Pisomi 7 - U TIENU MAAMA TILI 2013

Pisomi 7 O Diedo, saa n po i moamoani

¹ Ban wanli yaa wanli. Davidi yani siiga yanyenbu. O den maadi leni o Diedo, Benjamen buolu yua Kusi yaa maame.

² O Diedo n Tienu, fini n tie n kaanpaalu. Faabi nni leni yaaba n sedi n po, gaa nni.

³ Lani yaa ka, bi baa toadi toadi nni, Nani o yangbanlo n cuo yaa yanga, Ke oba kan fidi ki gaa ka o kani yeni.

⁴ N Diedo n yaa tieni line: Li yaa tie ke n nii tieni biadimiba,

⁵ N yaa tieni n danli biadima, Ki cedi ke yibali sani ki cia,

⁶ Yibali n ŋoadi ki deli ki nandi nni, Ki ŋmaa ki midi midi nni tiipo, Ki lu n kpiagidi mo mi wagima nni. Joma.

⁷ Fii leni a pabienli o Diedo, Ki yie n yibalinba pabiencianli po. Fini yua bani ki saa i moamoani, Taani n po.

⁸ I nibuoli boncianla gaani ki lindi a, Fini yua n ye tanpoli, ŋan diedi bikuli.

⁹ O Diedo ja ti buudi leni i nibuoli. Saa n po i moamoani o Diedo, Nani n teginma leni n papienli N pundi maama.

¹⁰ Teni bi nibiadiba biadima n gbeni, Paagi a niteginka. Fini yaa Tienu n tiegi, Ki biigidi li pali leni li yantiali kuli.

¹¹ U Tienu tie n gbankoandigu, ki guu nni. Wani yua n faabidi yaaba yaa pala n tiegi.

¹² U Tienu tie yaa bujialo n tiegi, Yaa Tienu pali n be daali kuli ti tuonbiadi po.

¹³ O nibiado yàá lebidi o pali, O baa luani o jugisiega, Ki kpali o dabanli ki yaa guu.

¹⁴ O bogidi mi kuuma jatiadi o po, Ki teni ke o piemi moandi boncianla.

¹⁵ O nibiado kaa ki jagi yaala n ki tiegi, O punbi ti tuonbiadi ki mali mi faama.

¹⁶ O gbini ku buogu hali ke ku ñuagi, Ama o guani ki baa ku niinni.

¹⁷ O biadima baa jiidi o yuli po, O tugumoangu mo baa baa o yuli po.

¹⁸ N baa pagi o Diedo o teginma po, N baa yiini ki pagi o Diedo tanpoli badiciamo.