Ruti 2 - U TIENU MAAMA TILI 2013

Ruti leni Boasi 2—4 Ruti liegi Boasi kuanu nni

¹ Noemi den pia yua n kpi leni o calo. O den yi Boasi, ki tie Elimeleki diegu yua, ki tie piado, ki go pia ti jigidi.

² Dayenli, Moabi yua Ruti den yedi Noemi: «Cedi min gedi ki ban liegi orje. N yaa ban laa yua n baa tuo min liegi o kuanu nni, n baa liegi lankane.» Noemi den guani ki yedi o: «Gedi, n bisalo.»

³ Ruti den gedi koayendu nni, ki ban ŋua ki liegi yaaba n ce puoli. Li den sua ke wan ban kua yaa kuanu nni tie Elimeleki kpiilo Boasi yeni kuanu nne.

⁴ Yogunu waamu n pendi, Boasi den ñani Betelemi ki cua. O den tuondi bi tuonsoanba ki yedi: «O Diedo n yaa ye leni yi!» Bi den guani ki yedi o: «O Diedo n seligi a!»

⁵ Boasi den buali wan den guuni yua bi tuonsoanba: «Ŋme yaa puojafaano nne?»

⁶ O tuonsoanguulo den guani ki yedi: «O tie Moabi diema yaa pua. Wani n yegi leni Noemi ki ñani Moabi diema nni, ki kpeni yeni.

⁷ O bi mia ke tin cedi wan yaa ŋua ki liegi yaaba n ce puoli, ki taani bi tuonsoanba n luo a bonbaba ke yaala n baali. Hali wan faa ki cua ki liegi waa sedi, se wan bi kali ki fuodi waamu bebe.»

⁸ Lane Boasi den yedi Ruti: «N bisalo, ŋan da go gedi ki ban liegi koato nni. Ŋan da ña ne, ŋan yaa ye ne leni yaa puoba n tuuni ne.

⁹ Ŋan diidi ban ce naani u kuanu nni, ki yaa ŋua ki liegi bi puoba puoli. N waani n naacenba ban da sii ŋa. U ñuñuunu yaa cuo ŋa, ŋan gedi ki ban ño bi naacenba n yidi yaa ñima.»

¹⁰ Ruti den labini ki pugi o, ki yedi: «Be n teni ke a ŋanbi n po ki miini nni nanda, mini yua n tie lamo?»

¹¹ Boasi den guani ki yedi o: «Bi togidi nni hali a calo n kpe, ŋan tieni a yaanaa po yaala kuli leni ŋan fii ki ŋaa a baa, a naa leni a maadogu kuli maama, ki cua ŋan kaa bi kpa bani yaa nibuolu siiga.

¹² O Diedo n guani a a ŋanma, nani ŋan tieni maama. Yeni de! Wani o Diedo, Isidayeli yaaba n ŋua yaa Tienu, ŋan cua ki wuoni wani yua yaa kani, n guani a po a panpaani, ki ŋanbi a po cain!»

¹³ Ruti den guani ki yedi: «N daano, a ŋanbi n po. A baagi nni leni ŋan maadi nni yaa mamanma ne, ba ke mii pundi bi puoba yaaba n tuuni a po siiga ba yendo!»

¹⁴ Ban den kali ke bi baa je yaa yogunu, Boasi den yedi Ruti: «Nagini ki je. Ŋan yen tuu dupen mi kpinñima nni, ki yaa ŋmani.» Ruti den kali bi tuonsoanba kani. Boasi den teni o orje bonsagidi. O den ŋmani ki guo, ki kubi wan ŋmani ki sieni yaala.

¹⁵ Li yaa puoli, o den fii ki baa yaa liegi. Boasi den yedi o naacenba: «Yin cedi wan yaa liegi ba a bonbaba siiga moko, ki da fu leni o.

¹⁶ Yin yaa ñandi ba a bonbaba nni ti siandi ki biliti o po ke o taani. Yin da yedi o liba.»

¹⁷ Ruti den liegi u kuanu nni hali ku yenjuagu. O den pua wan liegi yaala ki sua ke li bua ki pundi baabuogu.

¹⁸ O den taa ki tugi ki guani u dogu po, ki ban waani o yaanaa wan baa yaala. O go den ñani wan dini ki sieni yaala ki teni o.

¹⁹ O yaanaa den buali o: «A ban liegi lee dinla? U Tienu n seligi yua n tieni a laa ŋanma.» Lane Ruti den waani o yaanaa ke o ban soani yaa joa n yi Boasi yaa kuanu nne.

²⁰ Noemi den yedi: «O Diedo gba tinba yaaba n fo po mi ninñima, nani wan gba yaaba n kpe po maama yeni. Wan seligi o joa yeni.» Noemi go den pugini ki yedi: «O joa yeni tie ti kpiilo. O tie ti niba yaaba n kpe faajieba siiga yendo, yua n pia li bali ki kubi ti.»

²¹ Ruti go den yedi: «O joa yeni go bi yedi ke min yaa kpendi ki ŋua ki liegi o naacenba puoli, hali ban baa n ce ki gbeni.»

²² Lani, Noemi go den yedi o biyuaga: «N bisalo, li ŋani ŋan yaa caa ki tuuni leni Boasi puotuada ke ban da ban waani a fala koato nni.»

²³ Lanwani, Ruti den caa ki ŋua ki liegi Boasi puotuada puoli, hali orje leni ŋalikama ceegbenma. Laa dana nni kuli, o den ye leni o yaanaa yo.