Pisomi 60 - U TIENU MAAMA TILI 2013

Pisomi 60 U Tienu, todi ti tin koani leni ti yibalinba

¹ Bi yanyinba yudaano yani siiga yanbu, ban yiini yaabu leni ku gogidigu. Davidi yanbu mi tiadima po. Li tie mi bangima po.

² Li maadi Davidi n den tuogi bu toabu leni Siiri diema niba, yaaba n den kaa Mesopotami leni Soba diema nni. Ban den ñani lipo ki kpendi, Joabi, Davidi toagola yudaano den pua ki paadi Edomi toatieba, yaaba n den tie piiga n niba tudalie (12 000) ki kaa mi yaama Joaloangu nni.

³ Ŋain U Tienu, a luni ti ki yadi ti, Kelima a pali beni ti po. Ba leni lani kuli, Guani ki taani ti ki teni tin yaa se ki pa.

⁴ A teni ke ki tinga digibi ki padi padi. Guani ki mubini ki ñiali, Ki teni kaa go se ki pa.

⁵ A waani a niba yaa fala n pa. A teni ke ti ñuni mi dabiadima.

⁶ A puni a niba li jakoandicabili, Ke ban yaa yugidi li i moamoani po.

⁷ Cua ki todi ti, ki gaa ti miabu! Yeni, a buakaaba baa faabi.

⁸ U Tienu maadi o diegagidikaali nni, Ki yedi: «N baa koani ki paadi. N baa boagidi Sikemi diema, Ki biigi Sukoti joaloangu.

⁹ Mini n die Galaadi diema, Mini go die Manase diema moko. Efrayimi diema tie n kusancibinkaali, Juda diema mo n tie n badigbiamu.

¹⁰ Moabi diema tie n ñinwalitiagu. N luni n cacaagu mo Edomi diema po. N fii ki sedi Filisiti diema yaaba po Ki kuudi bu toabu kuudi.»

¹¹ Ŋme n baa teni min diedi u kaanpaalu? Ŋme n baa gedini nni hali Edomi po?

¹² Laa tie fini U Tienu kaa, Fini yua n den luni ti Kaa go ña leni ti toagola?

¹³ Cua ki todi tin koani leni ti yibalinba, Kelima o nisaalo wani yaa todima Tie fanma bebe.

¹⁴ U Tienu baa todi ti tin koani leni mi jama, Kelima wani n baa ŋmaa ki midi ti yibalinba.