Pisomi 74 - U TIENU MAAMA TILI 2013

Pisomi 74 U Tienu, faabi a diema

1 Asafi bijaba yani siiga yanbu.

¹ Asafi bijaba yani siiga yanbu. U Tienu, be n teni ke a ŋaa ti Yaa yogunu kuli po? Be n teni ke a pali fii a yankulu po?

² Tiadi a niba po, Ŋan den daa ki faabi yaaba hali yogu, Ŋan den daa ki faabi yaaba ke bi tua a yaaba. Tiadi Siyon juali po, ŋan den ye naani.

³ Fii ki gedi ban bolini yaa kaanu yeni po. Yibali pua ki biidi u kaangagidiŋamu bonla kuli.

⁴ A yibalinba kpaani bi paadima po, Ki ñani a maalima li jaandieli nni, Ki tieni bi yaa maalima.

⁵ Bi cua nani a dakpaagila, Yaaba n kubi bi yala li fuali nni yeni.

⁶ Bi den taa bi tuatuamu leni bi yala, Ki pua ki yagidi, Ban den ceni yaa daadi ke ti ŋani kuli.

⁷ Bi den juu a diegagidikaali u mu, Ki mudi ki cagini a yeli n ye naani.

⁸ Bi den tua bi pala nni: «Tin taani ki tieni ba u paalu Ki juu ban taagi ki jaandi Naankani kuli mi diema nni.»

⁹ Tii go nua a yema maalima ti siiga, Saawalipualo mo ki go ye. Ti siiga nni oba kuli mo ki bani, Laa bonla n baa waagi yaa bianu.

¹⁰ Ŋain U Tienu, ki mabinga daano Baa yaa sugidi a, ki pundi u laa yogunu? Yibalinba baa yaa ñuadi a yeli ki kan cedi Ki pundi u laa yogunu?

¹¹ Be n teni ke a poali a buagu Kaa tiendi liba? Tandi a buagu ki bolini ba.

¹² Hali u yogu nni, U Tienu tie bado. Wani yua n puuni mi faabima ki tinga nni.

¹³ Fini n den teni ke mi ñincianma Boagidi kaanilie kelima a paalu po. A den mudi mi ñincianma yanbiaditi yula.

¹⁴ Fini n den mudi o bonfuodibiado yula, Ki teni ke o tua yaa tanboe n ye Mi fanpienma nni jiema.

¹⁵ Fini n den teni ke mi ñima pudi A ñinbuna leni i kpeni kuli nni. Fini n den teni ke yaa kpenciami N kan ñuudi kuodi kelikeli.

¹⁶ Fini n die u yensiinu leni ku ñiagu. Fini n tagi o ŋmaalo leni u yienu.

¹⁷ Fini n bili ki tinga bianu. Fini n tagi li fali leni ku siagu.

¹⁸ O Diedo, tiadi ke yibali sugidi a. Yaa nibuolu n ki pia yama fali a yeli.

¹⁹ Da taa mini a kpaajiega miali Ki teni ti moayandi, Ki da sundi a ninñinniba miana po abada.

²⁰ Faami a ŋantaado yeni po bonŋanla, Kelima mi diema nni wuonkaani kuli Gbie leni ki mabinga.

²¹ Da tuo ban mabini yua n kuni leni i fe. Teni a luoda leni bi ninñinniba n pagi a.

²² U Tienu, fii ki koani ki gaa a yuli. Tiadi bi yanluodanba yaaba N den sugidi a daali kuli yeni po.

²³ Da sundi a yibalinba tantani Leni yaaba n fii ki se a po fuugu po.