Pisomi 71 - U TIENU MAAMA TILI 2013

Pisomi 71 O Diedo, da lu nni min podi yaa yogunu

¹ O Diedo, n sani ki wuoni a yaa kane, Da teni min fiagi.

² A teginma po, gaa nni, ki faabi nni. Diadi n po a tubili ki faabi nni.

³ Tua n po min baa fidi Ki wuoni yaa tangu kani. Ŋan teni min yaa kpendi yogunu kuli, Ki baa ki faabi, Kelima a tie n tangu leni n kaanpaalu.

⁴ N Tienu, teni min ciadi o nibiado, Bi tugumoandanba leni bi nikpaanba nuu nni,

⁵ Kelima o Diedo n Tienu, fini n tie n suginma! N dugi a po hali n bonwaama nni.

⁶ Hali n naa tugu nni n dugi a yaa po yo, Fini n teni ke n ñani n naa tugu nni. Fini n tie min baa yaa pagi Yua yogunu kuli.

⁷ N tie bi niba boncianla po bonlindinkaala. Fini n tie n wuonkaanmoanu yuu n pa.

⁸ N ñoabu n yaa gbie leni a pagidi Leni a jigidi daali kuli!

⁹ Da lu nni min podi yaa yogunu, N gbanmanu yaa wadi mo, Ŋan da ŋaa nni.

¹⁰ N yibalinba maadi n maama, Yaaba n bua ki ñani n miali juogi

¹¹ Leni biyaba ki tua: «U Tienu luni o, Tin ŋoadi ki deli ki cuo o mani. Niloba naa ye ki baa faabi o.»

¹² Ŋain U Tienu, da foagidi leni nni! U Tienu, jaligi ki cua ki faabi nni.

¹³ Teni yaaba n bua ki ñani n miali N fiagi ki bodi! Teni i fe n ŋoadi yaaba n lingi n po yaala n bia, Ban fiagi ki tibini bi yula.

¹⁴ Ama mini wani, n baa yaa pia ti dugidi. N baa yaa yiini ki pagi a ki pugidi.

¹⁵ N ñoabu baa yaa togidi a teginma Leni a faabima daali kuli, Kelima mii bani li coali n da maama.

¹⁶ N baa togidi o Diedo U Tienu N tuuni o tuonciama maama. N baa tiadi ki maadi a teginma maama.

¹⁷ U Tienu, a bangi nni hali n bonwaama nni, Hali moala n baa yaa togidi a bancianma.

¹⁸ U Tienu, ŋan da ŋaa nni, Ba n yaa ti podi ke n yudi pendi. Lani n tie min yaa wangi yaa nifiima N tie ne a nii tuonciama, Ki go wangi a paalu yaa nifiima n ŋua.

¹⁹ U Tienu, a teginma kpedi hali boncianla, Kelima a tieni yaa bonla n yabi. U Tienu, ŋme n naani leni a?

²⁰ A den teni ke ti laa li paboanli Leni fala buoli boncianla, Ama a baa guani ki pa ti li miali. A baa teni tin ña yaa kuli n ye ki tinga nni.

²¹ Pugini n yabinu, Go baagi nni ki pugini.

²² N baa pagi a leni ku gogidigu. N Tienu, n baa yiini a ŋanbili po. N baa pagi a leni ku gogidigu, Fini Isidayeli Tienu yua n gagidi ki ŋani.

²³ N yaa yiini ki pagi a yaa yogunu, N pali baa yaa mani. N pali baa yaa mani hali boncianla, Kelima a faabi nni.

²⁴ Daali kuli n lanbu baa maadi A teginma maama, Kelima yaaba n lingi n fala kuli, I fe cuo ba ke bi fiagi.