Sakari 5 - U TIENU MAAMA TILI 2013

Li bonlekaluobila: li tigbabikaali

¹ N didi go den laa li bonlekaala nni, li tigbabikaali ke li ye tanpoli ki yugi.

² Maleki den buali nni: «A nua be?» N den guani ki yedi: «N nua tigbabikaali ke li yugi. Li foaginu tie nukpanduna piilie, li pianu mo nukpanduna piiga.»

³ Lani, o den yedi nni: «Yaa solindi n baa baa mi diema n diani lipo. U kaliyendu po, li diani ki yedi ke bi baa deli ki ñani a suuda kuli mi diema nni. U kalilielu po mo, li diani ki yedi ke yaaba n pua mi faama ki polini moko bi baa soani ba yene.

⁴ Li Miali Diedo U Paaciamu Kuli Daano yedi: ‹N yadi ti solindi yeni, ke tin kua suudo kuli diegu nni leni yua n taagi n yeli ki pua mi faama ki polini kuli yaa diegu nni. N yadi ti ke tin kua lienni, ki yaa ye, ki bolini ki taani a yoaga leni a tana kuli.› »

Li bonlekaleleela: o pua ke o ye ku baabuogu nni

⁵ Maleki yua n den maadi leni nni yeni, den cua ki yedi: «Yaadi ki diidi yaala n ban ña napo ne.»

⁶ N den buali o: «Lani, mo tie be?» O den guani ki yedi nni, ke li tie mi diema yaaba kuli tuonbiadi n ye yaa baabuogu nni.

⁷ Yaa bonbiigu n den ŋuagi ku baabuogu, ki tie noabindi, den yugidi. N den laa o pua ke o kaa ku baabuogu yeni niinni.

⁸ Maleki den yedi nni, ke o pua yeni n tie mi biadima. O go den tudi ki kuani o ku baabuogu nni, ki ŋoagini leni ku bonbiigu yeni.

⁹ Li yaa puoli, n den yaadi ki diidi ki laa puobilie yaaba n ye tanpoli ki yugi, ke u faalu ŋua ki tudi ba. Bi fiabi den tie nani goliya yaa fiabi yeni. Bi den cua ki taa ku baabuogu yeni ki yugi leni ku.

¹⁰ N den buali Maleki yeni ban caani ku naani.

¹¹ O den guani ki yedi nni: «Bi caani ku Sineari diema po yo, ki baa n maa ku po li dieli. Bi yaa maa ki gbeni li, bi baa sieni ku lani nne.»