Pisomi 62 - U TIENU MAAMA TILI 2013

Pisomi 62 N yaa ye U Tienu kani, n yama dua

¹ Bi yanyinba yudaano yani siiga yanbu Jedutuni po. Davidi yanbu.

² U Tienu yaa kani bebe yo ke n yama dua, Kelima n faabima ña o yaa kane.

³ Wani n tie n tangu leni n faabima, O tie n wuonkaanu, n kan baa.

⁴ Hali u laa yogunu yo ke yi baa fii Ki sedi niyendo po, Ke yikuli baa yaa lingi ki kpa o, Nani yaa bilinu n diabi yeni, Nani yaa goanguongu n baa baa yeni?

⁵ Bi taani ki juogi ki baa ñani o o kaanu. Bi mangidi bi pala mi faama po. Bi gaaliti leni bi ñoana, Ki nan solini bi pala nni. Joma

⁶ U Tienu bebe yaa kane Ke n baa lingi mi yanduanma, Kelima wani n puuni nni mi suginma.

⁷ Moamoani, wani n tie n tangu, N faabima leni n kaanpaalu. N yaa ye leni o, n kan ŋmadi ki baa.

⁸ N faabima leni n kpiagidi ye U Tienu kane. Wani n tie n tangu yaagu n pia u fidu, Wani n go tie n wuonkaanu mo.

⁹ Yinba bi niba kuli, dugi mani o po u yogunu kuli. Cuani mani o nintuali yi pala nni maama. U Tienu n tie ti wuonkaanu. Joma

¹⁰ Bi nisaaliba tie fawaama bebe. A nikpiaga leni taliginba kuli tie faama bebe. Li bonbiigikaala nni, bi baa yugi Kelima bi faali ki cie mi fawaama.

¹¹ Da dugi mani ku tugumoangu po! Da jigini mani i janbi! Yi piama yaa pugidi, Yin da kuani yi yama lienni.

¹² Yenma ka ke n gbadi U Tienu kani Yaa maama n tie ne: «Mini n tie u Paalu Daano.»

¹³ O Diedo, fini n die li ŋanbili, Kelima a guandi yuakuli, Nani o tuona n tie maama.