Titi 1 - U TIENU MAAMA TILI 2013

Kilisiti Nitaanli gobidikaaba 1 I fuondi

¹ Mini Poli yua n tie U Tienu naacemo leni Jesu Kilisiti tondo, ki baa gobidi U Tienu n gandi yaaba li dandanli nni, ke ban bandi yaa moamoani n ŋua U Tienu tuoma.

² Lani n tie ban baa yaa dugidi n baa pa ya miali n kan gbeni, U Tienu yua n kan pua faama n den niani yaa miali, hali ke ŋanduna daa ye.

³ Wan den bili yaa yogunu n den pundi, wani U Tienu ti Candaano n den doagidi o maama, wan puogi nni min yaa wangi yaama, kelima o yanbuama po.

⁴ N diani fini n bimoanga Titi po, kelima tikuli n taani ki pia yaa dandanli po. U Tienu yua n tie Baa leni Jesu Kilisiti ti Candaano, n pa ŋa li ŋanbili leni mi yanduanma.

Titi tuonli Kileti diema nni

⁵ N den ŋaa ŋa Kileti diema nni, ke ŋan ŋanbi yaala n sieni ki bua mi ŋanbima, ki kaani mi diema yeni dogi nni kuli, Kilisiti Nitaanli nikpela nani min den yedi a maama.

⁶ Li tie tiladi ke nikpelo kuli n yaa tie ban kan fidi ki kuli yua leni bonliba. O baa yaa pia puoyendo bebe leni yaa bila n daani Jesu, bi niba n kan fidi ki tabi yaaba leni cagindiba, bi ke bi tie biyenyieda.

⁷ Li tie tiladi ke Kilisiti Nitaanli gobidika n yaa tie U Tienu naacendugika, wan da pia ban baa fidi ki kuli o leni yaala. Wan da tie tupaalu daano, mutuodaano, dañolo, yua n faadi li koanli leni yua n kuandi o yama i janbi ñuadi nni.

⁸ Wan yaa tie yua n gaani bi niba cangu, ki bua yaala n ŋani, ki yaa pia li kpaagili, ki tiegi, ki gagidi ki ŋani, ki kubi o yuli.

⁹ Wan yaa kubi i moamoani maama, yaama n tie mi madugikaama nani ban den bangi o maama. Lani n tie wan fidi ki bangi mi bangiŋanma, ki yaa paagidi bi niba pala. O go baa fidi ki maadi ki guli yaaba n bua ki nia ma kuli.

Bi bangi-faadanba

¹⁰ Li pia bi niyiekaaba boncianla, ama bi yabi yaaba n kua ku koanciagu siige ki cie. Bi boandi biyaba, ki go maadi majoagindi buoli kuli.

¹¹ Li tie tiladi ŋan mubini bi ñoana, kelima bi yagini ti dietiandi yama, ki bangi ki bua ki baa i janbi ñuadi.

¹² Kileti yaaba siiga yeni yendo, bi saawalipualo den yedi: «Kileti yaaba tie tuofaadanba leni fuayanbiaditi yogunu kuli, ki go tie nuagu danba yaaba n pia i kpadije.»

¹³ Laa siedi tie moamoani. Lani yaa po, ŋan fu leni ba boncianla, ke ban baa li dandanmoanli.

¹⁴ Lani n tie ban da go ŋua Jufinba telimi leni bi nisaaliba bali maama, yaaba n lebidi ki yie kaa go ŋua i moamoani.

¹⁵ Li bonla kuli ŋani cain, yaaba n ŋani cain po. Ama liba kuli ki ŋani cain yaaba n joagini po, bani yaaba n kaa daani yeni po, kelima bi yantiali leni bi pala siedi kuli joagini.

¹⁶ Bi tua ke bi bani U Tienu, ama bi nia o bi bontienkaala nni. Bi tie cancaginniba leni niyiekaaba, ki kan fidi ki tieni tuonŋanliba kuli.