Pisomi 96 - U TIENU MAAMA TILI 2013

Pisomi 96 Yiini mani o Diedo po

¹ Yiini mani o Diedo po bu yanpanbu! Yinba ki tinga niba kuli, Yiini mani o Diedo po!

² Yiini mani o Diedo po, Pagi mani o yeli! Yaa wangi mani daali kuli, O faabima laabaalo!

³ Togidi mani o kpiagidi i nibuoli siiga! Togidi i nibuoli kuli siiga O tuonŋanmoana!

⁴ O Diedo yabi ki pundi Ki baa ti pagidi. O pia i jeje ki cie bonla kuli,

⁵ Kelima i nilanbuoli n ŋua yaa buli Ki pia fuomiba kuli. Ama Li Miali Diedo n tagi tanpoli.

⁶ Li bali jigidi leni ti kpiagidi ye o nintuali, U paalu leni ti kpiagidi mo ye O diegagidikaali nni.

⁷ Yinba mi diema nibuoli kuli, Pagi mani o Diedo! Pagi o mani kelima o kpiagidi Leni o paalu po.

⁸ Kpiagi mani o Diedo yeli! Cua mani ki kua o luoli nni leni bu paabu!

⁹ La mani yaa tiadi n gagidi, Ki gbaani o Diedo nintuali ki pugi o. Ki tinga nibuoli kuli n yaa digibi o nintuali!

¹⁰ Yedi mani i nibuoli kuli: «Li Miali Diedo tie Bado. Lani n teni ke ŋanduna kuli se Ki pa ki kan begibi. O Diedo ja i nibuoli kuli buudi Leni mi teginma.»

¹¹ Tanpoli n mangi o pali, Ki tinga mo n yaa ye Leni li pamankandikaali, Mi ñincianma leni yaala n ye Mi niinni kuli n yaa ye leni li pamanli.

¹² Ku muagu leni yaala n ye Ku niinni kuli n yaa ye leni li pamanli. A fuana tiidi kuli n yaa yigini

¹³ Leni li pamanli o Diedo nintuali, Kelima o kpendi. O kpendi ki baa jia ti buudi ki tinga nni. O baa jia li ŋandunli buudi leni mi teginma, Ki jia i nilanbuoli buudi mo leni i moamoani.