Pisomi 97 - U TIENU MAAMA TILI 2013

Pisomi 97 O Diedo n tie Bado

¹ Li Miali Diedo tie Bado, Ki tinga kuli n yaa ye leni li pamanli. Yaa niba n ye hali a kpendega nni mo N mangi bi pala.

² Ti tawadi leni li biigili Lindi ki gaani o Diedo, Ke mi teginma leni yaa bujiali n tiegi Tie o bali kalikaanu tanpuuli.

³ U mu n ye o liiga ki cuoni Ki buondi o yibalinba, Yaaba n gaani ki lindi o.

⁴ O tañigi yendi ŋanduna, Ki tinga yen le i tañigi yeni, Ki yaa digibi.

⁵ A juana nandi nani ti sindi yeni Li Miali Diedo, Ki tinga kuli Diedo nintuali.

⁶ Tanpoli togidi o teginma, I nibuoli mo kuli nua o kpiagidi.

⁷ Yaaba n kpiagidi i buli Leni yaaba n duondi bi yula, Laa bonpendikaala po kuli baa fiagi. I buli mo kuli baa cua, Ki labini o Diedo nintuali ki pugi o.

⁸ Siyon dogu nni, Bi gbadi o laabaalo ki mangi bi pala. Juda dogi ye leni li pamancianli, Kelima fini o Diedo n jia yaa buudi po.

⁹ Fini o Diedo n tie ki tinga kuli Tienu, Yua n ye hali tanpolijoma. A kpiagidi mo kpedi boncianla Ki cie ban ŋua yaala kuli.

¹⁰ Yinba yaaba n bua o Diedo, Yie mani yaala n bia! O kubi o nidugikaaba miana, Ki faabidi ba bi nibiadiba nuu nni.

¹¹ Mi yenma yendi bi niteginkaaba, Li pamanli mo ye yaaba Yaa pala n pieni po.

¹² Yinba bi niteginkaaba, Mangi mani yi pala kelima o Diedo po, Ki yaa pagi o ki go tiani, Ke o gagidi ki ŋani.