Pisomi 86 - U TIENU MAAMA TILI 2013

Pisomi 86 N fala nni, n kpaani ki yi fine

1 Davidi jaandi.

¹ Davidi jaandi. O Diedo, diadi a tubili ki guani n po, Kelima n tie ninñinnilo ki go luo mo.

² Guudi n miali kelima n ŋua ŋa bonŋanla. Fini n Tienu, faabi a naacemo yua n dugi a po.

³ Gbadi n po mi ninñima n Diedo, Kelima n mua ki miadi a todima yogunu kuli.

⁴ Mangi a naacemo pali o Diedo, N pegidi n pali kuli ki nua fine.

⁵ Fini o Diedo, a ŋani ki puuni sugili, Ki pia li ŋanbili yaaba n jaandi a kuli po.

⁶ O Diedo, diadi a tubili ki cengi n jaandi, Ki cengi n miamoanbu nialu!

⁷ N paboanli daali, n baa yini a, Ŋan tuo n po.

⁸ O Diedo, i tieni siiga oba kuli ki da leni a! Tuonliba kuli ki naani leni a yaa tuona!

⁹ O Diedo, ŋan tagi yaa nibuoli kuli baa cua, Ki gbaani ki pugi a ki kpiagi a yeli.

¹⁰ Fini, a yabi ki go tiendi mi bancianma. Fini bebe n tie U Tienu.

¹¹ O Diedo, bangi nni a sanbila. N baa yaa cuoni a moamoani nni. Pa nni yaa pali n dingi, Ke min yaa fangi a yeli.

¹² N Diedo, n Tienu, N baa pagi a yeli leni n pali kuli. N baa yaa kpiagidi a yeli yogunu kuli,

¹³ Kelima a ŋanbili yabi n po hali boncianla. A faabi nni leni mi kuuma buogu.

¹⁴ Ŋain U Tienu, bi japaadanba fii ki sedi n po. Bi tugumoandanba taani ki bua ki ñani n miali. Baa faami a po.

¹⁵ Ama fini, o Diedo, a tie Yaa Tienu n gba mi ninñima, Ki go pia ti bulicindi. A pali ki be tontoni, ki pia li ŋanbili, Ki go tie ti dugidi daano.

¹⁶ Noanli nni, ki gbadi n po n mi ninñima. Pa a naacemo u fidu, Ki faabi a puotuado bijua.

¹⁷ Tieni n po yaa maalima n waani Ke a ŋanbi n po! I fe n nandi yaaba n nani nni, Bi yaa laa ke fini o Diedo todi nni, Ki go baagidi nni.