Pisomi 89 - U TIENU MAAMA TILI 2013

Pisomi 89 U Tienu, a ñoaniani yeni kua le?

¹ Esira buolu yua Etani yanbu.

² N baa yiini ki pagi o Diedo ŋanbili, Hali yaa yogunu kuli. N baa kpaani ki waani a moamoani Nifiima n tuu nifiima.

³ N yedi: «A ŋanbili maa ki se yaa yogunu kuli po. A bili a moamoani tanpoli ke yi se ki pa.»

⁴ A yedi: «N kuani o ŋantaado Leni min gandi yua. N den niani n naacemo Davidi Yaa ñoanianu n tie ne:

⁵ N baa teni a puoliŋuani N yaa se ki pa yaa yogunu kuli. N baa teni a bali kalikaanu mo, N yaa ye nifiima n tuu nifiima.» Joma.

⁶ O Diedo, tanpoli n yaa pagi a Bancianma leni a moamoani, Bi nigagidiŋanba siiga!

⁷ Li Miali Diedo, ŋme n baa tuo Ki biigi o yuli leni a tanpoli po? A bila siiga, ŋme n naani leni a?

⁸ U Tienu, a pia i jeje hali boncianla, A malekinba taancianli nni, Ki go pia i jejeciami yaaba n gaani Ki lindi a kuli po.

⁹ Li Miali Diedo U Tienu U Paaciamu Kuli Daano, Ŋme n pia u paalu nani fini yeni? O Diedo, a moamoani gaani ki lindi a.

¹⁰ Fini n paani mi ñincianma. Ba man fiidi yaa yogunu, A yen teni mi ñingola n guani ki duani suo.

¹¹ Fini n den faligi Ejipiti diema Nani ban faligi yua ki kpa o yeni. A den yadi yadi a yibalinba leni a paalu.

¹² Fini n die tanpoli, fini n die ki tinga moko. Ŋanduna leni yaala n ye lienni kuli, fini n tagi la.

¹³ Fini n tagi nuganu leni nujienu. Tabori leni Hermon juana yiini ki pagi a yeli.

¹⁴ A buagu pia u paaciamu, A nuu mo pia u fidu leni ti kpiagidi hali boncianla!

¹⁵ Mi teginma leni yaa bujiali n tiegi Tie a bali kalikaanu tanpuuli. Li ŋanbili leni i moamoani ye a nintuali.

¹⁶ O Diedo, li pamanli ye Leni yaa nibuolu n yiini i yani ki kpiagidi a, Bani yaaba n cuoni a nunmanga yenma nni.

¹⁷ A yeli teni ke bi ye leni Li pamancianli daali kuli, Ki jigini bi yula kelima a teginma po.

¹⁸ Fini n tie bi fidu kpiagidi, A ŋanbili teni ke ti fidu go pugidi!

¹⁹ O Diedo n tie ti gbankoandigu, Fini Isidayeli Tienu Yua n Gagidi ki ŋani mo n tie ti bado.

²⁰ Hali yogu, a den maadi leni a nidugikaaba Ki yedi ba: «N todi jakoandiyendo, N den gandi niyendo bi niba siiga Ki kaani o ti gbandi po.

²¹ N den gandi Davidi ke wan tua n naacemo, Ki wuli o yuli po mi kpagagidikaama ki gandi o.

²² N nuu baa kubi o, N buagu mo n pugini o paalu.

²³ Yibali kan ludi o, Nibiado mo kan fiagi o.

²⁴ N baa midi o yibalinba o nintuali, Ki faligi yaaba n nani o.

²⁵ N moamoani leni n ŋanbili Baa yaa ye leni o, N yeli mo baa teni o bali n do.

²⁶ N baa teni wan diedi, ki cili mi ñincianma, Ki yaa caa hali i kpenciami.

²⁷ Wani, o baa yaa kpaani ki miadi nni, Ki tua: ‹A tie n baa, n Tienu, Leni n faabima tangu.›

²⁸ N baa teni wan tua n bijakpelo, Yua n yabi ki cie ki tinga nni badiba kuli.

²⁹ N baa doagidi o po n ŋanbili yogunu kuli. Min kuani leni o yaa ŋantaado mo baa yaa se ke li pa.

³⁰ N baa teni o puoliŋuani n yaa ye yogunu kuli, Ki teni omo n waagi ti gbandi po nani tanpoli yeni.

³¹ Li yaa tie ke o bijaba ŋaa n bali maama, Ki naa cuoni nani N ñoamabonbilikaana n bili maama,

³² Bi yaa miidi n ñoamabonbilikaana, Ki naa kubi n mabilikaama,

³³ N baa koani leni ba bi yiema po leni u gbiamu, Ki pua ba, ki tundi ba bi tagili po.

³⁴ Ama ba leni lani kuli, N kan teni n ŋanma n gbeni o po. N kan kua mini leni wani siiga danlimuanu.

³⁵ N kan fidi n ŋantaado, N kan lebidi yaa maama n ñani n ñoabu nni.

³⁶ N den poli hali n gagidiŋanma po, ki yedi: ‹N kan pua Davidi mi faama.›

³⁷ O puoliŋuani baa yaa ye yaa yogunu kuli. O bali kalikaanu baa yaa ye yogunu kuli, N nintuali nani u yienu yeni.»

³⁸ O baa yaa ye yaa yogunu kuli Nani o ŋmaalo yeni, Wani yaa siedo n ye ti tawadi nni yeni tie nidugika. Joma.

³⁹ Ama ba leni lani kuli a yie, Ki luni ŋan gandi yua, Kelima a pali beni o po.

⁴⁰ A fidi a ŋantaado leni a naacemo, Ki cagini o badifogiliga, ki luni ka tiipo.

⁴¹ A mudi u dogu bilini kuli. A teni ke u kaanpaali kuli tua diegbendi.

⁴² Bi santagiba kuli fagi u piama, Ke u tua i fe bonla u yieninlieba kuli siiga.

⁴³ A pugini u dogu yeni koanginkaaba u fidu, Ki mangi u yibalinba pala.

⁴⁴ A teni ke o noadi o jugisiega, ki muu o yuli. Ŋaa todi o bu toabu nni.

⁴⁵ A gbeni o bali kpiagidi, Ki luni o bali kalikaanu tiipo.

⁴⁶ A koabigi o panma dana, Ki teni ke o laa i fe boncianla. Joma.

⁴⁷ O Diedo, a baa yaa wuo ki pundi Hali u laa yogunu yo? Hali beyogunu yo ke a pali Baa yaa be nani u mu yeni?

⁴⁸ Tiadi n miali foaginu n da maama. A tagi bi nisaaliba kuli ke bi miali dana ki fuu.

⁴⁹ O laa nilo n baa fidi ki yaa ye ki kan kpe, Bi ki faabi o naano leni bi tinkpiba diema paalu? Joma

⁵⁰ O Diedo, u yogu nni Ŋan den tiendi yaa tuonŋama yeni kua le? Ŋan den poli a teginma nni Ki niani Davidi yaa ñoaniani yeni kua le?

⁵¹ O Diedo, tiadi a naacenba n laa yaa fe kuli po. Mini n tugi laa niba kuli yaa yuli.

⁵² O Diedo, tiadi ke a yibalinba Fiagidi ŋan gandi yaa bado, Ki sugidi o wan gedi naankani kuli.

⁵³ O Diedo yeli n baa ti pagidi, Yaa yogu n tuu yaa yogu kuli po! Amina! Amina!