Ruti 4 - U TIENU MAAMA TILI 2013

Boasi taa Ruti ke o tua o pua

¹ Boasi den gedi ki ban kali u dogu buliñoabu kani, ban ja ti buudi naani. Noemi calo Elimeleki kpiilo, Boasi n den maadi yua yaa maama den tagini ki baa pendi likani. Boasi den yedi o: «Fini ŋmeŋme, cua ki kali ne.» O den cua ki kali.

² Boasi den yini u dogu nikpela siiga nikpela piiga, ki yedi ba: «Kali mani ne.» Bi den kali.

³ O den yedi Elimeleki kpiilo yeni: «Noemi ñani Moabi diema ki guani ki kpeni. O kuadi ti kpiilo Elimeleki kuanu.

⁴ N sua ke li pundi min waani a, ki yedi a ŋan daa u u dogu yaaba leni ti buolu nikpela nintuali. A yaa bua ki daa u, ŋan daa. A yàá bua mo, ŋan waani nni min bandi, kelima oba kuli naa pia sanu ki cie ŋa laa maama po. A yaama mo yàá ye lienni, mini n ji ŋua.» O joa yeni den guani ki yedi: «N baa daa u.»

⁵ Lanwani, Boasi den yedi: «A yaa daa Noemi kani u kuanu yaa daali, a go baa taa Ruti yua n tie Moabi yua, ke o calo yua n kpe yeni diegu n da bodi.»

⁶ O joa yeni den yedi: «Li yaa tie yeni wani, n kan fidi ki daa, kelima n jie n piama po. N puni a u sanu ŋan daa, kelima mini wani kan fidi.»

^7-8 Wan den maadi yaa yogunu ki yedi Boasi n da u kuanu, o den pidi o cacaagu ki teni wani Boasi. Li den sua ke Isidayeli nni, niba yaa daa bonla bi ki lebidi, yendo yen pidi o cacaagu ki teni o lielo, lan doagidi ke ki dunga cuo. Li den tie siedi ke mi maama loli.

⁹ Lanwani, Boasi den yedi a nikpela leni u dogu yaaba kuli: «Yi tie n siedinba dinla ke n daa Noemi kani Elimeleki leni Kiliyon leni Malon n den die yaala kuli.

¹⁰ Lane ke n go taa Malon kpepuoli Ruti, yua n tie Moabi yua, ki baa baa o calo yua n kpe po u buolu. Yeni o kpiemo faali baa sedi o buolu nni, o yeli mo kan bodi o kpiiba siiga leni o dogu nni. Yi tie n siedinba dinla.»

¹¹ A nikpela leni yaaba n den ye u dogu bilinciamu buliñoabu kani kuli den yedi: «Ti tie a siedinba, o Diedo n teni ke yaa pua n baa kua a diegu nni yeni, n yaa tie nani Raseli leni Lea yeni, bani yaa puoliediba n mali Isidayeli yaaba buolu yeni. A paalu n doagidi Efrata cuuli nni, a yeli n kpedi Betelemi nni.

¹² O Diedo n teni o pua yeni n maa a po a bila boncianla, ke a diegu n nandi leni Peretisi yaagu, Tamari n den mali yua Juda po.»

¹³ Lanwani, Boasi den taa Ruti ke o tua o pua. Wan den kua o kani, o Diedo den seligi Ruti ke o taa ku tugu, ki mali bonjaga.

¹⁴ Bi puoba den yedi Noemi: «O Diedo n baa ti kpiagidi, wani yua n teni ke ŋaa luo buolu dinla. Laa biga yeli baa ña Isidayeli yaaba siiga.

¹⁵ O baa guani ki kaani a jigi, ki kubi a a nikpedi nni, kelima a biyuaga n mali o. Wani a biyuaga yeni, o cie a po ba bonjalalele.»

¹⁶ Noemi den gaa ki biga yeni ki ŋmabi ka, ki tua ki biyualo.

¹⁷ O yieninlieba yaaba n tie puoba den yedi: «Noemi baa bonjaga.» Bi den yini o Obedi. Wani n mali Isayi, Isayi mo mali Davidi.

Davidi yaajanba yela

¹⁸ Peretisi yaabila yela n tie ne: Peretisi den mali Hetisiloni.

¹⁹ Hetisiloni mo den mali Ram, Ram n maa Aminadabi,

²⁰ Aminadabi mo n maa Nasoni, Nasoni n maa Salima,

²¹ Salima mo n maa Boasi, Boasi n maa Obedi,

²² Obedi mo n maa Isayi, Isayi n maa Davidi.