Pisomi 68 - U TIENU MAAMA TILI 2013

Pisomi 68 Isidayeli tuondi U Tienu bu toabu po

¹ Bi yanyinba yudaano yani siiga yanbu. Davidi yanbu. Yanbu.

² U Tienu fii ki sedi, Ke o yibalinba sani ki yadi. Yaaba n nani o mo kuli sani Ki foagidi o kani.

³ Nani i muñii n yen bodi maama, A bolini ba cain yene! Nani ti sindi n yen nandi maama U mu nni yeni, Bi nibiadiba bodi yene U Tienu nintuali.

⁴ Ama bi niteginkaaba mangidi bi pala, Bi yigini U Tienu nintuali. Bi doagidi bi pamancianli.

⁵ Yiini mani U Tienu po. Yiini mani ki kpiagi o yeli! Pagi mani yua n jagi ti tawadi po. O yeli n tie: o Diedo. Mangi mani yi pala o nintuali.

⁶ U Tienu yua n ye o diegagidikaali nni, N tie a kpienbila baa, O koani ki gaani a kpepuona mo.

⁷ U Tienu puuni yua n ki pia danba ku diegu. O yen pa a kpaada mi faabima, Ki teni bi pala n mangi. Ama bi niyiekaaba wani baa yaa ye Yaa kaani n kuoni nni.

⁸ U Tienu, ŋan den ñani Ki cuoni a niba nintuali, Ki cuoni mi fanpienma nni, Joma

⁹ Ki tinga den digibi, Ti tawadi mo den nandi a nintuali, Nani lan den tua maama Sinayi po, U Tienu, wani Isidayeli Tienu nintuali.

¹⁰ U Tienu, a den teni ke ki taŋanga mini, Ki guani ki ŋanbi a tinga yaaga n den biidi.

¹¹ A niba den kali lankane, Fini U Tienu yua n pia ti bulicindi, A den ŋanbi laa kaanu yo o ninñinnilo po.

¹² O Diedo teni li ñoamabonli, Yaa puoba n wangi o laabaaliŋamo mo Yabi hali boncianla.

¹³ A toagola yudanba sani ki yadi. Yaa puoba n sieni ti diedi nni boagidi ti fagidi.

¹⁴ Yi baa yaa baa ki dua li nagili nni? Ki kpaajiega fiabi pia ŋanjilifa ke li taabi, Ki kobidi mo kuli pia wula yua n duudi.

¹⁵ Li Miali Diedo U Paaciamu Kuli Daano N den deli ki yadi bi badiba yaa yogunu, A tatana den baali Tisalimoni juali po.

¹⁶ Basan juali tie U Tienu juale. Basan juali yula coali yabi.

¹⁷ Be yaa po ke yaa juali yaa yula n yabi, Baa yaa poni leni U Tienu n gandi yaa juali, Ki baa yaa ye likani? Ba yeni, o Diedo baa teni Lin yaa tie o yekaanu hali yaa yogunu kuli.

¹⁸ O Diedo toateliti kuli coali tie tuda tuda yo. O Diedo mo ye ti siiga. Sinayi ye o kaangagidiŋamu nni.

¹⁹ A den doni naani n kpedi, Ki den taa a kpaada, Ki den ñani bu paabu bi nisaaliba siiga. Ba bi niyiekaaba moko baa ti yaa ye Fini U Tienu, o Diedo kani.

²⁰ O Diedo yeli n baa ti kpiagidi daali kuli. U Tienu yua n kubi ti, tie ti faabima.

²¹ Laa Tienu n tie ti po mi faabima Tienu. O Diedo ti Tienu pia Yaa paalu n baa faabi ti leni mi kuuma.

²² Moamoani, U Tienu baa mudi o yibalinba yula. Yua n cuoni leni i tagili, o baa mudi o yukuokuoli.

²³ O Diedo yedi: «N baa ñani ba Basan diema nni ki guani ba. N baa ñani ba hali mi ñincianma nni.

²⁴ Lani n tie ŋan ñuagi a taana mi soama nni, A sangbanli mo n baa bi biinu Yibalinba tinkpila siiga.»

²⁵ U Tienu, bi nua a taancianli cenli. N Tienu, n badiciamo taancianli Cenli o kaangagidiŋamu nni.

²⁶ Bi yanyinba n ye liiga, Ke ti baantiadi mo ŋua, Bi jafanba ye bi siiga ki pua mu lonmu.

²⁷ Pagi mani U Tienu a taanciama nni! Pagi mani o Diedo yinba Isidayeli yaaba taanli nni!

²⁸ Diidi mani Benjamen, Bikuli waajuogu yaa buolu n ye liiga, Juda buolu n yaa ŋua Leni bi badijaliada, ya n hali ki kpaa bonŋanla, Sabuloni buolu yudanba n yaa ŋua Leni Nefitali yaaba.

²⁹ A Tienu teni o ñoamabonli Ke fini n tie yua n pa! U Tienu, teni ŋan den tieni ti po yaala n yaa ye ki pa.

³⁰ A ye a jaandieli nni ki die Jerusalemi. Bi badiba baa cuani bu paabu a po.

³¹ Fu leni ku sabigu nni bonfuodo, Wani yua n tie nani a naatongola yeni, Ki die i nibuoli, ke bi gbaandi leni ŋanjilifa. Pua ki yadi yaa nibuoli n mangidi Bi pala bu toabu po.

³² Bi yudanba ña Ejipiti diema ki kpendi, Etiopi yaaba tiini ki kpendi U Tienu Kani ki yuugi bi nii.

³³ Ki tinga diema niba kuli, Yiini mani U Tienu po. Yiini mani ki kpiagi o Diedo. Joma

³⁴ Wani yua n tiini ti tawadi po, Yaa tawadi n ye hali yaa yogunu kuli! Diidi, wani n teni ke u nialu duni leni u paalu.

³⁵ Kpaani mani ki doagidi Ke U Tienu n tie U paalu Daano! O kpiagidi yiini Isidayeli yaaba po, O paalu mo ye ti tawadi nni.

³⁶ Hali o kaangagidiŋamu nni, U Tienu doagidi ke o pia i jeje. Wani n tie Isidayeli Tienu, Ki puuni o niba u fidu leni u paalu. U Tienu yeli n baa ti kpiagidi!