Pisomi 94 - U TIENU MAAMA TILI 2013

Pisomi 94 U Tienu baa tuu li panli

¹ Li Miali Diedo U Tienu o pantuulo! U Tienu o pantuulo, doagidi a yuli!

² Fii, fini ki tinga bujialo, Ki pa bi japaadanba bi tuona panpaani.

³ O Diedo, bi nibiadiba baa yaa mangidi Bi pala ki pundi hali u laa yogunu? Bi baa yaa mangidi bi pala hali u laa yogunu?

⁴ Bi maadi mi japaamaama, Ki maadi ki duondi bi yula, Bani bi nibiadiba yeni.

⁵ O Diedo, bi ŋmaadi ki midi bi niba, Ki fiagidi a niba yaaba n tie a piama yeni.

⁶ Bi ñandi li kpepuoli leni o caano miana, Ki kpaani a kpienbila moko.

⁷ Bi tua: «O Diedo naa nua, Jakob Tienu naa faami li po!»

⁸ Yin yaa faami mani, Yinba bi yanpiidanba yeni. Bi yanluodanba yeni, Yi baa baa mi yama beyogune?

⁹ Naani U Tienu yua n puni o nisaalo, Li tubili yeni kan fidi ki gbadi? Naani wani yua n tagi bu nunbu yeni, ki nua?

¹⁰ Naani wani yua n tundi i nibuoli, Kan fidi ki tundi leni fala? Wani n puni bi nisaaliba mi banma.

¹¹ O Diedo bani bi nisaaliba jaga, O bani ke a tie fanme.

¹² O Diedo, li pamanli ye Leni ŋan gobidi yaa nilo, Bi ŋan tundi yua leni a bali maama.

¹³ O yama baa yaa dua mi yebiadima daali, Ke bi gbi ku buogu bi nibiadiba po,

¹⁴ Kelima o Diedo kan ŋaa o niba, O kan ŋaa yaaba n tie o yaa yaaba.

¹⁵ Bi baa guani ki jia ti buudi lan yaa tiegi, Yaaba yaa pala n tiegi kuli baa ŋoadi o puoli.

¹⁶ Ŋme n baa koani leni bi nibiadiba ki todi nni? Ŋme n baa faabi nni Leni yaaba n tiendi yaala n ki tiegi?

¹⁷ O Diedo yàá bi tie n todika, N miali bi baa yaa ye mi kuuma diema nni.

¹⁸ N yaa yedi: «N baa ŋmadi ki baa!» O Diedo, a ŋanbili n yen kubi nni.

¹⁹ Ba ti yanyagidi yaa paagi n yama, A baagidi nni ki mangidi n pali.

²⁰ Naani a pia u juogu leni bi naa bujiabiadiba, Yaaba n miidi li bali maama, ki tiendi ki mabinga?

²¹ Bi yen taani ki fii ki sedi bi niteginkaaba po, Ki mua yua n ki pia tagili mi tuonanma.

²² Ama o Diedo n tua n kaanpaalu! N Tienu n tie min sani ki baa wuoni Yaa tanciangu kani.

²³ O teni ke bi tagili guani ki jiidi bi yula po, Ki teni ke bi sundi bi po, Kelima bi biadima po. O Diedo ti Tienu baa bolini ba.