Pisomi 61 - U TIENU MAAMA TILI 2013

Pisomi 61 N Tienu, n bua ki yaa ye a diegu nni

¹ Bi yanyinba yudaano yani siiga yanbu, ban yiini yaabu leni ku gogidigu. Davidi yanbu.

² U Tienu, cengi n kuudi! U Tienu, cengi n jaandi!

³ Hali u tinbianu po n kpaani, Ki miadi a leni li paboanli. Ciani nni yaa tangu n kpedi kani.

⁴ A tie n po wuonkaanu Leni yaa toadieli n pia u paalu, Ki baa gaa nni n yibalinba kani.

⁵ N bua ki yaa ye a gbandieli nni, Yaa yogu n tuu yaa yogu kuli, Ki baa ki yaa wuo a fiabi nni. Joma

⁶ Fini U Tienu a cengi n miabu. A puuni nni yaaba n fangi a yeli, N pia yaa seli.

⁷ Pugini o bado miali dana, O bina n yaa pugidi nifiima n tuu nifiima nni!

⁸ Wan yaa kaa ti gbandi po, U Tienu nintuali yaa yogu n tuu yaa yogu. Teni a ŋanbili leni a moamoani n yaa kubi o.

⁹ Lani, n baa yaa yiini ki kpiagidi a yeli yogunu kuli. N baa kuani min niani yaa ñoaniani daali kuli.