Pisomi 78 - U TIENU MAAMA TILI 2013

Pisomi 78 Isidayeli yekpelima n bangi yaala

1 Asafi yanbu.

¹ Asafi yanbu. N niba, cengi mani n bangima bonŋanla! Diadi mani yi tuba ki cengi min baa yedi yaala.

² N yaadi n ñoabu ki baa pua mi kpanjama, Ki doagidi u yogu nni bonbangikaala,

³ Tin den gbadi yaala ki bandi la, Ti danba n togidi ti yaala.

⁴ Ti kan wuoni bi bila laa bonla. Ti baa togidi yaa nifiima n ŋua O Diedo kpiagidi, o paalu Leni wan tieni yaa bancianma.

⁵ O den bili siedi Jakob buolu po, Ki bili li bali maama Isidayeli diema nni. Laa bali maama den bili Ke ti baanba n bangi bi bila laa bonla kuli.

⁶ Lani n tie ke yaa nifiima N baa fii n bandi ma, Ki mo n bangi yaaba n ŋua, Bani mo n bangi bi bila,

⁷ Ke ban dugi o Diedo po, Ki da sundi wan tieni yaala, Ki go tuo o bali maama mo,

⁸ Ke ban da tie nani bi baanba, Bani yaa nibuolu n ki pia maanli, Ki nan go pia mi yiema mo yeni. Bi pala ki se kaanyendu, Bi yama mo ki ye U Tienu kani bonŋanla.

⁹ Efrayimi buolu, yaaba n toa a dabana Lebidi ki sani bu toabu daali.

¹⁰ Baa den kubi U Tienu N den kuani leni ba yaa ŋantaado. Bi den yie kaa tuo ki ŋoadi o bali maama.

¹¹ Bi den sundi wan den bili yaa jama, Leni wan den tieni yaa bancianma kuli po.

¹² O den tieni mi bancianma bi baanba nintuali Ejipiti diema nni, ki goa Tisoani dogu po.

¹³ O den boagidi mi ñincianma Ki teni ke bi tagi. O den teni ke mi ñima Sedi kaanyendu nani i bilini yeni.

¹⁴ O den gobidi ba u yensiinu Leni ku tawaligu, ku ñiagu mo Leni u mu yenma.

¹⁵ O den yagidi a tanciama Mi fanpienma nni, Ki puni ba mi ñima ke bi ñuni.

¹⁶ O den teni ke mi ñima bundi Ku tanciangu nni ki puubi ki wuliti, Nani i kpenciami yeni.

¹⁷ Ama bi den baa ki tiendi ti tuonbiadi Leni mi yiema Tanpoli Badiciamo po, Yaa fanpienma n bia yeni niinni.

¹⁸ Bi den biigi U Tienu bi pala nni, Ki miadi ban bua yaa jiema.

¹⁹ Bi den maadi U Tienu po mi mabiadima Ki yedi: «Naani U Tienu baa fidi Ki pa ti mi jiema mi fanpienma nni?»

²⁰ O nan pua ku tangu ke mi ñima Pudi ki puubi boncianla, Ama, naani o baa fidi ki pa O niba kuli mi jiema leni ti nandi?

²¹ Yeni de! O Diedo den gbadi lani, Ke o pali beni boncianla. U mu den cuo Jakob po, O pali den beni Isidayeli yaaba po,

²² Kelima baa den dugi U Tienu po. Baa didi den dugi o faabima po mo.

²³ O den maadi leni tanpoli tawadi Ki luodi tanpoli buliñoana.

²⁴ O den teni ke manni mini Bi po ki tua bi jiema. O den puni ba tanpoli ŋalikama,

²⁵ Ki den soani bi po mi jiema Ban den bua yaa bianu kuli. Bi niba den dini malekinba jiema.

²⁶ O den teni ke puoli faagu figi tanpoli po. Leni u paalu, o den cuani nuganu faagu.

²⁷ O den teni ke ti nandi jiidi bi po Nani mi wagima yeni, Ke i nuani mo yabidi nani mi Ñincianma tanbiima yeni.

²⁸ O den teni ke bi ŋmadi ki baa bi nagili siiga, Ki gaani ki lindi bi diema.

²⁹ Bi den dini ki guo bonŋanla. U Tienu den cuani bi po ban bua yaala.

³⁰ Ama hali ke bi daa den dini ki guo cain, Ke mi jiema da den baa ki ye bi ñoana nni,

³¹ U Tienu pali den beni bi po boncianla. O den kpa bi siiga yaaba n pia U gbanmanu ki cie, Ki go kpa Isidayeli nipanba.

³² Ba leni lani kuli, bi go den tieni ti tuonbiadi. Baa den dugi o bancianma po.

³³ O den teni ke bi miali dana Ya n ki pia fuoma yeni baa u bianu, Ki teni ke mi yebiadima ludi ki dini ba.

³⁴ U Tienu den teni ke mi kuuma cua bi kani, Ke bi guani wani U Tienu kani, Ki lingi o todima.

³⁵ Bi den tiadi ke U Tienu n tie bi gaaka, Ke tanpolijoma Tienu n tie bi todika.

³⁶ Ama bi den boandi o leni bi maama, Ki pua o mi faama leni bi landi.

³⁷ Baa den se o kani leni bi pala kuli cain, Baa den kubi ban kuani leni o yaa ŋantaado bonŋanla.

