Pisomi 88 - U TIENU MAAMA TILI 2013

Pisomi 88 Mii go foagi leni mi kuuma

¹ Kore buolu yanbu. Bi yanyinba yudaano yani siiga yanbu, ban yiini yaabu leni li paboanli nialu. Esira buolu yua Emani yanbu.

² O Diedo n Tienu, n faabika. N kpaani ki miadi a todima, U yensiinu leni ku ñiagu kuli.

³ Gbadi n po n jaandi, Diadi a tubili ki cengi Min kpaani ki miadi a yaala!

⁴ N laa fala buoli kuli n yema nni, Mii go foagi leni mi kuuma.

⁵ Bi coadi ki taagi nni leni yaaba N ji mi kuuma buogu nni, N ji tie nani yaa nilo n ki go pia fidu yeni.

⁶ N ji dua bi tinkpiba siige, Ki naani leni ban kpa yaaba Ke bi dua a takula nni yeni. Ŋaa go faami bi po, Ŋaa go tiendi bi po liba kuli.

⁷ A luni nni ku buoñuangu nni, Mi kuuma biigicianli nni.

⁸ A pabienli jagi n yuli po, Nani a ñingola yeni, ki coagini nni boncianla. Joma

⁹ A teni ke n danlinba sani ki ŋaa nni. A teni ke n tua nani ban sengi yaala yeni. Diidi, n ye fala nni ki kan fidi ki ña lienni.

¹⁰ N nuni dingidi kelima li paboanli po. Daali kuli o Diedo n yi ŋa ke ŋan cua ki todi nni. N tandi n nii a po ki miadi a.

¹¹ Naani bi tinkpiba po yo Ke a baa tieni mi bancianma? Naani bi tinkpiba baa fii ki pagi a. Joma

¹² Naani bi baa togidi a ŋanbili li takuli nni, Bi ki togidi a moamoani mi kuuma kulu nni?

¹³ Naani laa biigili kaanu, Bi bani a bancianma po? Naani mi yansuma diema yeni niinni, Bi bani a teginma po?

¹⁴ Ama mini wani, n kpaani Ki miadi a mi todima, Tiŋaagu kuli n jaandi a.

¹⁵ O Diedo, be teni ke a yie nni? Be n teni ke a buli nni a nunga?

¹⁶ Hali n bonwaama nni, N tie ninñinnilo yo, Kaa foagi leni mi kuuma. A jiendi nni hali boncianla, Ki teni ke n yama paagi.

¹⁷ A pabiencianli jagi n yuli po, A jawaanciandi fii ki bolini nni.

¹⁸ Ti gaani ki lindi nni Nani a ñingola yeni daali kuli. Li taani ki ŋoagini nni yenma.

¹⁹ A teni ke n danlinba Leni n yegininlieba kuli ŋaa nni. Li biigili bebe n ji tie n yegininlielo.