईरा, अनातोती अबीएजेर,

²⁹ हूशाई सिब्‍बकै, अहोही ईलै,

³⁰ महरै, नतोपाई, एक और नतोपाई बाना कौ मोंड़ा हेलेद,

³¹ बिन्‍यामीनियों के गिबा नगरवासी रीबै कौ मोंड़ा इतै, पिरातोनी बनायाह,

³² गाशके नालों के लिगां रहबेवारो हूरै, अराबावासी अबीगल,

³³ बहूरीम अजमावेत, शल्‍बोनी एल्‍यहबा,

³⁴ गीजोई हाशेम के मोंड़ा, फिन हरारी शागे कौ मोंड़ा योनातान,

³⁵ हरारी सकार कौ मोंड़ा अहीआम, ऊर कौ मोंड़ा एलीपाल,

³⁶ मकेराई हेपेर, पलोनी अहिय्‍याह,

³⁷ कर्मेली हेस्रो, एज्‍बै कौ मोंड़ा नारै,

³⁸ नातान कौ भईया योएल, हग्री कौ मोंड़ा मिभार,

³⁹ अम्‍मोनी सेलेक, बरोती नहरै जौन सरूयाह के मोंड़ा योआब कौ हथयार ढोबेवारो हतो,

⁴⁰ येतेरी ईरा और गारेब,

⁴¹ हित्ती ऊरिय्‍याह, अहलै कौ मोंड़ा जाबाद,

⁴² तीस मान्‍सन समेंत रूबेनी शीजा कौ मोंड़ा अदीना जौन रूबेनियों कौ मुखिया हतो,

⁴³ माका कौ मोंड़ा हानान, मेतेनी योशापात,

⁴⁴ अशतारोती उज्‍जियाह, अरोएरी होताम के मोंड़ा शामा और यीएल,

⁴⁵ शिम्री कौ मोंड़ा यदीएल और ऊकौ भईया तीसी, योहा,

⁴⁶ महवीमी एलीएल, एलनाम कौ मोंड़ा यरीबै और योशव्‍याह, मोआबी यित्‍मा,

⁴⁷ एलीएल, ओबेद और मसोबाई यासीएल।