Pisomi 85 - U TIENU MAAMA TILI 2013

Pisomi 85 O Diedo maadi mi yanduanma maama

¹ Bi yanyinba yudaano yani siiga yanbu. Kore buolu yanbu.

² O Diedo, a ŋanbi a diema po, Ki teni ke Jakob puoliŋuani Ñani ti yonbidi ki kpeni.

³ A ñani a niba tagili, Ki puni ba bi tuonbiadi sugili. Joma

⁴ A kuugi a pali ti po, Ki teni ke a pabienli ki go ye ti po.

⁵ Guani ki mangi ti yema, Ti faabima Tienu, Ki kuugi a pali ti po!

⁶ Naani a pabienli baa yaa ye ti po Hali nifiima n tuu nifiima yo? Naani a pabienli kan baa bianu?

⁷ Naani fini ka baa guani, Ki teni tin yaa fo? Lani n tie a niba pala n mangi a po.

⁸ O Diedo, teni tin le a ŋanma! Ŋan pa ti a faabima.

⁹ N baa cengi U Tienu o Diedo N yedi yaala, kelima o maadi o niba, Bani yaaba n ŋua o yeni Mi yanduanma maama, Ke ban da go guani bi yanluoma nni.

¹⁰ Moamoani, o faabima ki go foagi Yaaba n fangi o po. Ti kpiagidi mo n yaa ye ti diema nni.

¹¹ Li ŋanbili leni i moamoani tuogi, Mi teginma leni mi yanduanma gobini biyaba.

¹² I moamoani pani ki tinga nni, U Tienu teginma biindi hali tanpoli ki diidi.

¹³ O Diedo puuni mi yemanma, Ti diema mo go baa luoni Mi bonluonkaala.

¹⁴ Mi teginma cuoni o Diedo nintuali, Ki baa bogini o po u sanu.