³⁸ Ama wani yua n pia mi ninñingbadima, Den puni ba sugili bi tagili po, Ki naa bolini ba. Yogunu boncianla o yen ñiigi o pali, Ki tiendi li juunli.

³⁹ O yen tiadi ke bi tie nisaaliba bebe, Yaa fuoma n baa gedi ki kan guani.

⁴⁰ Yogunu boncianla bi yen fiini o po Mi yiema mi fanpienma nni, Laa tinkuonga nni bi yen fii ki cidi o.

⁴¹ Bi den guani ki cili ki biigidi U Tienu, Ki kua Isidayeli Tienu Yua n gagidi ki ŋani biili nni.

⁴² Bi naa den tiadi o paalu po, Baa den tiadi wan den faabi ba yaa daali Bi yibalinba nuu nni

⁴³ Leni wan den tieni bi po Yaa bancianma Ejipiti diema nni, Ki taani leni wan den tieni Yaa bonlidinkaala Tisoani diema nni.

⁴⁴ O den teni ke bi kpenciamu Nili Kpentaana kpandi soama, kaa pia ñoma.

⁴⁵ O den soani bi kani i sibiadi ke yi dini ba, Ke a loanda mo jugi bi yema.

⁴⁶ I naaci den bolini bi kpaandi, A dondoba mo den biani bi tuonli fanma.

⁴⁷ O den teni ke a tatana bolini bi duventiidi, Ki teni ke mu tabiadimu mo jugi bi sikomori tiidi.

⁴⁸ O den teni ke a tatana bolini bi yandi, Ki teni ke ki taaga mo den tiani bi yankuli.

⁴⁹ O den teni ke o pabiencianli, O pabienbiadili, o pafiima Leni o paboanli baa Ejipiti yaaba po, Ki den teni ke mi kuuma malekinba baa ba.

⁵⁰ O den teni ke o pabienli soani li tuonli. O den teni ke mi kuuma cua bi kani, O den soani bi po u yianbiadipuodiko.

⁵¹ O den kpa Ejipiti diema bonjakpiala kuli, Bani Kam puoliŋuani siiga Ban mali yaaba bi panma nni, Ki kaa a gbandiena nni.

⁵² O den ñani o niba nani ti yanbidi, O den pigi ba nani u yankulu yeni Mi fanpienma nni.

⁵³ O den gobidi ba leni mi yanduanma, Ke jawaandi ki pia ba. Mi ñincianma den milini bi yibalinba.

⁵⁴ O den yuandi ki kuani ba o tinŋanga nni, Wan den koani wani o ba Ki diedi yaa juali yuli po.

⁵⁵ O den deli i nilanbuoli bi nintuali, Ki taa bi diema ki puni Isidayeli yaaba, Ki teni ke bi diedi Kanana Yaaba diema ki kali mi niinni.

⁵⁶ Bi den fiini mi yiema U Tienu Tanpoli Badiciamo po. Bi den biigidi o, Ki yie o ñoamabonbilikaana.

⁵⁷ Bi den sani ki foagidi, Ki tua janbi danba nani bi baanba, Bi nani yaa dabanbaabu n yoaligi yeni.

⁵⁸ Bi den fiini o pali leni ban den padi A juana po padibinbina ya yaa kani. Bi den fiini o nunponli Leni ban den tieni yaa nannana.

⁵⁹ U Tienu n den laa laa bonla, O pali den biidi boncianla Ke o yama sii Isidayeli yaaba.

⁶⁰ O den ŋaa Silo diegu, Wan den tii yaa gbandieli Ki ye bi niba siiga yeni.

⁶¹ O ŋantaadikpaku yaagu n tie O paalu leni o kpiagidi maalima, O den teni ke yibalinba diedi ku, Ki gedini ku bi denpo.

⁶² O pali den beni o niba po, Ke o teni ke bi yibalinba kpa ba.

⁶³ U mu den dini bi jawaaba. Baa den yini i ñiigiyani bi jafanba po.

⁶⁴ Bi kopadicianba den kpe bu toabu nni, Ke bi kpepuona mo ki buudi bi po.

⁶⁵ O Diedo den fii yenma Nani yaa joa n bi goa yeni, Bi nani mi daama n fiini yaa jakoando gbanu yeni.

⁶⁶ O den ŋoadi ki deli o yibalinba, Ki fiagi ba yaa fe n ki pia gbenma.

⁶⁷ O yama den sii Josefi puoliŋuani. Waa den gandi Efrayimi buolu ka.

⁶⁸ Ama, o den gandi Juda buolu yo, Ke o yantiali mo sedi Siyon juali po.

⁶⁹ O den maa o kaangagidiŋamu Ke u pa nani yaa kaani n kpedi Nani wan den tagi ki tinga yaaga, Yaa yogunu kuli po yeni.

⁷⁰ O den gandi Davidi ke o tua o naacemo. O den gedi ki ban ñani o li yanloli po yo.

⁷¹ O den ñani o o yankulu puole, Ke wan tua Jakob puoliŋuani yankpaalo, Bani Isidayeli niba yaaba n tie o piama yeni.

⁷² Davidi den soani laa tuonli Bonŋanla leni li papienli. O den gobidi U Tienu niba leni mi yanfuoma.