Pisomi 80 - U TIENU MAAMA TILI 2013

Pisomi 80 Isidayeli Yankpaalo, cengi!

¹ Bi yanyinba yudaano yani siiga yanbu, ban yiini yaabu leni ku gogidigu. Mi tiadima yanbu. Asafi yaabu.

² Diadi a tubili, Isidayeli yaaba Yankpaalo, Fini yua n gobidi Josefi puoliŋuani nani u yankulu yeni. Fini yua n kaa ti gbandi po selubanba siiga, Doagidi a yuli a kpiagiciandi nni.

³ Waani a paalu Efrayimi, Benjamen Leni Manase buolu nintuali, Ki cua ki faabi ti.

⁴ Ŋain U Tienu, teni tin guani ki cua a kani. Mangi a nunga ti po, lani ti baa faabi.

⁵ Li Miali Diedo U Paaciamu Kuli Daano, A pali baa yaa be ki pundi hali U laa yogunu yo, a niba jaandi po?

⁶ A teni ke bi ye leni li paboanli, Ki teni ke ti nunsiidi n tua bi bonñokaala,

⁷ A teni ke ti tua ti yieninlieba koanginkaaba. Ti yibalinba mo ñuadi ti.

⁸ U Tienu U Paaciamu Daano, Teni tin guani ki cua a kani! Mangi a nunga ti po, lani ti baa faabi.

⁹ A den ŋabi bu duventibu Ejipiti diema nni, Ki deli i nilanbuoli ki ŋuu bu.

¹⁰ A den ŋanbi bu po u kaanu, Ke bu jiini n fidi ki feli bonŋanla, Ki nan gbieni mi diema kuli.

¹¹ A juana den ye bu soangu nni, Ke bu beni mo tie nani U Tienu yaa sediri tiidi yeni.

¹² Bu beni den talini ki pundi mi ñincianma, Ke bu benkpela mo pundi u kpenciamu po.

¹³ Be n teni ke a tieni a bona ku goanguongu nni? Be n teni ke bi santagiba kuli sobidi bu bonluonkaala?

¹⁴ O muaduolo biidi bu tibu yeni, Ti moayandi kpendi ki ŋmani bu faadi.

¹⁵ Ŋain, guani ki cua o Diedo U Paaciamu Kuli Daano! Fini yua n ye tanpoli, diidi ki le, Lan n tie maama, Ki faabi bu duventibu yeni.

¹⁶ Ŋan ŋuu yaala fini a ba yeni, kubi la. Fini n teni ke laa duventibu yabidi!

¹⁷ Yaaba n pedi bu, ki juu bu, N bodi kelima a baa fu leni ba.

¹⁸ A nuu n yaa maa yaa joa n ye A jienu yeni po, ki kubi o. Wani, ŋan puni yua u paalu yeni!

¹⁹ Ti kan go jadi ki ŋaa a sanu. Teni tin yaa ye, Lani, ti baa yaa kpiagidi a yeli.

²⁰ Li Miali Diedo U Paaciamu Kuli Daano, Teni tin guani ki cua a kani! Mangi a nunga ti po, lani ti baa faabi.