Pisomi 73 - U TIENU MAAMA TILI 2013

Li titaali 73—89 Pisomi 73 Bi nibiadiba n baa juodi maama

1 Asafi yanbu.

¹ Asafi yanbu. Moamoani U Tienu ŋani Isidayeli Leni yaaba yaa pala n tiegi kuli po.

² Ama li den poadi waamu bebe min tuudi, Li den poadi waamu bebe min ŋadi ki baa.

³ N den poni leni bi japaadanba, Kelima n den nua ke bi nibiadiba baali pugidi.

⁴ Liba kuli naa den poadi ba hali bi kuuma. Bi gbananbili ŋani, ke bi go gbengidi.

⁵ Baa laadi bi niba kuli n laadi yaa duoli, Baa laadi bi niba kuli n laadi yaa fala mo.

⁶ Bi la ti japaadi nani i laani yeni, Ki goli ku tugumoangu nani bu kpalibu yeni.

⁷ Bi nunmu kuli ñuliti bonŋanla. Bi pala n tia yaala pendi u bianu.

⁸ Bi ñuadi, ki maadi leni mi biadima, Ki pia mi japaamaama.

⁹ Bi yaadi bi ñoana ki sugidi tanpoli, Bi landi mo ki cedi ki tinga nni liba.

¹⁰ Lani n teni ke bi niba pegidi ki ŋua ba, Ki ñu bi maama nani mi ñima yeni.

¹¹ Lanwani, bi yedi: «U Tienu baa tieni lede ki bandi? Naani mi bandima ye tanpoli Bado kani?»

¹² Bi nibiadiba tie yene. Yogunu kuli bi yema mani bi po, Ke bi pugidi bi piama.

¹³ Lanwani, mini wani den li pendi N pali fanma fanme, Ki nidi n nii ki wangi ke mii pia tagili,

¹⁴ Kelima daali kuli n laadi fala. Tiŋaagu kuli n buudi fala bili ki guu nni.

¹⁵ N yaa den jagi ke n baa maadi Nani bani yeni, N den baa janbi a bila buolu.

¹⁶ N den kpaagi bonŋanla ki bua Ki bandi lan tie yaala, N den sua ke li pa n po boncianla.

¹⁷ Min pundi U Tienu kaangagidiŋamu nni Yaa daale ke n bandi, Bi nibiadiba juodima N baa tua maama.

¹⁸ Moamoani de! A sieni ba ban baa ŋadi naankani, Ki pieni ki luni ba fala nni.

¹⁹ Bi bodi yenma lede nne! A bolini ki gbeni ba Leni ti jawaanludikaadi.

²⁰ Nani o nilo n yen fundi Ki fali o dangidi maama, O Diedo, a baa fii ki fali bi jinjindi yene.

²¹ Min den ye leni li paboanli, Ke n pali beni ki duodi yaa yogunu,

²² N den tie yanpiidaano kaa bani liba kuli, N den tie nani ki yanga yene a nintuali.

²³ Ba leni lani kuli, n baa ki ye leni a. A cuo n jienu.

²⁴ A gobidi nni leni a tundi, Li yaa puoli, a baa kuani nni Ti kpiagidi nni.

²⁵ N nan go pia ŋme yo tanpoli po Ke laa tie fini? Ki tinga nni mo, liba kuli ki mangidi N pali kaa tie fini.

²⁶ N gbanandi leni n pali kuli Baa fidi ki tadigi, Ama yogunu kuli U Tienu tie N pali n jigini yua, Wani n tie n biinu.

²⁷ Yaaba n sani ki foagidi a kani baa bodi, Yaaba n yie ŋa, a baa bolini ba.

²⁸ Mini wani, ki nagini U Tienu, N tie yaala n mani n po. N bili n dugidi o Diedo U Tienu kani, Yeni, n baa togidi ŋan tieni yaala kuli.