Sakari 4 - U TIENU MAAMA TILI 2013

Li bonlekamuula: i fidisantuankaani leni olivie tiidi

¹ Maleki yua n den maadi leni nni yeni, den guani ki fundi nni nani ban baa fundi o nilo o guama nni maama yeni.

² O den buali nni: «A nua be?» N den guani ki yedi: «N nua fidisantuankaanu ke u kuli tie wula, ke mi kpama kuodikaanu ye u tanpoli. N go nua fidisanmulele ke mu tua lipo leni kuyelilele, mi kpama n tagidi yii yaa niinni ki kua mu fidisanmu nni.

³ Olivie tiidi bonilie se ki kuu mi fidisankpama kuodikaanu yeni. Tiyenbu se jienu po, bu tiliebu mo se ganu po.»

⁴ Lani n den buali Maleki yua n den maadi leni nni yeni: «N Diedo, line mo bundi be?»

⁵ O den guani ki buali nni: «Ŋaa bani line n bundi yaala?» N den guani o: «N Diedo, mii bani.»

^6a Lani, o den guani ki yedi nni:

^10b «Mu fidisanleleedimu yeni tie o Diedo nuni, yi n diidi yaala n tiendi mi tinfanma nne.»

¹¹ N go den buali o: «Olivie tiliedi yi n se u fidisantuankaanu ganu po leni jienu po yeni mo bundi be?»

¹² N go den buali o miliema: «Olivie tiidi benliedi yi n ye ki kuu mi kpama n tagidi yaa kuyeliedi nni yeni mo bundi be?»

¹³ O den guani ki buali nni: «Ŋaa bani lan bundi yaala?» N den yedi: «Aa-a, n Diedo, mii bani.»

¹⁴ Lanwani, o den guani ki yedi nni: «Li tie U Tienu n gandi yaa niliediba ki wuli bi yula po mi gagidima kpama, ke ban yaa tuuni wani ki tinga kuli Diedo po.»

U Tienu n niani Sorobabeli po yaa ñoaniani

^6b Maleki den soani nni ki yedi ke min ban waani Sorobabeli ke o Diedo U Paalu Kuli Daano yedi yaa maama n tie ne: «Laa tie leni u paalu bi leni a fidicele ka, Ke a baa fidi ki soani laa tuonli. Se leni n Fuoma.

⁷ A tie ŋme, fini li joacianli Sorobabeli nintuali? A baa tua tialu. O baa ñani likani n dieli tanpuuli. Bi niba baa yaa kpaani ki tua: ‹Li pia ñuadima! Li pia ñuadima!› »

⁸ O Diedo go den soani nni ki yedi:

⁹ «Sorobabeli cili mini U Tienu diegu tanpuuli: O baa maa ki juodi li mo.» Lani kuli yaa tieni, Yi baa bandi ke Li Miali Diedo, U Paaciamu Kuli Daano n soani nni Yi kani moamoani.

^10a Ŋmenba n fali yaa tuonbibidi n da cili ki tuuni? Ban mangi bi pala leni Sorobabeli N baa guani ki maa U Tienu diegu.