Pisomi 72 - U TIENU MAAMA TILI 2013

Pisomi 72 U Tienu, teni o bado n yaa tiegi

1 Salomon yanbu.

¹ Salomon yanbu. U Tienu, bangi o bado Wan baa jia ti buudi maama. Pa o bado bijaba mo a teginma!

² Teni wan jia a niba buudi leni mi teginma, Bi ninñinniba mo yaa buudi mo, Nani lan tiegi maama.

³ A juana baa cuani mi yanduanma bi niba po, A joabila mo n cuani ma kelima mi teginma po,

⁴ Teni o bado n jia yaa buudi n tiegi Bi ninñinniba po, Ki faabi mi diema luoda, Ki ŋmaa ki midi yua n mabindi ba.

⁵ Hali o ŋmaalo leni u yienu N baa yaa ye yaa yogunu kuli, Hali u yogunu juodima, A niba baa yaa fangi a.

⁶ Teni o bado n yaa tie Nani yaa taaga n mini u kuanu nni yeni! Wan yaa tie nani yaa tacianga N cua ki kpidi ki tinga yeni!

⁷ Laa dana nni o niteginka yema baa mangi. Teni o ŋmaalo mo n yaa ye yaa yogunu kuli, Mi yanduanma n baa ki yaa ye!

⁸ Teni o bado n yaa die mi naa ñincianma kunu, Ki gedi hali miyama kunu, Ki cili u kpenciamu Efrati, Ki yaa caa hali u tinbianu.

⁹ Yaa niba n kaa mi fanpienma nni Baa gbaani o nintuali ki pugi o. O yibalinba baa lia mi tama.

¹⁰ Tarsisi diema leni a kpendega badiba Baa soani o po bu paabu. Seba leni Saba diema badiba Moko baa cuani bi paabu.

¹¹ Bi badiba kuli baa gbaani o nintuali, I nibuoli kuli baa yaa tuuni o po,

¹² Kelima o baa faabi yaa ninñinnilo N kpaani ki mia o todima, Ki taani leni yaa luodo n ki pia todika.

¹³ O baa gbadi o tadimo leni o luodo ninñima. O baa faabi a luoda miana.

¹⁴ O baa faabi ba ki mabinga leni ku tugumoangu, Kelima bi miana pia mi fuoma o po.

¹⁵ Teni o bado n waagi ki ye! Ban yaa puuni o Saba diema wula. Ban yaa jaandi o po yogunu kuli. U Tienu seli n yaa ye o po yogunu kuli!

¹⁶ Teni ŋalikama n yaa dua mi diema nni. Teni ŋalikama n yaa ye ba a juana yula po, Nani Liban juana yaa tiidi yeni. Bi niba baa yaa yabidi u dogu nni Nani ti muadi n yen pudi ki tinga nni maama.

¹⁷ Teni o bado yeli n yaa ye yogunu kuli, Ki waagi ki ye mi tinfanma nni! Bi niba baa yaa taagi o yeli ki gaaliti biyaba. I nibuoli kuli n taani ki yedi: «Li pamanli ye leni o bado yeni.»

¹⁸ Li Miali Diedo U Tienu, Isidayeli Tienu n baa ti pagidi! Wani bebe n tiendi mi bancianma.

¹⁹ O yeli n baa ti pagidi! Ki tinga kuli n gbie leni o kpiagidi! Amina! Amina!

²⁰ Isayi bijua Davidi jaandi juodima n yeni!