Pisomi 83 - U TIENU MAAMA TILI 2013

Pisomi 83 Isidayeli yaaba miadi bi yibalinba bodima

¹ Asafi yanbu.

² Ŋain U Tienu, da ŋmini suo! Da ŋmini, U Tienu, da tie suo ba!

³ Diidi a yibalinba n pia yaa fuugu! Yaaba n nani a fii ki sedi leni mi yiema.

⁴ Bi fii leni i janbi yantiali a niba po, Bi taani ki juogidi ŋan kubi yaaba po.

⁵ Bi tua: «Cua mani tin bolini laa nibuolu, Ban da go taa Isidayeli diema yeli!»

⁶ Bikuli taani ki juogi, Ki bili ke bi baa taani ki koani leni a.

⁷ Bani yaaba n ye Edomi gbandiena nni Leni Isimayeli, Moabi yaaba, Hagali yaaba,

⁸ Gebali yaaba, Anmoni yaaba, Amaleki yaaba, Filisiti yaaba Leni Tiiri yaaba kuli.

⁹ Asiiri yaaba moko cua ki taani leni ba, Ke bikuli cua ki baa taani ki todi Loti puoliŋuani. Joma

¹⁰ Tieni ba nani ŋan den tieni Madiani yaaba maama, Nani Sisera leni Yabini Kisoni kpenu kani maama yeni.

¹¹ Bi bolini ba Eni-Dori dogu nni, Ke bi tua bugidi ki tinga po.

¹² Tieni bi gobidikaaba nani Ŋan den tieni Orebi leni Sebi maama yeni. Tieni bi badiba mo nani ŋan den tieni, Seba leni Tisalimuna maama yeni.

¹³ Bani n den tua: «Tin diedi U Tienu n die yaa tinga yeni.»

¹⁴ N Tienu, teni ban tua nani o pinpinjoa, Nani yaa muakuondi ke ku faagu taa Ki ban cuoni yeni.

¹⁵ Nani u mu n yen sia li fuali maama yeni, Nani i mukaani n yen juu a juana maama yeni,

¹⁶ Ŋoadi ki deli ba leni ku tafaagu. Jieni ba leni ku faabiadigu.

¹⁷ Teni i fe n cuo ba hali yaala Ke bi baa pegidi ki noanli fini o Diedo.

¹⁸ Teni ban yaa ye leni i fe Leni ti jawaandi yaa yogunu kuli po. Teni ban le i fe, ki bodi cain!

¹⁹ Yeni bi baa bandi ke fini bebe Yaa yeli n yi Li Miali Diedo, Ke fini n tie Tanpoli Badiciamo Ki tinga kuli po!