Pisomi 99 - U TIENU MAAMA TILI 2013

Pisomi 99 O Diedo n tie Bado

¹ Li Miali Diedo tie Bado, I nibuoli kuli n digibi. O kaa o bali kalikaanu, Ki yiini selubanba po, Ki tinga kuli n begibi.

² O Diedo yabi Siyon nni, Wani n yabi ki cie i nibuoli kuli.

³ Ban pagi a kelima a yeli yabi, Ki go pia i jeje, A gagidi ki ŋani mo.

⁴ Ban pagi a paalu, Fini o bado yua n bua yaa bujiali n tiegi. Fini n bili ti miali yema n baa yaa cuoni maama, Fini n bili Jakob buolu po, Yaa bujiali n tiegi leni mi teginma.

⁵ Pagi mani o Diedo ti Tienu, Gbaani mani o taaŋmaakaanu kani, Ki pugi o kelima o gagidi ki ŋani!

⁶ O kopadicianba siiga, Musa leni Alono den mia o, Ke o gaa bi miabu. Yaaba n taagi o Diedo yeli siiga, Samueli den mia o Diedo, Ke o gaa bi miabu.

⁷ U Tienu den maadi leni ba ku tawaligu nni, Bani mo den kubi o mabilikaama Leni wan den teni ba o bali maama yaama.

⁸ O Diedo, ti Tienu, Fini a ba n den guandi ba, Ki tie bi po yaa Tienu n puuni sugili, Kaa jiindi ba bi tuonjoagima panpaani.

⁹ Pagi mani o Diedo ti Tienu! Gbaani mani o joagagidikaali po, Kelima o Diedo ti Tienu ŋani.